Sikuki Nuuk Harbourip sinneqartoorutini amerligai
Sikuki Nuuk Harbourip kaaviiaartitani 2022-mi 63 million koruuninnit 2023-mi 71 million koruuninut qaffappai. Tamanna ukiumi 13,7 million koruuninik angusaqartoqarneranik kinguneqarpoq, taannalu ukiup siulianit annertunerulaarpoq.
Leiff Josefsen
Ingerlatseqatigiiffik umiarsualivimmik ingerlatsisoq 2023-p ingerlanerani Kangerlussuarmi talittarfimmiut akisussaalersoq, 2023-mut ukiumoortumik nalunaarusiamik saqqummiusseqqammivoq, tassanilu angusaq “iluarisimaarnartutut” oqaatigineqarpoq.
Ingerlatseqatigiiffik Namminersorlutik oqartussanit pigineqartoq 2023-mi naatsorsuutigisamit annertunermik isertitaqarpoq, peqatigisaanillu umiarsualivitoqqap asfalternissaanut aningaasartuuteqartoqanngilaq – suliniut taanna kinguartinneqarpoq.
Umiarsuit takornariartaatit amerlanerit talittut
Umiarsuit takornariartaatit amerlanerit talinnerat naatsorsuutinut iluaqutsiivoq, Nuummilu talittarfimmi ima ulapittoqartigisoq, allaat piffissat ilaanni umiarsuit takornariartaatit kilisaatillu taliffisaat amigaatigineqartarlutik, taamatullu aamma angallatinut minnernut inissaqartitsisarnatik.
- Sikuki 2023-mi COWI siunnersortiliullugu Qeqertami avallermi umiarsualiviup allinissaanut pilersaarutit aallartippai, 2023-llu naanerani piukkunnartussarsiuussereernermi, sanaatortitsisullu suliariumannittussarsiuussereernerani, Rambøll Grønland A/S sanaartortitsisumut siunnersortitut toqqarneqartoq paasissutissiissutigineqarpoq.
Maajimi 2023-mi Kangerlussuarmi talittarfiup ingerlanneqarnera tiguneqarpoq, tassanilu pissutsit umiarsualivimmilu isumannaatsuunissaq kiisalu umiarsualivimmut pulariaani sioranittarnerata kinguneranik, tininngatillugu nalunaaquttap akunnerini arlalinni angalasoqarsinnaasannginneranik ajornartorsiutip passunnissaa qulaanarnissaalu suliarineqarput.
Pulariaq angallaviusinnaasoq
- Pulariap angallaviusinnaanera umiarsuit pajuttut usingiaataannut praminut, umiarsuillu takornariartaatit angallateeraat atorlugit ilaasunik nunamut ikaarussinermi pingaaruteqarpoq. Namminersorlutik Oqartussat Sikuki suleqatigalugu kalaallimik sanaartortitsisumik sioraajaanissamik isumaqatigiissuteqarput, suliassarlu 2024-mi sapinngisamik siusinnerpaamik aallartinneqassasoq paasissutissiissutigineqarpoq. Sioraajaaneq qaammatip tulliani aallartinneqassasoq ilimagineqarpoq.
2024-mut naatsorsuutinut naatsorsuutigisat 2023-mit appasinnerussasut ilimagineqarpoq.
Umiarsualiviup allilernissaanik suliariumannittussarsiuussinissaq Puulukillu Nuuani puttasuliinissaq 2024-mi pissasoq paasissutissiissutigineqarpoq.
Nammineq aningaasaatit
Nammineq aningaasaatit maanna 165 million koruuninik annertussuseqalerput, 11,6 procentimillu annertusineqarput ingerlatseqatigiiffiullu patajaassusaa 26,9 procentiuvoq. Ulloq tamaat sulisut aqqaniliupput – siornarnit marlunnik amerlanerusut, tamannalu Kangerlussuarmi umiarsualiviup passunnissaanik nutaamik suliassaqarnermik patsiseqarpoq.
