Nuummi mittarfik taxartartut isaatitsivigilluarpaat

“Nuuk Taxi, sullissaqarpugut. Utaqqilaarit. Vi ekspederer. Et øjeblik.”

Ullaakkut taxanut sianertillutit nipi taanna tusartarsimagukku peqqutissaqarluarpoq. Taxammi Nuummi ulapputeqaat. Nuuk Taximi taxartitsisut ilaat, Inuujuk Petersen, ulapputtunut ilaavoq ullaaralaakkullu suliartortuaannarluni.

- Nalinginnaasumik arfernup missaani, kisianni aamma suleqatinniit sisamap missaani itersarteriasaartarpunga, ulapikkaangatta.

Inuujuk Petersenip oqaloqatigineqarnera Podcastimi tusarnaaruk. Taxartartut Nuummi mittarfiup ammarnerata kingorna ulluinnarsiutigiligaat ilaatigut oqaluttuaraa.

Ulapissimaqaallumi. Nuuk Taximi pisortap oqarnera malillugu taxat kaaviaartitaat aasaq kingullermut sanilliukkaanni 20 procentit tungaannut qaffariarsimapput. Angalaniartut amerlipput timmisartullu angalaniaraluit taamaatiinnarneqartorpassuupput.

- Taakkuinnaannginnamik taxarusuttut, aamma silarlukkaangat maani najugallit amerlatsittaramik taxarusuttut. Suliassat annertuserujussuartarput, ingammik ullaakkut suliartorfiup nalaani.

Inuujuk Petersenip oqaluttuarnera naapertorlugu taxartartut assigiinngitsuupput. Ilaasa ulloq eqqissisimanerullutik atortarpaat, ilaallu sukataarnerullutik. Nammineq sukataarluni isertitaqarusulluni ilaavoq. Inuujuup qanoq isertitaqartiginera kingusinnerusukkut tikissavarput.

Trump taamaatitsiinnarnerpassuillu

Januaari tassaasaraluarpoq taxartartunut isertitakinnerpaaffiat. USA-lli præsidentiata ernerata Donald Trump Jr.-ip tikinnera peqqutaalluni taxartartut ulappuserput.

- Taxartitsisuulluni qujanarfeqarpoq Trumpip qanoq eqqartornikuutigineraatigut, oqaatigisartagai sakkortusinnaagaluartut.

- Tikerartut amerlatsipput, taamaasilluni aamma aningaasat isaatitassagut annertunerulerlutik, Inuujuk oqaluttuarpoq.

Amerikamiulli præsidentiata nunatsinnik persarinninnera kisimi peqqutaanngilaq. Nuup mittarfia ammaqqammiinnartoq silap unerisimannginnera ilaatigut peqqutaalluni, mittarfittaamilu unammillernartut allat peqqutaallutik timmisartut arlalissuit taamaatiinnarneqartarput.

- Taxartitsisuulluni aningaasat kaaviiartitatsinnut iluaqutaarujussuarnikuuvoq, kisianni soorunami aamma kanngunarfeqalaarpoq illoqarfigalugu, taavalu aamma international lufthavniuniartussaagaluaq qassissaat matugaluarnikuuaat, Inuujuk Petersen oqarpoq.

Ilaasut tukkortut

Taxanut siornatigut ilaasartunut sanilliullugit allaanerusut taxartartut ukiorli ulluinnarsiutigilerpaat. Taakku saniatigut ilaasartut allarluinnaat New Yorkimiit United Airlinesimut ilaallutik juunip 14-iani tikittalerput. Tikittussanngormallu taxat illoqarfimmi ulapitsigalutik akunnerup affaa sioqqullugu siulliuniutiinnaq qummukakaasimapput.

- Tamatta nalunngereeratsigu amerikamiut kulturerigaat drikkepengeliisarneq.

Sunaaffa amerikamiuunngilluinnartunik ilaasoqarnialerami. Qallunaammi marluk New Yorkimiit tikittut ilaasorai.

- Tamaasa assigiimmik piniaraluarlugit, kisianni tusaallugit qallunaatut oqaluttuusut, pikkunaatsoornalaarluni, Inuujuk illarluni oqarpoq.

Kingorna tikittarnerani amerikamiunik ilaasoqarluartalerami ilaasunit allanit tukkorneruneri uppernarsivaa.

- Aperisarput 100 krone qass’ dollariunersoq, oqaluttuukkukku qass’ dollariunersoq. Taava amerlasuut dobbeltinngorlugu tunniuttarpaat. Oqarlutillu sinnera utertussaraluat paariinnassaginga. Tamakkua nalaarlugit iluartartorujussuuvoq, kisianni oorit piinnarnagit amerikarmiut ilaasorissallugit nuannarisarpara oqaluukkuminartarnermik inussiarnerlutillu, Inuujuk oqarpoq.

Drikkepenget tassaapput taxartut akiliutissamik saniatigut taxartitsisunut akiliutigisartagaat, assersuutigalugu nunani allani neriniartarfinni nerisimagaanni allaniluunniit sullinneqarsimatilluni akiliutit qaavisigut tunniunneqakkajuttut. Drikkepengennattarnerlu ulluinnarsiutiginagu sungiunniarnaqqaalaarsimavoq.

- Soorunami ajuusaarnalaartarpoq.

- Qujasorujussuusaramik ingammik oqaloqatigisimagaanni, ingerlannerini nuannisarsimagaangamik drikkepengeliinissaat nærmest sikkert (qulakkeqqapajaareertarpoq), Inuujuk oqarpoq.

Hans Egede inissiisarfillu

Taxanut ilaasalersut alapernaallutillu oqalukkumasarsimaqaat. Takorusuttagaallu taxartartup inuusuttup tupaallaatigilaarsimavai. Siullertut Nuummi Pineqaatissinneqarsimasunut Inissiisarfik ussataannut ilaasarpoq.

- Aperinikuunngilakka sooq taama soqutigitigisarneraat, kisianni ilimagaara peqqutit ilagisimassagaat Netfliximi aallakaatinneqarnikoq “Inside Worlds Toughest Prisons”, taanna takunikuusimassagunaramikku, Inuujuk eqqarsarpasilluni oqarpoq.

Aamma Hans Egedep eqqaassutissaa Nuummut takornariat takorusulluartagaanut ilaavoq.

- Taakungartorpassuusaramik. Ilai apereriasaarsinnaasarput, Hans Egede nunatsinnik nassaartuugamigooq kalaaliunersoq.

Naqqittariaqartarpaalu.

- Oqaluttuutiinnarlugit uagut atuarfimmi paasinikuusagut oqaluttuakujuit, taava tupattarput.

Inuujuulli nammineq aalajangissasuuguniuk sumunngaatissagaluarpaamita?

- Illoqarfiup qeqqanut. Malugisarakku illoqarfiup qeqqatigooraangatta ilai tupigusuttartut, suut tamarmik, soorlu pisiniarfikujuit qanoq imminnut qanitsiginersut.

Inuujuup takornarianik sullissaqarnerulernertik peqqutigalugu Nuummi takornariaraanni misigineqarsinnaasut neriniarfigineqarsinnaasullu misissorluartalerpai.

- Turistguidenngoriasaartaratta qanoq pinerpoq, aali taxartitsisuuniarluta.

Sapaatip-akunneranut 16.000 koruunit

Taxartartummi aamma tassaasarput takornariat tikikkaangamik naapeqqaartagaat. Tuluttut oqaluttorpassuit sullittussanngoramikkit oqqatik assakartillattaalerpaat.

- Siullermik kutannerujussuuvunga, tuluttut soorlu oqalunniaruma oqaatsikka eqqarsaatigeqqaaqqissaarlugit qanoq oqaatigissanerlugit, Inuujuk oqarpoq.

Aasaanerinnaanilu oqallorissipilooriasaarsimalluni ilaasuminit aperineqarami paaseriasaarpaa.

- Aperivaanga sooq tuluttoornera taama amerikarmiorpalutsiginersoq. Aperaluni Amerikamiinnikuunersunga, taakani najugaqarnikuunersunga. Sulilu Amerikamut uanga tikinnikuunanga, Inuujuk illarlunilu oqaluttuarpoq.

Takornariat tikerarluaraangata nunaqartullu aningaasarsilluarsimagaangata taxartitsisut ingammik malugusuutigisarpaat. Aggusti naammat akileraarutinik utertoortut, aningaarsarsisut takornariallu taxartitsisunit naammagittaalliuutissaanngiivipput.

- Tassani sapaatip akunneranut ca. 15-16.000 kr. isertippara ullut arfineq-marluk iluanni skateereerlunga.

Imaanngilarli taamaattuaannartoq.

- Taava sapaatip akunnerata tullia isaatitakka taamaanngerujussuarput. Immaqa 7.000-luunniit angunngilaa.

Isertitaqarneruneq = oqimaannerulerneq

Taxartartut isaatitaasa qaffariarneri ilutigalugit Inuujuk nammineerluni allatigut qaffariaateqarpoq.

- Taxaleramali massakkumut, qaammatit 16-it missaanni 20 kilo sinnerlugu ativara. Timersortuaannarnikuullunga, aatsaat taama timersunngitsigalunga. Massakkut allannguuteqarfiginiarsaralugu timersortaleqqippunga pisuttualaartaleqqillunga.

Inuujuk timersortaleqqagami oqiliartoqqissanersoq paasinarsissaaq. Ataaserli qularnanngilaq, tassa takornariat tikittartut ukiuunerani ikiligallartussanngorput. Timmisartorsuimmi tikittartut ilaat unikkallartussanngoramik.

- Neriuppunga suliassagut suli naammakkumaarput, kisianni pissangagilaarpara. Aamma takorloorsinnaalaarpara pikkunaallilaaqqikkumaartoq.

Taxartartorli uniinnarnianngilaq. Sapaatip-akunnera naallugu ullaakkut arfinermiit unnukkut arfernup tungaanut suli sulisassaaq. Anguniagaqarpormi.

- Feeriaqqikkallassanngilanga, taxataareeruma aatsaat suna tamaat inisseqqereerpat tamakku eqqarsaatigileqqikkumaarpakka, Inuujuk Petersen taama naggasiivoq.