Royal Arctic Line aqutsisunik ikilisaavoq

Royal Arctic Line-mi siulersuisut aalajangerput aqutsisut ikilisinneqangaatsiassasut, taamaalilluni aqutsisut arfineq-marlunnik inuttaqarsimasut maanna pingasuinnanngortinneqarput.

Royal Arctic Line-mi nutaamik aqutsisoqarfik maanna CEO Niels Clemensen, Deputy CEO Aviâja Lyberth Lennert aamma CFO Jørgen Aqe Møller-imik ilaqarpoq.

Umiarsuaatileqatigiiffiup pisortarisimasaata Verner Hammekenip aqutsisut amerliartortissimavai. RAL-imi siulersuisut maanna aalajangerput aqutsisut ikinnerulertariaqalersut.

Umiarsuaateqarfiup nittartagaani allassimavoq pisortanngortut tassaasut pisortaaneq Niels Clemensen, pisortaanerup tullia Aviâja Lyberth Lennert kiisalu aningaasaqarnermut pisortaq Jørgen Aqe Møller.

- Ingerlatseqatigiiffiup pisortaqatigiivini ilaasortaasimasut suliassaqarfigisaminnut pisortatut ingerlaannassapput, ingerlatseqatigiiffiullu aqutsisoqatigiivisa ulluinnarni aqunneqarnerannut aamma ilaaginnassallutik. Aqutsisoqatigiinni ilaasortat sinneri tassaapput Umiarsualerinermut pisortaq Anders Bay Larsen, Tuniniaanermut pisortaq John Aage Nielsen, Ingerlatsinermut pisortaq Aputsiaq Lynge, Qarasaasiaqarnermut pisortaq Gustav Fischer kiisalu Suliffeqarfissuarmi sulisoqarnermut pisortaq Bebiane Boye Hansen, RAL-imit oæoso,atitsissutigineqarpoq.

Inissititerneq

Umiarsuaatileqatigiiffiup ataatsimeersuarnerata kingorna siulersuisut maajip 29-ani inissipput, tassanilu Inooraq Brandt siulittaasup tulliatut qinerneqarpoq, tassungalu peqatigitillugu toqqaanermut akissarsianullu ataatsimiititaliamut ilaasortaalerluni.

- Flemming Drechsel siulersuisut kukkunersiuinermut ataatsimiititaliaannut siulittaasunngorpoq Minannguaq Zeebilu ataatsimiititaliami ilaasortanngorluni. Siulersuisunut ilaasortat sinneri tassaapput Barbara Agersnap, Jóhanna á Bergi kiisalu sulisut qinigaattut siulersuisunut ilaasortat Eydun Simonsen, Laust Vestergaard aamma Tina Lange Olsen, umiarsuaatileqatigiiffimmit namminersorlutik oqartussanit pigineqartumit ilisimatitsissutigineqarpoq. 

Powered by Labrador CMS