UUMATITSIVISSORLUNI SAARULLINNIARNEQ
RG aalisartunut: Saarullinnik tunisilluarsinnaavusi
Nunarsuarmi pisisartut akornanni saarullinnik sanigorsarnikunik piserusunneq annertuvoq. Kisianni nunatsinni aalisakkeriviit saarullinnik ulluni qulini uumatitsivinniissimasunik amigaateqarput, tassami aalisartut amerlanerit umiarsuaq milluaatitalik utaqqerusunnerusarmassuk saniatigut saarulliit suliffissuarmut tunisinnaagaluarlugit, taamaalillunilu uumatitsivinni toqusoornissamut aarlerinartorsiorsinnaallutik.
Assimiittut saarulliit uumatitsivimmiuunngillat sanigorserneqarnikuunatillu, taakkuli saarulleqataat Nunatsinneersut uumatitsivinnilu ulluni qulini sanigorsersimasut nunarsuarmi piumaneqarluartorujussuupput. Royal Greenland aalisartunut kaammattuivoq, umiarsuaq Tuneq utaqqiinnartarnagu saarulliit ilaat nunami suliffissuarnut tulaattassagaat.
Assiliisoq: Lars Laursen
Royal Greenlandip aalisakkeriviini amigaataapput, saarulliit "Nutaaq"-mik taaneqartartut, tassa saarulliit uumatitsivinni sanigorsarsimasut. Pisisartunimmi piumaneqarnerat annertuvoq:
- Aaqqissuussineq Nutaaq eqqortuuvoq, saarulliimmi taakku piumaneqarnerat annertuvoq. Kisianni sinerisssami nerpilerilluni aalisakkeriviini amigaatigaagut, Maniitsumiinnaanngitsoq. Taamaattumik aalisartunut kaammattuutigaarput umiarsuaq saarullinnik uumasunik aallertartoq utaqqiinnarnagu, saarulliit ilaat aalisakkerivinnut tulaanneqartassasut, taamak oqarpoq saarullinnik saattussanullu ingerlatsinermi pisortaq, Sten Sørensen Royal Greenlandimeersoq.
Aalisariaaseq Nutaaq tunngavigalugu saarullinniartarnerup aallartinnginnerani, aalisartup Royal Greenlandillu akornanni isumaqatigiissusiortoqartarpoq. Isumaqatigiissummi takuneqarsinnaavoq qanoq iliortoqassanersoq aammalu akisussaaffeqarnerup inissisimanera qanoq ittuunersoq, aalisarnerup taamaattup ingerlanneqarnerani.
- Taamatut saarullinniarnerup siuliani, aalisartunut tikeraarpugut, nunaqarfinni illoqarfinnilu. Taamaalilluta aalisartut oqaloqatigisarpagut qanoq aalisartoqassanersoq. Aalisarneq aallartikkaangat uumatitsivinnillu ulikkaartoqaraangat, taava ilisimatittarpagut missiliorlugu qaqugu saarulliit umiarsuarmit saarullinnik uumasunik milluaatitalimmit Tunermit aaneqassanersut, Sten Sørensen nassuiaavoq.
Illoqarfinni aalisakkerivinnut tunisineq aamma periarfissaavoq
- Kisianni aalisarluarfimmi, umiarsuup aallertup utaqqinarsinnaanera naatsorsuutiigisariaqarpoq, tamannali aamma allatut aaqqissuunneqarsinnaavoq, tassa umiarsuaq utaqqiinnanngikkaluarlugu saarulliit ilai ulluni qulini uumatitsivimmiissimasunik ammartereriarluni nunami suliffissuarmut qaninnerpaamut nerpileriffittalimmut tulaakkiartorneqarsinnaapput. Tassami piumasaqaatitutaavoq ulluni qulini saarulliit uumatitsivinni sanigorsarsimanissaat, kiisalu niaquersimanissaat erlaveersimanissaallu.
Aalisartoqarpoq periarfissamik atorluaasunik, taamaalillutillu aalaakkaasumik isertitaqarnissartik isumannaartarpaat, sanilliutissagaanni umiarsuup Tunerup utaqqinerani isertitaqarunnaartarnermut tamanna pitsaasuuvoq.
- Aalisartumut aalisakkanillu tunisassiornermut iluaqutaavoq, aalisartoq pilersaarusiortarpat qanoq aalisakkanik tunisisarnerminik agguataarinnittarnera. Assersuutigalugu pingasunik uumatitsiveqaruni, uumatitsivimmiittut ataatsit nunami suliffissuarmut tulaassassatut suliarisinnaavai uumatitsiviillu marluk sinneruttut umiarsuup aallernissaanut utaqqissullugit. Tamanna aalisartumut inuttaanullu isertitaqarnerunermik malitseqassaaq, aamma tunisassiorfimmi sulisunut suliassaqarnerulersitsissaaq kiisalu pisisartut amerlanerusunik saarullissisinnaalissapput, Royal Greenlandimi saarullinnik saattussanillu ingerlatsinermi pisortaq, Sten Sørensen nassuiaavoq.
