- Pisiffik maannakkut isumaqatigaarput.
Nuuk Centerimi siulittaasoq Stefan Ittu Hviid AG-mut oqarpoq, Pisiffiullu RS Services isumaqatigigaa nassuerutigalugu.
- Pisiffik maannakkut isumaqatigaarput.
Nuuk Centerimi siulittaasoq Stefan Ittu Hviid AG-mut oqarpoq, Pisiffiullu RS Services isumaqatigigaa nassuerutigalugu.
Arnap Filippinerineersup torersumi pisiniarsinnaaqqulluta Nuuk Centerimi ukiup aappaa avillugu sulinngiffeqanngivilluni torersaallunilu eqqiaasarsimavoq. Taanna Qinngorpumi Pisiffimmi, Elgigantenimi Nuuk Centerimilu ilaatigut eqqiaasarsimavoq. (Allaaserisap aappa atuaruk aaqq.)
Taanna SIK aqqutigalugu RS Servicesimik eqqartuussivimmut suliassanngortitsisut arnat pingajoraat - aningaasanik 372.000 koruuninik taarseeqqusillutik.
Pisiffik eqqartuussinermi suliaq ataqqiniarlugu taamaattumillu Kalaallit Nunaanni Eqqartuussivinni aalajangiiffigineqartinnagu oqaaseqarusugani AG-mut sapaatip-akunnerani kingullermi oqarpoq.
Agguataarneri
Aningaasanik taarseeqqusissut RS Servicesimut piumasarineqartut 372.000 koruunit missaanniipput, ukununnga agguataarneqarput:
Arnap, RS Servicesimi eqqiaasartuusup, 97.320 koruunit piumavai, taakkunannga 33.900 koruunit qaangiuttoornermut, 35.100 koruunit qasuersaarsimannginnermut 28.320 koruunillu sulinngiffeqannginnermut.
Arnamut ukiuni tallimani Kalaallit Nunaanniissimasumut 227.783,60 koruunit taarseeqqusissutigineqarput.
8.960 koruunit akissarsianut nalimmassaanermut. 18.810 koruunit qaangiuttoorluni sulisimanermut. 95.013,60 koruunit ukiuni sisamani sulinngiffeqannginnermut, tamatumalu saniatigut arnaq ukiuni marlussunni najukkamini najugaqarsimanngikkaluartoq, RS Servicesip ineqarnermut akuersissuteqarani akiliisittarsimavaa. Tassunga taarseeqqusissutit 105.000 koruuniupput.
Arnap pingajuata 45.897,60 koruunit piumavai. Taakku qaangiuttoornermut 2.736 koruunit taarseeqqusissutaapput, sulinngiffeqarsimannginnermullu 43.897,60 koruunit.
SIK AG-mut ilisimatitsivoq suliaq Kalaallit Nunaanni Eqqartuussivinnut qaqugu suliarineqassanersoq ullulerneqarsimanngitsoq. Suliarli tusagassiutitigut juulimi sammineqarneranit sulisut tikisitat SIK-mi inatsisitigut ikiortittoqarsinnaasoq ilitsersuunneqarsinnaallutilllu paasivaat.