Sivisuumik utaqqisoqartarnera Greenland Airportsimit ajuusaarutigineqarpoq
Maannakkorpiaq sillimaniarnermut suliallit immikkut ilinniarsimasut ikinnerusut sulisorineqarput, tamannalu angalaniartut sivisuumik utaqqisariaqarneranik kinguneqarsinnaavoq, Greenland Airports facebookimi saqqummiussami erseqqissaavoq.
Angalasut arlalissuit piffissami matumani attaveqaqatigiittarfiit aqqutigalugit sivisuumik utaqqisarnerit naammaginagu apuussisarput, pingaartumik Nuummi mittarfimmi. Maanna Greenland Airports nalunaarpoq tamanna pissuteqartoq sillimaniarnermut sulisussanik inuttassaaleqineq pissutaasoq, aammalu sulilernissaminnik qinnuteqarsimasut misissorneqarlutillu akuerineqartartussaammata sulilinnginnerminni.
Assiliisoq: Oscar Scott Carl
- Nuummi sillimaniarnermut suliallit massakkuugallartoq immikkut ilinniagallit ikinnerullutik sulipput, sulisullu amerlisarnissaat sukataarutigaarput, taamak Greenland Airports facebookimi allappoq.
Greenland Airportsip erseqqissaatigaa sillimaniarnermut sulisut amigaataanerat angalasut utaqqisariaqarnerannik kinguneqarsinnaasoq, pingaartumik ullup aallartinnerani.
Sulisut nutaat sukumiisumik misissorneqartarput
Greenland Airportsip oqaatigaa unamminartorsiornertik pisariaqavissumik sillimaniarnermut sulisunut nutaanut tunngatillugu oqartussaasunut suliassat saniatigut piffissatuutaasartut.
Tamanna imatut paasisariaqarpoq sulilersussat nutaat tamarmik sukumiisumik misissorneqartartut isumannaallisaanermut piumasaqaataasut naammassisinnaaneraat.
- Aaqqiissuteqarnissaq sukataarupparput naatsorsuutigaarpullu piaartumik ajornanngitsumik eqaatsumillu Nuummiik angallannerup ingerlaqqilernissaa. Ajuusaarpugut angalasunut eqqugaasunut ilungersunartunik nalaataqartunut.
- Angalasunut sunniuteqartunut ajoqutaasinnaasut aammalu paatsuungassutaasinnaasut ajuusaarutigaarput.
- Neriuppugullu sillimaniarnermut piumasaqaatit allanngortissinnaanngisatsinnut paasinnittusi. Timmisartuussinermi sillimaniarneq angalasullu toqqissisimanissaat pingaarnerpaajuaannartussaavoq, Greenland Airportsimit taamak ilisimatitsisoqarpoq.
