Piiaavik matugaluartoq rubinit suli tunisaalluarput

389.500 koruunit.

Assammioq nunatsinneersumik 4,26 karatinik oqimaassusilimmik rubinitalik diamantinillu ammaloqisaanik 1 karatimik oqimaassusilinnik marlunnik kusassaasigaq taama akeqarpoq.

Pinnersaataarniarfiup Hartmann’sip Københavnimiittup assammioq, niuertarfimmi pinnersaatini nunatsinneersunik rubinitalinni kisiartaanngivissoq akisunerpaasorli, tuniniarpaa. Assammiup saniatigut pinnersaatit nunatsinneersunik safiritallit rubinitallillu 7.500 koruuniniit aallartittumik akillit tuniniagaapput. 

Toqqagassaqarluarlunilu pitsaassuseq qaffasissoq 

Piginnittup Ulrik Hartmannip nammineerluni 2018-imi aatsitassarsiornermik suliniuteqaqataasimasup piiaavik Aappaluttumiittoq silissivillu Bangkokimiittoq tikeraarlugillu pinnersaatinik arlalinnik ilusilersuinikuuvoq. Naak piaavik matugaluartoq Greenland Ruby-lu ajoraluartumik akiliisinnaajunnaaraluartoq rubinit nunatsinneersut suli tunisaalluartut oqaluttuarpoq.

– Hartmann’s maanna nunarsuarmi kisiartaalluni pinnersaatinik nunatsinneersunik rubinitalinnik toqqagassaqarluartunik qaffasissumillu pitsaassusilinnik tuniniaasutuaavoq. Pinnersaatinik Kalallit Nunaanneersunik rubinitalinnik piffissami sivisuumi tuniniaasinnaajumalluta rubinit pitsaanerpaat ukiorpaalunni pisiariortornikuuagut, Ulrik Hartmann, qallunaarpassuarnik kalaalerpassuarnillu pisinnaatillutik oqaluttuarisaanermut ilaasunik perusuttorpassuarnik naapitsisartoq, oqaluttuarpoq. – Soqutigineqarluarlutillu piumaneqarlualertarput. Rubinit Kalaallit Nunaanneersut ukiut tallimaannaat qaangiuppata pissarsiariuminaassisimanissaat ajoraluartumik takorloorsinnaavara, Ulrik Hartmann oqarpoq.

Akiliisinnaajunnaartoq suli oqaloqatigisaraat 

Aatsitassarsiornermut Naalakkersuisoqarfiup Greenland Ruby akiliisinnaajunnaartoq suli oqaloqatigisarlugu ilisimatitsivoq. – Ingerlatseqatigiiffik akilersuiunnaarpat, akiliisinnaajunnaarpat assigisaannilluunniit pippat aallarniutigalugu oqaloqatigisarnera aalajangersimasumik periusigaarput. Akuersissutit piginnittumut nutaamut tunniunniarlugit naapertuuttumik aaqqiissuteqarnissaq piginnittut akiliisinnaajunnaartut oqaloqatigisarnerini siunertaavoq. Oqaloqatigiinneq – aamma tunisassianut uninngasuutinut tunngasoq – suli ingerlavoq, tamannalu 2025-mi ingerlaannassasoq naatsorsuutigaarput, naalakkersuisoqarfimmi ingerlatsisoq Jørgen Hammeken-Holm, rubinit Hartmannip pinnersaasiaaniittut pisiarineqarlutillu akilerneqarsimagamik akiliisinnaajunnaartup pigisaanut ilaanngitsut nakkutilliisoq aqqutigalugu aamma oqaaseqartoq, ilisimatitsivoq.