Raajartassiissutinut siunnersuutit suli ikiliartortut

Kitaani raajartassiissutissanut siunnersuut ukiuni kingullerni appariartuinnarsimavoq, 2026-mullu siunnersuummi aamma taamaappoq.

NAFO-p ilisimatusarnermut siunnersuisoqatigiivi Kitaani 2026-mi 75.000 tonsinik raajarniartoqarsinnaasoq siunnersuutigaat, tassa 2025-mut sanilliullugu 5.000 tonsinik ikinnerusunik. Pinngortitaleriffik ataasinngornermi ilisimatitsivoq.

- Pisassiissutissatut innersuussutaasut kisitsisilerneqarsimapput naatsorsuinerit aallaavigalugit, naatsorsuinernilu takuneqarsinnaavoq raajaqassuseq amuneqartartullu amerlassusaat ikiliartortut, taakkununngalu ilaliullugu ukiuni kingullerni saarulleqarnerulernikuuvoq, taakkualu raajatorluarnissaat naatsorsuutigaarput, Pinngortitaleriffik allappoq.

Raajat avammut niuernermi pingaaruteqaqisut

Kitaani raajarniarnermut siunnersuut 2021-mi 2022-milu qaffasinnerpaavoq, taamanikkut siunnersuummi 115.000 tonsit innersuussutigineqarlutik. Tamatumali kingorna siunnersuutigineqartoq 34 procentimik appariarsimavoq.

Raajat pillugit siunnersuineq Kalaallit Nunaata aningaasaqarneranut pingaaruteqarluinnarpoq, tassami umiarsuaatileqatigiiffiit raajanik qanoq amerlatigisunik pisaqarsinnaanissaannut aalajangiisuusarami. 2024-mi raajat avammut tunisat 2,4 milliardit koruuniupput, tamannalu avammut tunisat tamarmiusut katillugit 5,2 milliardit koruuniusut affangajaralugu.

Pinngortitaleriffik naapertorlugu tamanna killormut saassinnaavoq, oqaluttuarisaanermimi taama misigineqarnikuuvoq:

- Assersuutitullu oqaatigisinnaavarput Nunatta Kitaani ullumikkut raajaqassuseq ukiut qulit matuma siornatigutulli inissisimalluinnartutut oqaatigineqarsinnaammat. Siunnersuinermi 2025-meersumi 60.000 tonsit innersuussutigineqarsimapput, ukiunilu tulliuttuni peqassuseq siunnersuinerlu 115.000 tonsinngorsimapput, tassa 2021-mi aamma 2022-mi. 

Tunumi siunnersuutit affaannanngortut

Tunumi aamma raajartassanut siunnersuutit ikilipput.

Raajartassat 2026-mi 500 tonsinit amerlanerussanngillat, tassa 2025-mut siunnersuutigineqartut affaat:

- Tunumi nalunaarsukkat takutippaat raajat 2025-mi oqimaassusinngortikkaanni appasittorujussuarmi inissisimasuusut. Raajaqassutsimullu sanilliullugu peqassutsimut naleqqiullugu annertunerpaamik kilisattoqarpoq. Biologit peqassutsimik misissuinerisa aammalumi raajarniartut nalunaarsugaat malillugu raajaqassuseq sumiiffimmi aalajangersimasuminnerusoq, tassalu Dohrn Bankemiinnerusuuvoq.

Siunnersuutit Naalakkersuisunut 2026-mi pisassiissutinut inaarutaasumik aalajangiisussanut ingerlateqqinneqartut Pinngortitaleriffik ilisimatitsivoq.