Saarullinniarneq ingerlalluartoq

Nunarsuaq tamakkerlugu coronap ajornartorsiutaanerata nalaani Kalaallit Nunaanni aalisakkat assigiinngitsut, ilaatigut saarulliit, akii apparujussuarput. Tamannalu nunatsinni sinerissap qanittuani aalisarnermut aalisakkanillu tunisassiornermut annertoorujussuarmik eqquinerluppoq. Ukiulli kingulliit saarullinnik tunisinermi akit qaffakkiartornerat ilutigalugu saarullinniarneq annertusiartoqqilerpoq.

Ukioq manna sumiiffiit ilaanni saarulleqarluarpoq, saarullinnillu tunisinermut akit ukiut siuliinut naleqqiullugit qaffasinnerunerat pissutaalluni, sinerissap qanittuani aalisartut piffissami matumami qaleralinniarneq unitsikkallarlugu saarullinniartut amerlapput, tamannalu aalisakkanik suliffissuarni ulapaarnermik pilersitsivoq.

Kujataanili saarullinniat Avannaani saarullinnianut sanilliullugu atugaat allaanerusut erserpoq.

Qeqertarsuup Tunua ulapaarfiusoq 

Saarulliit akii ukioq manna qaammatini pingasuni siullerni qaffasinnerat Naatsorsueqqissaartarfiup kisitsisaataani takuneqarsinnaavoq, qaammatinili tulliuttuni akit 4,9 procentimik appariarsimallutik.

Akit appariaallakkaluartut Qeqertarsuup Tunuani sinerissap qanittuani aalisartut amerlasuut aasap ukiallu ingerlanerani saarullinniarput.

Qeqertarsuarmi tunisat amerleriartut 

Ukiup taamaalinerani silap unerisimajunnaarnerani sumiiffiit ilaanni, soorlu Qeqertarsuarmi, qaleralinniarneq ajornakusoornerulertarpoq, taamaaligaangallu saarullinniarneq aallartinneqartarpoq.

Qeqertarsuup eqqaani saarulliit amerlavallaanngikkaluartut umiatsiaararsortut amerlanerpaat maannakkut saarullinniartut, aalisartut piniartullu peqatigiiffianni siulittaasoq Johannes Mølgaard oqarpoq.

Royal Greenlandip Qeqertarsuarmi aalisakkanut suliffissuaataanut tunisinermi saarullik aalisaammik pisaq kiilumut 12,50 koruuneqarpoq, ukiorlu manna saarulliit tulaanneqartut ukiup siulianut naleqqiullugu malunnaatilimmik amerlanerusut suliffissuup pisortaa Mona Lisa Isaksen oqarpoq.

- Ukioq manna aalisartartut tulaassuisut amerlanerugamik saarulliit tulaanneqartut amerlanerupput, oqarpoq.

Saarullinniarneq ingerlalluartoq 

Ilulissani nunaqarfiinilu qaleralinniartoqarnerusarpoq ingerlanneqartarpoq, saarulliilli akiisa ukioq manna qaffasinnerunerat peqqutaalluni piffissami matumani umiatsiaararsortut amerlasuut saarullinniartut, Sinerissap Qanittuani Aalisartut Piniartullu Kattuffianni SQAPK-mi siulittaasoq Anthon Lindenhann oqarpoq.

- Saarulleqarluarlunilu akii aamma qaffannikuupput, taamaattumik saarullinniarnermi atugassarititaasut siornatigumut naleqqiullugu pitsaanerunerat atorluarneqarpoq, oqarpoq.

Ilulissani Halibut Greenland ApS-ip aalisakkanut suliffissuaataani tunisinermi pisortaq Pele Peter Aronsen naapertorlugu, ukioq manna saarullinnik tunisineq pitsaasumik ingerlavoq.

- Piffissami matumani saarulliit tulaanneqartartut qaleralinniit amerlanerupput, tamannalu naammagisimaarparput, oqarpoq.

Saarullik ningittakkanik pisanut pitsaassutsimut tapeq ilanngullugu Halibut Greenlandimi 18,25 koruuneqarpoq.

Rodebay Fish ApS-ip Oqaatsuni aalisakkanut suliffissuaataani qalerallit kisimik tunisaagaluarput, qaammatinili kingullerni umiatsiaararsortut amerliartuinnartut saarullinniarnerat pissutaalluni, tunisat appariangaatsiarsimasut aalisakkeriviup pisortaa Knud Fleischer oqarpoq.

Tunisassiornerullu aalaakkaasumik ingerlaannarnissaa qulakkeerniarlugu misiliutaasumik saarullinnik tunisineq aallartinneqarsimasoq taassuma oqaatigaa.

- Saarullinnik tunisineq misiliutaasumik ingerlapparput tamannalu naammagisimaarparput, taamaattumik siunissami saarullinnik tunisinerup ataavartumik ingerlaannarnissaa ilimanarpoq, taanna oqarpoq.

Oqaatsuni saarullik kiilumut 18,25 koruuneqarpoq.

Kujataani saarullinniat amerlasuut 

Arctic Prime Fisheries Qaqortumi Nanortalimmilu aalisakkanut suliffissuaateqarpoq. Qaqortumi saarullik kiilumut 10 koruuneqarpoq, Nanortalimmilu 11,50 koruuneqarluni. Aalisakkerivinnut taakkununnga saarullinnik tunisineq pitsaasumik ingerlasoq Nanortalimmi tunisinermi pisortaq Arne Kleist oqarpoq.

- Ukioq manna saarullippassuaqarpoq. Inuussutissarsiutigalugu aalisartut aamma saniatigooralugu aalisartut saarullinnik tunisisinnaapput, taamaattumik ullormut 2 tonsit sinnerlugit tulaanneqartarput, tamannalu iluarisimaarparput, oqarpoq.

Royal Greenlandip Narsami aalisakkanut suliffissuaataani saarulliit niaqullit kiiluumut 11,27 koruuneqarput niaquikkallu 14,45 koruuneqarlutik.

Kujataani aalisakkanik tuninersimi kiilumut akigitinneqartup Avannaani akigitinneqartumut sanilliullugu appasippallaartoq, tamannalu allanngortinniarlugu suliniutit assigiinngitsut aallartinneqartariaqartut, Kalaallit Nunaanni Aalisartut Piniartullu Kattuffianni KNAPK-mi siulittaasumut tullinngortoq, Qaqortumilu najugaqartoq Jens Peter Kielsen oqarpoq.