Reykjavikimi naapeqatigiinneq

Aalajangiisartut, politikerit, atorfillit, ilisimatusartut allallu issittumik soqutigisallit 3000-init amerlanerusut ukiumoortumik Reykjavikimi ataatsimeersuarnermi Arctic Circle Assemblymi sapaatip-akunnerani kingullermi naapipput.

Ukiumoortumik aaqqissuunneqartartumi Issittup siunissaani periarfissat sammineqartarput, nunat akimorlugit oqaloqatigiinnissamut suleqatigiinnissamullu kajumissaarisoqartarluni. 

Ukioq manna pilersaarut 71-inik quppernilik assigiinngitsunik sammisaqarfiuvoq, soorlu issittumi unammilligassalimmi nukissiuuteqarneq, niuerneq pillugu oqallinneq, eqqumiitsulianik saqqummersitsineq, filmfestivali, teknologiimik saqqummersitsineq saqqummiussallu assigiinngitsut 250-init amerlanerusut. 

Politiki pillugu saqqummiineq

Kalaallit peqataasut amerlaqaat. Nunanut allanut tunngasunut naalakkersuisup, Vivian Motzfeldtip (Siumut), issittumi periusissiaq ”Pineqartilluta avaqqutaarineqartassanngilagut" ammaanersiornermi oqalugiarnermini sammivaa, aamma ataatsimiinnerni mikinerusuni arlalinni oqalugiarpoq. Aamma nunalerinermut, imminut pilersornermut, nukissiutinut avatangiisinullu naalakkersuisoq, Kalistat Lund (IA) arlaleriarluni oqalugiartarpoq, ilaatigut Issittumi brintimik toqqorsivissaqarsinnaaneq aamma Kalaallit Nunaata nukissiuutinik mingutsitsinngitsunik periarfissai pillugit saqqummiilluni. Inuit Ataqatigiit sinnerlugit Folketingimut ilaasortaq, Aaja Chemnitz, ilaatigut LGBT+-it Issittumi pisinnaatitaaffii aamma issittumi inatsisartuni ilaasortat attaveqaqatigiinneranni suleqatigiinneq pillugit oqalugiarpoq.

 – Inuit taama amerlatigisut naapillugit nuanneqaaq, ukioq mannalu inuusuttut arlallit oqalugiarput. Issittumi ajornartorsiutit soqutigigaat takullugit nuanneqaaq. Silap pissusiata allanngoriartornera aamma tarnikkut peqqissuuneq pillugit oqallinneq immikkut eqqaarusuppakka, tassani Miyuki Daorana, Qaanaameersoq Tromsømi universitetimi ilinniartoq peqataavoq. Inuusuttut silap pissusiata allanngoriartornera ilutsigalugu kinaassusaat qanoq allanngoriartornersoq taassuma oqaluttuaraa, isiginnittaasaalu soqutiginarpoq. Kalaallit Nunaat Reykjavikimi assigiinngitsorpassuartigut peqataalluarpoq, Aaja Chemnitz oqarpoq. 

Kalaallit Nunaanneersut amerlasuut

Kalaallit Nunaannit peqataasut ilaat oqalugiartut tassaapput siunnersorti Kuluk Lyberth, Nasiffimmi immikkoortortaqarfimmi pisortaq Rasmus Leander Nielsen, ilisimatusartoq Ulrik Pram-Gad, Destination South Greenlandimi pisortaq Miki Jensen aamma Ilisimatusarfimmi ilisimatusartoq immikkoortortaqarfimmilu pisortaq Aviaja Lyberth-Hauptmann.

Aamma Nuummi Dronning Ingridip Napparsimmavissuani nakorsaaneq Karsten Rex, ilisimatusartoq Mette Motzfeldt Jensen, naalakkersuisoqarfimmi pisortaq Mininnguaq Kleist, politikeri Pipaluk Lynge, politikkikkut siunnersorti Mira Kleist, ilisimatusartoq Qivioq Løvstrøm, Siumut sinnerlugu Inatsisartunut ilaasortaq, Doris J. Jensen, Tusagassiivimmi Sermitsiami pisortaq Masaana Egede aamma Kommuneqarfik Sermersuumi borgmesteri Avaaraq S. Olsen. Arctic Circle Businessimi pisortaq Jesper Schrøder aamma ataatsimiinnermi peqataavoq, aamma DTU Sisimiuni siunnersorti pisortaq Niels Hoedeman, Visit Greenlandimi pisortaq Helene Lyberth Steffensen, Qeqqata Kommuniani suliniutinut pisortaq Laust Løgstrup, Campus Kujallermi takornariaqarnermut ilinniarfiup pisortaa Aaju Simonsen aamma ilisimatusartoq Morten Rasch. Aamma inuussutissarsiortunit arlalinnit aallartitat peqataapput, ilaatigut Nunagreenimi pisortaq Aviaaja Karlshøj Knudsen, Air Greenlandimi pisortaq Jacob Nitter Sørensen, Nalik Greenlandimi pisortaq Thomas ”Tyt” Mogensen, siunnersorti Karl Inuk Faurschou, Royal Arctic Linemi pisortaq Niels Clemmensen, Sulisitsisuni pisortaq Christian Keldsen, 60 North Greenlandimi pisortaq Malik Vahl Rasmussen aamma Qeqertalik Business Counsilimi pisortaq Gerth P. Olsen.