Polar Seafood: Piffissami sivikitsumi tusarniaaneq inuinnaat naalakkersueqataanerannik sanngiillisitsivoq

Aalisarnermut Piniarnermullu Naalakkersuisoqarfiup Naalakkersuisut sinnerlugit aalisarnerup teknikikkut aaqqissuussaaneranik Namminersorlutik Oqartussat nalunaarutaannut siunnersuut novembarip 21-anni tusarniaassutigalugu nassiussuuppaa.

Ippassaq sisamanngornermi decembarip 19-ianni tusarniaanermi piffissaliussaq qaangiuppoq.

 Sapaatip akunnerini sisamani tusarniaaneq

Taamaalilluni tusarniaaffigineqartut, ilaatigut aalisarnermik inuussutissarsiuteqartut soorlu Polar Seafood Greenland, taamaallaat sapaatip akunneri sisamat atorlugit atuarnissaanut, oqallisiginissaanut tusarniaanermullu akissutit pitsaasut allannissaannut piffissaqarsimavoq.

– Tusarniaanermut piffissaq taama sivikitsigisoq isornartulerujussuuvoq. Naalakkersuisut nalunaarummut siunnersuutip isummerfigineqarnissaanut qaammammik ataasiinnarmik piffissalerpaatigut. Tamanna inuinnaat naalakkersueqataanerat tunngavigalugu ingerlatsinerunngilaq, tassalu inuinnaat naalakkersueqataanerisa sanngiilliartornera, Polar Seafoodimi pisortaq Miki Brøns Sermitsiamut oqarpoq.

 Tuaviupiluttumik suliamik ingerlatsineq

Polar Seafoodimit oqaatigineqartut naapertorlugit. Naalakkersuisut tusarniaanermi akissutigineqartut tamaasa inaarutaasumik nalunaarusiamut ilanngunnissaannut ullunik marlunnik piffissaqarsimapput.

 – Naalakkersuisut nalunaarummik pilersitsiniarlutik aalajangereerpata, aalisariutaatillit ullut qulit ingerlaneranni malittarisassanut nutaanut naleqqussartariaqarput. Periaaseq tamanna tuaviupiluttumik ingerlatsineruvoq, Miki Brøns ernumasorujussuaq oqarpoq. Taanna milliardikkaanik aningaasaateqartunik Polar Seafood Greenland A/S-imik aamma Polar Seafood Denmark A/S-imik piginneqataavoq.

Taassuma oqaatigaa, aalisarnermut inatsimmut nutaamut atatillugu nalunaarut Naalakkersuisut suliniutaat, ukiuni 30-ni kingullerni Nunatsinni raajarniarnermut sunniuteqarnerpaassasoq.

 Kilisaatit akilersinnaanerat ajorseriassasoq

Nalunaarutissatut siunnersuut aalisarneq pillugu Inatsisartut inatsisaata, maajip 16-ianni 2024-mi akuerineqartup, pingaarnersaasa ilagaat. Siunnersuummi raajarniarneq pillugu malittarisassat nutaat, ilaatigut angallatit Qeqertarsuup Tunuani siunissami aalisarsinnaanermut akuerineqarsinnaasut angissusaat, aamma saarullinniarnermi saarullinnut uumatitsiviit pillugit malittarisassat nutaat ilanngunneqarput.

Polar Seafood umiarsuarmik suliffissualimmik Polar Qaasiummik kilisaataateqarpoq, nalunaarummillu eqqugaanissaa naatsorsuutigineqarluni.

– Umiarsuaatitta akilersinnaanera ajorseriarujussuassaaq, kilisaatimmi Nunatta Karsianut akileraarutitigut akilertagai ukiumut 60 millionit koruuninik ikileriassapput. Inuttallu akissarsiamik 17 aamma 20 procentit akornanni appariarnissaat naatsorsuutigisinnaavaat. Naalakkersuisut namminneq Namminersorlutik Oqartussani sulisunut taama annertutigisunik allannguisariaqarsimagaluarpata inatsisitigut piumasaqaatit malillugit tusarniaanerit ilimasaarinerillu ingerlanneqarsimassagaluarput. Inuimmi akissarsiaat taama appartinneqarpata, allamut suliffissarsiornissaat ernummatigineqarsinnaassaaq, pisortaq isumaqarpoq.

Nangillunilu ima allappoq:

- Aalisarnermi inuussutissarsiortunit allanit nalorninartorsiorneruneq sungiusimavarput, taamaattorli politikikkut nalorninartorsiornerulersitsinissamut pissutissaqanngitsoq isumaqarpugut.

Namminersorlutik Oqartussat ulapippallaartut

Namminersorlutik Oqartussat ulapippallaarput. Aap, ulapippallaalaarput, Polar Seafoodip pisortaa taama isornartorsiuivoq.

 Miki Brøns suliffeqarfissuaq sinnerlugu politikerinut, tassa Naalakkersuisunut, ersarissumik kajumissaaruteqarpoq:

- Ulapippallaarunnaalaariaritsi, kingunerisassai naatsorsorsigik, oqaloqatigiinnissanut aggersaagitsi, nunallu aningaasarsiornikkut imminut napatinnerulernissaanut iluaqutaasumik aalajangiigitsi.

- Raajarniarneq TAC-mik [pisassiissutit amerlanerpaaffissaat, aaqq.] pisassiissutit ikilinerannit eqqugaareerpoq. Maannalu tuaviuussanik aalajangiinissanut piffissaanngilaq, tamakkumi ukiunut qulikkaanut tulliutunut sunniuteqarsinnaammata, pisortaq oqarpoq.

Naalakkersuisut 2024-mi novembarip 28-anni aalajangerput Kitaani 2025-mi raajartassat tamarmiusut 83.125 tonsiussasut Tunumilu 7.550 tonsiussasut. Kitaani 80.000 tonsiunissaat innersuussutigineqarpoq. Taakku 2024-mut siunnersuutigineqartumit 15.000 tonsinik ikinnerupput.

Aalisarnermut inatsisissamut nutaamut atatillugu teknikikkut nalunaarutip nalunaarutillu allap atuutilersinneqarnerisa aningaasaqarnikkut kinguneri ilungersunarput.

 Akileraarutit ikileriassasut

Isumalluutinut akitsuutit appariarnerisa saniatigut Nunatta Karsiata naatsorsuutigisinnaavaa akileraarutit A-t aamma ingerlatseqatigiiffinnut akileraarutit ikileriarnerat. Polar Seafoodip naatsorsuutigaa, nalunaarutini marlunni siunnersuutit piviusunngortinneqarpata 2025-mi Nunatta Karsianut sunniutissat tamarmiusut 120 millionit koruuniussasut.

– Naalakkersuisut aappaagumut aningaasanut inatsit ukioq manna novembarimi akuersissutigineqarpat, Nunatta Karsiani annertuumik amigartooruteqalissapput, ilaatigut teknikkikkut nalunaarutit pissutigalugit. Tamatumani Nunatta Karsianut isertitat ikileriartussatut naatsorsuutigineqartut ilanngunneqanngillat. Namminersornerullutik Oqartussat aningaasaqarnikkut kingunerisinnaasaanik nalunaaruteqaratik tusarniaanermik ingerlatsinerat isumaqanngilaq, Miki Brøns oqarpoq.

Naalakkersuisut aalisarnermut inatsit nutaaq aqqutigalugu ilaatigut kilisaatit “Disko-karsimi” tunisassiornissamut akuersissutaat atorunnaarsinniarpaat, piumasaralugulu aalisarfiusumi pisatik tamaasa nunami tunisassiorfinnut tunisassagaat. Ukiuni kingullerni pineqartumi tamaani ukiumut 9.000 tonsinik aalisartoqartarpoq.

- Politikerit aalisarnermut atugassarititanik taama annertutigisumik allannguiniarnerat ernummatigaarput, tamannalu Aalisarneq pillugu Ataatsimiititaliarsuup nalunaarusiaani allaatigineqanngilaq, Miki Brøns oqarpoq.