…Qaqortumili suliffeqarfiit pinngitsoorsinnaanngilaat

Umiarsuit takornariartaatit angallaffiat nalleqqavoq, Kalaallit Nunaatalu umiarsualiviinut ullut tamaasa tulattoqartarpoq.

Takornariartitsineq tamanna ukiorpassuarni nunarsuaq tamakkerlugu oqallisigineqarlunilu isornartorsiorneqarpoq, aamma nunatsinni, ukiuni kingullerni umiarsuit takornariartaatit Kalaallit Nunaanni umiarsualivinnut tulattartut amerliartuinnarmata.

Ukioq manna aamma taamaappoq, umiarsuarnillu takornariartaatinik tikittut aatsaat taama amerlatigisut Visit Greenlandip nalunaarsuiffiani 720-t missaanniipput.

Qaqortumi namminersortut arlallit umiarsuarnut takornariartaatinut taakkununngalu ilaasunut niuernermik ineriartortitsinissamut periarfissarsiorsimapput. Ilarpassui aningaasarsiorniarlutik umiarsuarnik takornariartaatinik takornariartitsisarnertik pisariaqartippaat.

Suliffeqarfiit taakkua ilagaat Greenland Sagalands, angallamik angalatitsinernik, pisuttuartitsinernik, kaffillernernik Qaqortullu talittarfiani tammajuitsoorniarfimmik aaqqissuussisoq. Suliffeqarfiup isertitami 90 procentii umiarsuarnit takornariartaatinit pissarsiarisarpai. Greenland Sagalandimi pisortaq Pitsi Høegh oqarpoq.

- Taakkoqartinnagu ingerlasinnaanngilagut. Umiarsuit takornariartaatit mikisut kisiisa aamma isumalluutigisinnaanngilagut. Umiarsuit anginerit uagutsinnut pingaaruteqarluinnarput, taakkunanngami isertitatta 90 procentii pissarsiarisarpagut, Pitsi Høegh oqarpoq.

 Oqimaaqatigiissaarinissaq pingaaruteqartoq

Naalakkersuisut takornariaqarnermut inatsit nutaaq ukioq manna saqqummiuppaat, tassani pilersaarutaavoq umiarsuit takornariartaatit Kalaallit Nunaata imartaani kiffaanngissuseqarnerat killilersorneqalissasoq. Sumiiffinnik ilaatigut immikkoortitsinikkut. Qaqortumi umiarsuarnik takornariartaatinik 60-init amerlanerusunik septembarip qiteqqunnerata tungaanut tikittoqarnissaa naatsorsuutigineqarpoq, umiarsuillu arlallit 3000-it sinnerlugit ilaasoqassallutik – amerlassutsit Qaqortumi innuttaasunik marloriaatinngortitsisussaq. Umiarsuit anginerusut ilagaat, Caribbean Princess, 3114-inik ilaasoqartoq, taanna Qaqortumut sapaatip akunnerani kingullermi tikippoq.

- Ulaperujussuarpugut. Angallassinerit amerlasoorpassuit tunivagut, angallassinerillu tamakkingajavillutik inniminnerneqarput. Ulloq ulapaarfioqaaq, Pitsi Høegh oqaluttuarpoq.

Umiarsuit takornariartaatit tikinnissaannut pilersaarusiorluartariaqarpoq, pisortallu erseqqissarpaa oqimaaqatigiissaarinissaq pingaaruteqartoq.

- Pisiniartoqarluarnissarput qulakkeerniaannarlugu soorunami umiarsuarnik angisuunik ulluni tulleriinni tikittoqassanngilaq. Illoqarfiup pisiniarfiutai naammanngippata tamanna kiffartuussinitsinnut ajortumik sunniuteqassaaq, Pitsi Høegh oqarpoq.

Suliffeqarfiit allat umiarsuarnik takornariartaatit aallaavigalugit ineriartortitsisimasut tassaapput aallarnisaasut Martin Kristensen aamma Malik Lynge Petersen. Ukioq manna suliffeqarfitsik Qummut Tours Qaqortumiittoq, umiarsuarnik takornariartaatinik illoqarfimmi bussertitsisartoq, siullermeerlutik ingerlappaat.

- Ingerlalluarpoq. Bussit arlaleriarluta ulikkaartarpagut, sullitattalu aninissartik soqutigilluarpaat, Martin Kristensen, aamma Qaqortumi Nuummilu Kûnguak’ cafémik ingerlatsisoq, oqarpoq.

Oqaloqatigiissutigineqartariaqartoq

Qaqortumi umiarsualiviup eqqaani Sikkersoq Hansen pisiniarfiuteqarpoq, aamma taanna takornarianik isumalluuteqarpoq.

- Sikorsuaqarnera pissutigalugu umiarsuarpassuit suli tikinngillat, tamannalu soorunami aningaasatigut malugineqarsinnaavoq, Sikkersoq Hansen, Amazing Tours Greenlandimik piginnittoq oqarpoq.

Umiarsuarnik takornariartaatinik takornariartitsinerup siunissami qanoq ineriartortinneqarnissaa pillugu inuussutissarsiortut politikkerillu oqaloqatigiissutigisariaqaraat Martin Kristensen isumaqarpoq.

- Inuiaqatigiittut umiarsuit qanoq pitsaanerpaamik atorsinnaanerivut ilinniartariaqaripput isumaqarpunga. Periarfissaq atorluarlugu pitsaanerpaamik pissarsiniarsinnaavugut taavalu takornarianut soqutiginartunik neqerooruteqaatigaluta.

Umiarsuarpassuit inuiaqatigiinnut ajornartorsiutaanngitsut Pitsi Høegh isumaqarpoq.

- Inuit ilaasa umiarsuarnik tikinneqaraangatta inuiaqatigiit kulturerpullu illersortariaqartut mianersoqqussutigisarpaat, kulturerpulli ima ineriartorsimatigaaq umiarsuarnit takornariartaatinit aserorneqarnaviarani. Aamma ilaasut tamarmik nunamukarneq ajorput.

Umiarsuarnit anginerusunit Martin Kristensen aamma aningaasarsiornerpaasarpoq.

- Umiarsuarnut takornariartaatinut angisuunut isumaga allanngortippara, taakkumi mikinernit Kalaallit Nunaannut iluaqutitaqarnerummata. Amerikamiut umiarsuaat angisuut inuiaqatigiinnut aningaasanik amerlanerpaanik iluanaarutaasarput, Martin Kristensen oqarpoq.

Siumut isigineq

Ilulissani umiarsuarnut takornariartaatinut akerliussutsimik takutitsinerit arlallit aasaq manna pipput. Takornariartitsisartut akerliussutsimik takutitsinernik aaqqissuussisut isumaqarput Ilulissani takornarianik sullissisartut amerlanerit nunanit allaneersuusut.

- Ilulissani inuit isummernerat soorunami pitsaasuuvoq, kisiannili inuussutissarsiuteqartuusugut oqaloqatigiinnerusariaqarpugut aaqqiissutissarsiortariaqarlutalu, Martin Kristensen oqarpoq.

- Periaaserinnerunngikkutta immitsinnut ajoqusersinnaavugut.

Pitsi Høeghip siunissami nunami misigisassat samminerujumavai, imaani sammisartakkat kisiisa pinnagit.

- Mittarfik ammarpat ilimagaara takornariat ataasiakkaat amerlanerusut tikittalissasut. Takornarialerisarnerput sivitsussavaat, sikorsuit pissutigalugit umiarsuarnik tikinnissaq ajornakusoortarpoq, timmisartunilli tikinnissaq ajornanngilaq. Taamaalilluta takornariat amerlanerusut tikikkumaarpaat, oqarpoq.

- Ullumikkulli umiarsuarnik takornariartaatinik takornariartitsineq kangerlunnilu angalanerit tuniniaanermik aningaasarsiornikkullu pingaarnerpaapput, oqarpoq.