– Pissutsit taamaakkaluartut naatsorsuutit naammaginarput

Kalaallit sanaartornermik ingerlatsiviata Permagreenip ukiumi naatsorsuiffiusumi kingullermi isertitani naammagisimaarpai.

Suliffeqarfiup qullersai 2023-2024-mut naatsorsuutini saqqummiunneqaqqammersuni ima allapput:

- Pissutsit taamaakkaluartut ukiumi angusat naammaginarput.

2023-24-mut naatsorsuutit naapertorlugit kaaviiaartitani 516 million koruuniusuni akileraarutit suli ilanngaatiginagit 36,9 million koruuninik sinneqartooruteqarpoq.

Nammineq aningaasaatit 2024-mi septembarip naanerani 103 millionit koruuniupput. Permagreenip ukiumi 2024/25-mi akileraarutit suli ilanngaatiginagit sinneqartoorutit 23 millionit koruunit 28 millionit koruunillu akornanniissasut naatsorsuutigaa.

- Sanaartukkat suliffeqarfiup ingerlatsinerani aarlerinarnerpaatut nalilerneqarmata suliniutinik aqutsineq pingaartinneqarpoq.

- Suliffeqarfiup atortussanik atuinera niuerfimmi akit qaffannerannit aarlerinarnerulersinnaavoq. Akit qaffanneri suliniutini maanna ingerlanneqartuni akinut killilimmik ilanngunneqarsinnaapput, aqutsisut ukiumut nalunaarummi allapput. 

Sorsunneq atortussat akiinik qaffatsitsisoq

Sorsunnerit pissutigalugit atortussat akitsoraluttuinnarput

Ruslandip Ukrainellu sorsunnerisa ingerlaannarnerata kingunerisaanik ukiumi naatsorsuiffiusumi kingullermi atortussat akitsoraluttuinnarput.

- Akit qaffasinnerpaaffissaminiipput, maannalu niuerneq patajaallisinneqareerpoq, kisianni sorsunnerup COVID-19-illu siornanit akisunerujussuanngorsimalluni, Permagreen allappoq.

Suliffeqarfiup pisortaanera Jeppe Steffensen oqaaseqaqqugaluaratsigu iluatsinngilarput.

Aarsleff: - Kalaallit Nunaanni periarfissaqarluarpoq

Permagreen Danmarkimi sanaartornermik suliaqartut annersaata, Aarsleffip, ataaniippoq. Suliffeqarfissuaq Kalaallit Nunaanni niuerfik pillugu 2023-24-mut ukiumoortumik nalunaarummini ima allappoq:

- Kalaallit Nunaanni niuernikkut periarfissat suli pitsaapput, pingaartumik Nuummi sanaartornerup Pituffimmilu sakkutooqarfiup allilerneqarnerata tungaatigut. Kingullermik suliffeqarfissuup J-Plant-imik taaneqartartup, sakkutooqarfiup nukissiuutinik pilersorneqarneranik nutarterinissamut 700 million koruuninik isumaqatigiissuteqarfigaa, Aarsleff allappoq.

Suliffeqarfiup Islandimi ingerlatseqatigiiffia, Ístak hf., Nuummi atuarfissami nutaami suli atorneqalinngitsumi sanaartornermut tamakkiisumik akisussaasuuvoq.

- Maanna meeqqat 1.000-it Nuummi atuarfissap nutaap, Atuarfik Inussup, 18.000 kvadratmeterisut angitigisup nutaaliaallunilu qaamasup atuarnissaa qilanaarisinnaavaat,“ Aarsleff ukiumoortumik nalunaarusiami allappoq.

Sanaartornersuaq illunik arfineq-marlunnik immikkoortortaqarpoq, timersortarfik, inersuaq, kaffisortarfik qitinnermullu inersuaaraq ilanngullugit. Ístak suliniut pillugu Kommuneqarfik Sermersik 615 millionit koruunit nalinginut isumaqatigiissuteqarpoq.