Allannguineq:
Royal Greenlandip inissiaatileqatigiiffik tuniniarpaa
Royal Greenland siorna akileraarutit suli ilanngaatiginagit 211 millionit koruuninik amigartooruteqareernerup kingorna inissiaatileqatigiiffimmi Qeqertat A/S-imi piginneqataassutsiminik tuniniaanissaq aalajangerpaa, tamannalu akuerineqarpoq.
Royal Greenland nutaamik qullersaqarfeqalissaaq, qaammatillu 20-nnaat qaangiuttullu inissiaatileqatigiiffik illunik sanaartortussaq tunineqassaaq.
Namminersorlutik Oqartussat ingerlatseqatigiiffiutaat Royal Greenland A/S 2023-mut naatsorsuutit amigartoorfiusut saqqummiunneqarnerata kingorna, ingerlatseqatigiiffiup ingerlalluarnissaa akiitsorpassuillu ikilisarnissaat ingerlatseqatigiiffiup suli sulissutigaa.
Tamanna tunngavigalugu Qeqertat A/S-imi piginneqataassutsit tuniniarneqarput. Tunisineq aalisarnermik ingerlatseqatigiiffimmut 7,5 millionit koruunit missaannik isertitaqartitsisinnaavoq.
Aktiani aningaasaatit 15 millionit koruuniusut
Inissiaatileqatigiiffik maajip 16-iani 2023-mi pilersinneqarpoq aktianilu aningaasaatit 15 millionit koruuniupput. Aalisarnermik suliffeqarfissuup Nuummi qullersaqarfittaassaanik pilersitsinissaq ingerlatseqatigiiffiup suliassaraa.
Royal Greenland A/S-ip inissiaatileqatigiiffik 49 procentimik piginneqataaffigaa, soraarnerussutisiaqalernissamullu aningaasaateqarfiup SISA-p 49 procentimik piginneqataaffigaa sinneruttullu 2 procentit Nirasimit piginneqataaffigineqarput.
Inissiaatileqatigiiffiup Illuut A/S-ip Royal Greenlandip piginneqataassutai pisiarisinnaagai, Naalakkersuisut aggustip 16-ani ataatsimiinnerminni akuersissutigaat.
Merete Lindstrømip, Royal Greenlandimi attaveqaqatigiinnermut pisortap, tunisineq ima nassuiarpaa:
- Ukioq 2023 unammillernartoqareersorlu allanngoriartornitsinnut atatillugu pingaarnertut aalisarnermik aalisakkanillu tunisassianik tuniniaanermik suliaqarnerput ukkatarerusupparput. Taamaattumik Qeqertat A/S-imi piginneqataassutitsinnik tunisinissatsinnik aqutsisut aalajangiipput. Tunisineq aningaasaqarnitsinnut nukittorsaataasinnaavoq suliniutit allarpassuit suliatta saniatigut.
SISA-p aningaasaliineq attatiinnassavaa
Søren Schock Petersen, soraarnerussutisiaqalernissamut aningaasaateqarfimmi SISA-mi pisortaaneq, SISA piginneqataaginnarniartoq sulilu aningaasaliissasoq oqarpoq.
- Isumaqarutta soraarnerussutisiaqalernissamut aningaasaateqarfitsinni atuisartunut naleqquttumik aningaasaliisoqartoq, Illuut A/S-ip inissiaatileqatigiiffimmi amerlanerussuteqarluni piginneqataalernissaa ajorinngilarput, soraarnerussutisiaqalernissamut aningaasaateqarfiup pisortaa Sermitsiaq.AG-mut oqarpoq.
Royal Greenlandip qullersaqarfissaata nutaap sanaartorniarneqarnera suli aallartisarnermiippoq, piffissarlu sivisooq ingerlareerpat Royal Greenlandip qullersaqarfissaa nutaaq, aalisarnermik suliffeqarfissuup inissiaatileqatigiiffimmit attartugassaa, tunisineq iluatsissappat, sanaartorneqassaaq.
Royal Greenlandip ukiumut naatsorsuutaani kingullermi akiitsut ernialersukkat 2,96 milliardit koruuniusimapput. Ukiut marluk ingerlanerini akiitsut taakku 1 milliard koruunit sinnerlugu amerleriarsimapput, tamannalu ingerlatseqatigiiffiup Namminersorlutik Oqartussanit pigineqartup, ukiuni kingullerni kilisaatinut nutaanut aningaasaliissuteqartartup, naatsorsuutaasa sanilliunnerisigut takuneqarsinnaavoq.
