Pasinapiluttumik kalerriisut pillugit inatsit inuussutissarsiortunut millioninik akeqassaaq

Suliffimmini pasinapiluttumik pisoqarneranik kalerriisut illersorneqartassapput, taamaalillutik saaffiginnissutaat isertortumik avataaneersunit suliffeqarfiup sunniuteqarfiginngisaanik misissorneqartassallutik.

Inatsisissatut siunnersuut pingasunik siunertaqarpoq, tamanna Inatsisinut Ataatsimiititaliap isumaliutissiissutaani atuarneqarsinnaavoq:

1. Kalaallit Nunaanni pasinapiluttunik kalerriisarnermik aaqqissuussinermi nalunaaruteqartarnermi malittarisassat assigiiaartut, namminersortuuneq imaluunniit pisortani suliffeqarfiuneq apeqqutaanani.

2. Sulisitsisut sulisartumik pasinapiluttumik kalerriisimasumik pillaaniarneranni annertusisamik uppernarsaasiisussaatitaanermik atulersitsineq. Tassa sulisitsisoq pasinapiluttumik kalerriisimasumik soraarsitsinissamut, nuutitsinissamut suliassanilluunniit annertuumik allannguinissamut immikkut pitsaassusilimmik tunngavissaqassaaq, iliuutsimmi pasinapiluttumik kalerriisimanermik patsiseqarsimanissaat ilimagineqartariaqarmat

3. Pasinapiluttumik kalerriisut naapertuilluartumik naleqquttumillu aningaasanik taarsiivigineqarnissaannik qularnaarinninneq. Pasinapiluttumik kalerriuteqarsimasup kalerriisimanera pissutigalugu soraarsinneqarnerani pillarluguluunniit akiniarneqarnerani taamatut taarsiisinnaaneq pisariaqarpoq. Sulisartumummi najugaqarfigisamini suliffimmik nutaamik, suliatulluunniit ingerlatami assinganik nassaarniarnera ajornakusoortorujussuusinnaavoq.

Ataatsimut nalunaaruteqartarfik

Aningaasartuutit annikillisinniarlugit suliffeqarfiit ataatsimut nalunaaruteqartarfiliorsinnaasut ilisimatitsissutigineqarpoq.

Ukiumut nalunaarutit qulit 15-illu akornanni amerlassuseqarnissaat missiliorneqarsimavoq, Namminersorlutik Oqartussanut aningaasatigut kinguneri 1 million koruunit missaanniissallutik.

- Taama missingiineq annertuumik nalorninartoqarpoq, tassa inatsisip nassatarisaanik suliat nutaat ullumikkumut sanilliullugu qanoq amerlatigissanersut assut eqqoriaruminaammat. Tamatuma saniatigut inatsisip atuutsinneqalerneranut atatillugu suliffeqarfiit pisussaaffitik pillugit innuttaasullu pisinnaatitaaffitik pillugit paasitinneqarnissaat siunertaralugu paasititsiniaanermut 100.000 kr.-it missaannik ataasiartumik aningaasartuuteqartoqassaaq, isumaliutissiissut naapertorlugu.

Kommuninut 6000-t missaanniittunik sulisoqartumut aamma ukiumut suliat 15-it aamma 22,5 missaanniittunik naatsorsuinermi, saniatigut aningaasartuutit kommuninut immikkut annerpaamik ukiumut 300.000 koruuniussapput.

Inuussutissarsiortut aningaasartuutaat

Kalaallit Nunaanni suliffeqarfiit 30-it sinnerlugit sulisullit 2020-mi 88-iupput.

- Siunnersuut inuussutissarsiutinik ingerlataqartut aningaasartuutaasa annertusinerannik nassataqassasoq naatsorsuutigineqarpoq, tassa suliffeqarfiit 30-t sinnerlugit sulisoqartut nalunaaruteqarfimmik pilersitsissammata, nalunaarutigineqartunik suliaqarsinnaasumik arlaannaannulluunniit attuumassuteqanngitsumik avataaneersumik suleqateqarnermik nassataqartussamik. Taamaalilluni nalunaaruteqartoqartarnersoq aammalu suleqatigisaq avataaneersoq arlaannaannulluunniit attuumassuteqanngitsoq siumut akissarsisinneqarnissaminik piumasaqassanersoq aningaasaqarnikkut kingunerisassanut apeqqutaassaaq.

Siuliani allassimasut tunngavigalugit namminersorlutik inuussutissarsiuteqartut inatsisip atuutsinneqalernerata kingorna ukiumi siullermi 3,5 mio. kr.-inik aningaasartuuteqassasut, nalunaaruteqartarfiillu ukiuni tulliuttuni atuunnissaannut ukiunilu tulliuttuni suliat ingerlanneqarnissaannut ukiumi ataatsimi aningaasartuutissat 1 mio. kr.-inut missingerneqarput.

Ullut atuutilerfissat

Inatsissatut siunnersuut 2023-mi oktobarip tallimaani siullermeerneqarpoq, ukioq mannalu maajip 13-ani aappassaaneerneqassaaq. Inatsisinut Ataatsimiititaliap oqaaseqaatai tunngavigalugit inatsisissatut siunnersuut akuerineqarpat, 2025-mi januaarip aallaqqaataanit atuutilertussaavoq. Sulisitsisulli namminersortut aaqqiissutaa aatsaat 2025-mi juulip aallaqqaataani atulissaaq.