Aalisakkat Kalaallit Nunaata imartaaneersut qaqerlaat nunanut allanut nassiunneqartarnissaat piumaneqarluarpoq. Mittafissuit Nuummiittup Ilulissaniittullu sananeqarnissaasa aallartinnissaanut politikkikkut oqallinnermi tunngavilersuuterpassuit ilaginikuuaat.
Maanna Royal Greenlandip isuma eqqortuusoq uppernarsiniarpaa. Tuukkap Nuummiit siullermeerluni sisamanngormat timmisartuussinerani saarulliit nunatta imartaaneersut qaqerlaat 696 kilonik oqimaassusillit nassiunneqarput. Saarulliit sisamanngormat unnukkut unnuap-qeqqanngilaartoq Kastrupimut minnerup kingorna aqaguani ullaakkut nal. 6.45 aalisakkanik akitsorterinissamut piareeqqaniassammata assartuisartunit Hanstholmiliaanneqarput.
Aalisakkat Kalaallit Nunaata imartaaneersut qaqerlaat nunanut allanut nassiunneqartarnissaat piumaneqarluarpoq. Mittafissuit Nuummiittup Ilulissaniittullu sananeqarnissaasa aallartinnissaanut politikkikkut oqallinnermi tunngavilersuuterpassuit ilaginikuuaat.
Maanna Royal Greenlandip isuma eqqortuusoq uppernarsiniarpaa. Tuukkap Nuummiit siullermeerluni sisamanngormat timmisartuussinerani saarulliit nunatta imartaaneersut qaqerlaat 696 kilonik oqimaassusillit nassiunneqarput. Saarulliit sisamanngormat unnukkut unnuap-qeqqanngilaartoq Kastrupimut minnerup kingorna aqaguani ullaakkut nal. 6.45 aalisakkanik akitsorterinissamut piareeqqaniassammata assartuisartunit Hanstholmiliaanneqarput.
Piffissaliussatut pilersaarut maleqqatarneqarpoq. Assartuisartut siornatigut Hanstholmimiissimanngillat, taamaammallu Hanstholm Fiskeauktion, aalisartut illoqarfeeraanni najukkami Auktionsgade 11-mi naniuminaraluaqisoq nassaariuminaatsippaat.
Qujanartumi akitsorterivimmi pisortaq Jesper Kongsted sulisuilu truckilerlutik piareersimapput. Taava karsit saarullinnik timisartumit tikiussanik imallit lastbiilimiit akitsorterivissuarmut toqqaannartumik eqqunneqarput, tassani pisisartunit alapernaatsunit, saarulliit Kalaallit Nunaata imartaaneersut timmisartuunneqarnerminnik anigorsimanersunik pissangasunit arlalinnit utaqqineqarput.
Qallunaat saarulliutaat akeqqatigigaat
Saarulliit kiilumut 35 koruuniniit 43,50 koruunit tikillugit akilerlugit tunineqarput.
- Saarullinnut taama angissusilinnut akigitinneqartoq ajunngilaq, Hirtshalsimi aalisakkanik akitsorterivimmi pisortaq Jesper Kongsted Sermitsiamut oqarpoq. Saarulliit Nuummeersut tamarmik 0,3 kg-miit 2 kiiluupput.
- Saarulliit qaammatini kingullerni amigaatigineqartarput, taamaammat massakkumuugallartoq akigissaarput – saarulliillu pissarsiarisinnaasagut tamaasa atorniassagatsigit akit ukiutoqartinnagu apparunnanngillat.
- Saarulliilli Kalaallit Nunaata imartaaneersut anginerit piumasinnaavakka. Taava akit qaffasinnerullutillu – aalisakkanik qaqerlaanik Nuummiit nassiussisarneq akilersinnaanerulissaaq, Jesper Kongstad oqarpoq, nangillunilu saarulliit angisuut 7-12 kiiluusut tallimanngormat kiilumut 55,50 koruuneqarsimasut ilisimatitsissutigaa.
Royal Greenlandimiit naammagisimaarinnittoqartoq
Misiliineq Royal Greenlandimiit naammagisimaarneqarpoq. Saarullinnik nunatta imartaaneersunik qaqerlaanik Danmarkimi akitsorterussassatut nassiussineq ingerlalluarpoq, aalisakkerivik Namminersorlutik Oqartussanit pigineqartoq oqarpoq.
- Aalisarneq aalisakkanillu tunisassiorfimmut tulaassineq Royal Greenlandimit ilisimalluarneqarpoq, tamatumalu timmisartup aallarnissaanut naleqqussarnissaa ingerlalluarpoq. Air Greenlandip Blue Water Shippingillu suleqatigilluarnerat erseqqissarumavara, taakku nassiussinermi matumani suleqatitsinnut pikkorissunut suleqataalluarput, Royal Greenlandimi tunisassiornermut pisortaq Lars Nielsen oqarpoq.
- Akigitinneqartut, Danmarkimi aalisakkat qaqerlaat akeqqatigisaat, naammagisimaarpagut. Nassiussineq periutsimi misilittagaqalernissamut ilikkagaqarnissamullu annermik tunnganeruvoq, tamannalu anguarput.
- Akitsorterussinermi saarulliit anginerusut kissaatigineqarnerat tusaatissatut tiguarput, maannamiillu saarullinnik annerusunik nassiussisoqarsinnaavortaaq. Assartuinerli eqqarsaatigalugu saarulliit nassiussagut siulliit mikinerutippagut. Royal Greenlandip Europamiut aalisakkanik qaffasissumik pitsaassusilinnik piumasut pilersorumavai, tunisassiattalu Hanstholmimi soqutigineqarluarnerat nuannaarutigaarput.
- Maanna tunisassiat sorliit timmisartumik nassiutissallugit naleqqunnerunersut paasiniarlugu suliaqaqqissaagut.
Ilippanaateqarluartut
- Mittarfittaap periarfissarpassuaqartitsilernera nuannaarutigeqaarput. Royal Greenlandip tunisassiaanik tuniniaanerup siuarsarnissaanut periarfissiivoq. Nassiussinermi matumani ilikkagaq tassaavoq aalisakkat qaqerlaat ilippanaateqarluarlutillu piumaneqarluarnerat. Suliniummi matumami maannamiit atorluarsinnaasatsinnik misilittagaqalerpugut, Lars Nielsen, aalisakkat qaqerlaat nunani allani niuerfinnut nassiunneqartarnissaat qaqugu ingerlateqqilernieqassanersoq oqarsinnaanngikkallartoq, oqarpoq.
- Nassiussinermi siullermi isumallualerlutalu ilikkagaqarpugut, taakkulu isumaliutiginninnitsinni ilanngukkumaarpagut. Maanna aalisakkanik qaqerlaanik timmisartumik Atlantiku qulaallugu nassiusseqqinnissaq suli ullulerneqanngilaq, nassiussinerlu siulleq taama ingerlalluartigimmat soorunami isumaliutigineqassaaq, tunisassiornermi pisortaq oqarpoq.
Ingerlatseqatigiiffik Nuutaq Seafood aamma aalisariummi Ajsimi naalagaq Jens Peter Larsen ukioq manna siusinnerusukkut saattuanik uumatitanik Nuummiit Kangerlussuaq aqqusaarlugu Hanstholmimi aalisakkanik akitsorterivimmut nassiussipput. Saattuat taamanikkut kiilumut 150 koruunit tikillugit akilerlugit tunineqarput. Tamanna Kalaallit Nunaanni tunisinermi akigitinneqartumiit qaffasinnerungaatsiarpoq.
