RAL-ip Arctic Umiaq Line pissutigalugu amigartooruteqarnissani sipaarniarnissanilu naatsorsuutigaa

Royal Arctic Linep (RAL) ukiup affaanut nalunaarusiani pingasunngormat saqqummiuppaa, suliffeqarfissuarlu tamarmi 67 million koruuninik amigartooruteqarpoq.  Tamanna missingersuutigineqartumit 8 millionit koruuninik pitsaanerusoq, nalunaarusiami ilisimatitsissutaavoq.

Namminersorlutik Oqartussat umiarsuaatileqatigiiffiata nassiussat kinguariarfiunerat aqqusaarpaa, aamma Arctic Umiaq Line iluatsitsiffiunngitsumik periusissiaqarnermigut ilaassutissanik tuniniaanerup malunnaatilimmik appasinnera aqqusaarneqarpoq.

- Angalanissanik tunisaqanngitsoorneq tunngavigalugu Arctic Umiaq Linemut tunngatillugu 2024-mi ataatsimut DKK 15-20 millioninik amigartooruteqarnissaq naatsorsuutigineqartariaqarpoq, ukiup affaanut nalunaarusiami allassimavoq, Arctic Umiaq Linellu aningaasaqarnera sapinngisamik sukkanerpaamik iluarsiniarlugu ingerlatseqatigiiffiimmi pisortamik nutaamik atorfinitsitsisoqartoq naqissuserneqarluni.

- Ingerlatseqatigiiffiup pisortaqatigiivisa ingerlatseqatigiiffimmi pingaarnerusumi angusat kisiisa eqqarsaatigalugit naammagisimaarinnipput, ajoraluartumilli oqaatigisariaqarlugu ingerlatseqatigiiffiutigisami Arctic Umiaq Linemi pitsaanngitsumik ineriartortoqarnera suliffeqarfissuup 2024-mut tamarmut angusaanut pitsaanngitsumik kinguneqassasoq, ukiup affaanut nalunaarusiami allassimavoq.

Soraarnerussutisiassanut akiligassat annertuut

Arctic Umiaq Linemi unammilligassat sapaatip-akunnerani kingullermi aviisimi Sermitsiami allaaserineqarput, RAL-illu ukiup affaanut nalunaarusiaani aamma tamanna erserpoq, RAL-immi Arctic Umiaq Line pigigamiuk.

Arctic Umiaq Linemi ajornartorsiutit saniatigut aamma atorfilittat soraarnerussutisiaannut 8 millionit koruuninik immikkut akiligassaqalerneq RAL-ip eqqugaaffigisimavaa.

- Ilassutitut akiliuteqarnermut pissutaasoq tassaavoq pisussaaffiit pineqartut Danmarkimi akissaatit pillugit isumaqatigiissutit ingerlatseqatigiiffiup sunniuteqarfiginngisai pissutigalugit DKK 8 millioninik nalimmassarneqarsimanerat, RAL allappoq.

Assartukkat kinguariarfiunerat

Assartukkat kinguariarfiuneranut tunngatillugu ukiup affaani siullermi assartukkat 1 procentingajannik ikileriarsimasut RAL allappoq.

Kinguariarferujussuilli uku eqqaaneqanngitsoorsinnaanngillat:

- Aningaasaqarnikkut unikaallanneq aningaasaliinikkut ingerlatat appasinnerunerannik kinguneqartoq, suliniutillu angisuut pingaartumik Nuummi naammassiartulersut nassiussat immikkut ittut 30 procentit sinnerlugit kinguariarfiunerannik kinguneqarpoq. Assartukkat avannamukartut 9 procentinik siuariarput. Tamatumunngalu pissutaanerpaasoq tassaavoq Nuuk Imerup tunisassiornerata atorunnaarnerata kingorna immiaaqqat sodavandillu maanna Imarpik ikaarlugu assartorneqartalernerat

- Peqatigisaanilli sineriak sinerlugu nassiussat 7 procentinik kinguariarnerannut aamma pissutaanerpaavoq, puunik utertittakkanik assartuisarneq siornatigumut naleqqiullugu annikinnerulermat, RAL allappoq.

Ukiup sinneranut amigartooruteqarnissaq naatsorsuutigineqartoq

RAL-ip ukiumut tamarmut missingersuusiaani millionit koruuninik sinneqartooruteqarnissaq naatsorsuutigisimavaa.

Maanna missingersuutigineqartutut 15-20 millionit koruunit akornanni amigartooruteqarnissaq naatsorsuutigineqarpoq. Amigartoorutit ikilisinniarlugit sipaarniutit arlallit aallartinneqarput:

- Ajorseriaataasoq Arctic Umiaq Linep 15-20 millionit koruuninik amigartooruteqarluni angusaqarnissaanik pissuteqarpoq kiisalu immikkut ittumik soraarnerussutisianut pisussaaffeqarnermik annertuumik, angusanut 8 millionit koruuninik pitsaanngitsumik sunniuteqartumik.

- Sipaarniuteqarnissamut pingaarnersiuinissamullu suliniutit aallartisarneqareersut ilanngaatissat ilanngaatigereerlugit DKK 8-9 millioninik kinguneqarput ingerlatseqatigiiffimmilu pingaarnerusumi Royal Arctic Linemi pingaarnertut suliassamik tunniussinermut pitsaasumik angusaqartitsillutik, ukiup affaanut nalunaarusiami RAL allappoq.