- Ingerlatseqatigiiffik
aqutsisuni allaanerusumik pisariaqartitsilerpoq.
Royal Greenlandip
atorfissaqartitaa tassaavoq pisortatut inuussutissarsiummillu
misilittagaqarluartoq Kalaallit Nunaannilu najugaqartoq.
- Ingerlatseqatigiiffik
aqutsisuni allaanerusumik pisariaqartitsilerpoq.
Royal Greenlandip
atorfissaqartitaa tassaavoq pisortatut inuussutissarsiummillu
misilittagaqarluartoq Kalaallit Nunaannilu najugaqartoq.
- Tamatuma
saniatigut aqutsinermi misilittagaqarluartoq, Royal Greenlandimi siulersuisut
siulittaasuat Maliina Abelsen Sermitsiamut sapaatip akunnera kingulleq oqarpoq.
Aap, Royal Greenlandip pisortaanerata
erngertumik atuutilersumik soraarsitaaneranut nassuiaatitut tusarparput. Susanne
Arfelt Rajamandip ukiut marluinnaat atorfeqareerluni soraarsitaariasaarnera
eqqumiippoq.
Kajumissuserinngisaminik soraarsitaasoq
Royal Greenlandimi pisortaaneq ilaatigut
Malmømiit Nuummut nuukkumanngimmat Susanne Arfelt Rajamandip soraarsinneqarnera
ilumut siulersuisuniit aalajangerneqartutut isikkoqarpoq.
Tassunga ilanngullugu Royal Greenlandip
2024-mi naatsorsuutinik saqqummersitsinissaa sioqqutilaarlugu
soraarsinneqarnera erseqqippoq. Aalisakkerinermik suliaqarfimmeersumiit,
issuarneqarumanngitsumiit, tusakkat naapertorlugit naatsorsuutit
amigartoorfiussarpasipput.
Paasissutissiisoq naapertorlugu Royal
Greenlandip Danmarkimi ingerlatseqatigiiffia Norgemi ingerlatseqatigiiffimmut
akuersissummik, saattuarniarnissamut akuersissutaasumik, annaasaqarsimasumut
aningaasanik atornermit 100 millionit koruuninik annaasaqarsimavoq, taamaalillunilu
aalisariutituani tunisariaqalerpaa.
Qanorluunniit ikkaluarpat Arfelt Rajamandip
kajumissuserinngisaminik soraarsitaanera siulersuisut killiliilerannik
pissuteqarpasippoq. Susanne Arfelt Rajamandip najugaa aammalu suliffeqarfissuup
2024-mi naatsorsuutai annertuumik amigaartoorfiussarpasittut tamaasa
pissutigalugit. Suliffeqarfissuup 2024-mi ukiup affaa siulleq amigartoorutai 59
millionot koruuniupput. Amigartoorutit 2023-mi ukiumoortumik naatsorsuutini 211
millionit koruuniupput.
Royal Greenlandilli arnani siullersaalluni
pisortaaneranik suleqateqarunnaanissamik aalajangerneq pisortaanermik allanik
piginnaasalimmik pisariaqartitsinermik taamaallaat pissuteqarneranik Maliina
Abelsenip nassuiaataa upperiuminaappoq.
Naalakkersuisut sukannernerulersut
Maliina Abelsenip nassuiaataa
qimakkallalaassavarput.
Suliffeqarfissuarmi aningaasaqarnermut
pisortaq, tunisassiornermut pisortaq siornatigullu tuniniaanermut
pisortaasimasoq ukiorpassuarni Royal Greenlandip allaffiani Aalborgip
eqqaaniittumiinnikuusut ilisimaneqarpoq. Pisortat Kalaallit Nunaannut nunanullu
allanut aallaqattaartarnikooqaat, tamannali Múte B. Egedemut
Naalakkersuisunullu naammanngilaq.
Naalakkersuisut suliffeqarfissuarmi aqutsisut
Kalaallit Nunaannut nuussasut najugaqassasullu Royal Greenlandimi siulersuisut
ukiorpassuarni sukannersumik piumasaqarfigisarpaat. Ulluinnarni aqutsisut
ileqquusumik Danmarkimi, tassa Skandinaviami kilometerinik tusintilikkaanik
ungasitsigisumi, najugaqarlutillu sulisaraluarnerannut taarsiullugu.
Peiruseq taanna Naalakkersuisut
atorunnaarsikkumavaat. Royal Greenlandimi ataatsimeersuarnerni kingullerni
pingasuni Naalakkersuisuni siulittaasoq Múte B. Egede siulittaasullu tullia
Erik Jensen suliffeqarfissuarmi aqutsisut Kalaallit Nunaanniinnissaasa
piviusunngortinneqarnissaa kissaatigalugu, tassa piumasaralugu, ersarissumik
oqaatigisarpaat.
Tatisimaneqangaarneq
Susanne Arfelt Rajamandip ukiuni marluinnarni
atorfeqareerluni soraarsinneqarnera aamma soorunami soqutaanngikkaluamik
periaasermut tunngassuteqarpoq. Naalakkersuisuniit politikkikkut
tatisimaneqarneq suliffeqarfimmi siulersuisut Susanne Rajamandimik
soraarsitsinerannut peqqutaaqataavoq.
Aqutsisut Kalaallit Nunaanniinnissaat
politikkerit piffissami sivitsortumi Royal Greenlandip siulersuisuinut
kimigiisissutigaat. Naalakkersuisut nunatsinnilu suliffeqarfiit annersaanni,
ukiumut 6 milliardit koruuninik kaaviiaartitaqartumi nunarsuarlu tamakkerlugu
2.300-nik sulisulimmi, siulersuisut taamaaliorsimapput, Sermitsiamut
paasissutissiisup oqaatigaa.
Susanne Arfelt
Rajamand Royal Greenlandimi maanna suliunnaarpoq. Siulersuisut
tamanna ukioq manna februaarip qulingani nalunaarutigaat.
Sermitsia Susanne
Arfeltimik apersuinera 2023-mi januaarip 19-ani saqqummerpoq. Pisortaaneq
atorfinitsinneqarami qaammatini arfinilinni siullerni uini meeqqanilu pingasut
ilagalugit Nuummi najugaqassasoq tassani allassimavoq.
- Sulisut ullormi
siullermit ilinniassavakka, tamannalu qilanaareqaara. Inuttut kinaaninnik
tusagaqalaarnissamut periarfissaqassapput, uangalu taakku pillugit
tusagaqassaanga. Nuna tamakkerlugu tunisassiorfinnut tamanut angalallunga
piffissaq annertooq atussavara, kiisalu nioqqutissatta sumut pisarnerat
takuniarlugu pisisartunut pulaassaanga, oqarpoq.
Tamatuma kingorna
isumaqatigiissut malillugu piffissap ilarujussua Kalaallit Nunaanni
sulisartussaavoq - taamaanngippat Malmømi ilaquttanilu illuuteqarfigisaminni
sulisartussaalluni.
Naalakkersuisut Royal
Greenlandimi qullersat Kalaallit Nunaanni najugaqarlutillu sulinissaat pillugu
sakkortuumik piumasaqarmata Susanne Arfelt Rajamand siulersuisullu
tatineqarsimapput. 2023-mi februaarip aallaqqaataani pisortaanertut
atorfinitsinneqarneraniilli.
Mútep
piumasaqaataa
Piumasaqaat tamanna
Naalakkersuisut siulittaasuata Múte B. Egedep suliffeqarfissuup siorna maajimi
ataatsimeersuarnerani erseqqissumik oqaatigaa.
Naalakkersuisut
siulittaasuata ataatsimeersuarnermi oqalugiarnermini Royal Greenlandip
“qullersaqarfia Kalaallit Nunaanniissasoq” aamma “suliffeqarfiup aqutsisui
tamarmik Kalaallit Nunaanniissasut” erseqqissarpaa.
Múte B. Egedep
pisortat suliassaq pingaartippallaanngikkaat paalilerpaa. Naalakkersuisut
siulittaasuata tamanna Naalakkersuisut tungaannit oqariartuutaasoq, pisortallu
tamatuminnga iliuuseqarfiginnittariaqartut erseqqissarpaa.
Múte B. Egedep
pilersaarut pitsaasutut oqaatigaa, naatsorsuutigalugulu aggustimi 2024-mi
piginneqataasunut, Namminersorlutik Oqartussanut, tunniunneqassasoq, aamma
oqarluni “piginnittutut qilanaaraarput ingerlatseqatigiiffimmi aqutsisut
pilersaarutip piviusunngortinneqarnissaa kiisami naammassissagaat”.
Aningaasaqarnermut
pisortaq nammineq soraartoq
Royal Greenlandimi
ukiuni 17-ini aningaasaqarnermut pisortaasimasoq, Nils Duus Kinnerup, 2024-mi
oktobarimi soraarpoq. Taanna marsip aallaqqaataani KNI-mi aningaasaqarnermut
pisortamit naalakkersuisoqarfinnilu pisortaasimasumit Jan Harald
Lynge-Pedersenimit taarserneqassaaq. Lynge-Pedersen ukiorpassuarni Royal
Greenlandimi siulittaasup tulliatut inissisimasimavoq. Aningaasaqarnermut
pisortatut atorfimmi kalaallisut nukittuutut nalilerneqarsimavoq. Nils Duus
Kinnerup ukioq manna decembarip 31-ata tungaanut Royal Greenlandimi
siunnersortitut sulissaaq.
Nils Duus Kinnerup
Kalaallit Nunaannut nuussasoq siulersuisut kissaatigigaluarpaat. Tamannali
nammineq atukkani pissutigalugit ataqatigiissaarsinnaanngilaa. Pisortap
tunuarnera suliffeqarfissuup pisortat amerlanersaat Kalaallit Nunaannut
katersorniarlugit anguniagaanut atatillugu taamaaliortoqarsimasoq Royal
Greenlandip tusagassiuutinut nalunaarummi nassuiarpaa, „Nilsimullu tamanna
nammineq atukkaminut ataqatigiissaarsinnaasimanngilaq“.
Susanne Arfelt
Rajamandip Mikael Thinghuus Københavnimi najugaqartoq pisortaanertut ukiut
marluk matuma siorna kingoraarpaa. Ukiorpassuarni pisortaasimasoq aammattaaq
Naalakkersuisut politikkikkut tatisinerat pissutigalugu suliffeqarfissuarmiit
soraarniarluni aalajangerpoq. Mikael Thinghuus Sermitsiap paasissutissaatai
naapertorlugit Københavnimiit Nuummut nuukkusunngilaq.
Siulersuisuni
ilaasortaq Preben Sunke Susanne Arfelt Rajamandip taartissaata
atorfinitsinneqarnissaata tungaangut pisortaanerugallarpoq.
