Søma unikaallappoq

Sømandsmissionip, Nunatsinni Søma-hotelinik ingerlatsisup, Aasianni Hotel Sømap allilerneqarnissaanik pilersaarutini unitsippaa. Tamanna pivoq Polar Seafoodip aamma Qalut Vonin-ip aalisarnermut inatsit nutaaq pissutigalugu illoqarfimmi aningaasaliisarnerminnik tamanik unitsitsinerisa nalaani.

Taamaattumik Aasianni sanaartornermik suliaqartut ajornartorsiortorujussuanngorpasipput, suliffissat aamma illoqarfimmi sanaartornermik ilinniarfiit amerlasuut eqqugaallutik.

Hotel Søma Aasianniittoq 20-nik initalimmik, ataatsimeersuartarfilimmik, neriniartarfilimmik, isersimaartarfimmik igaffimmillu nutaamik allilerinissaminik pilersaaruteqarsimavoq, pilersaarutilli siorna ukiortaarlu sioqqutitsiarlugu unitsinneqarlutik.

- Aalajangerneq maanna ajornartorsiornermut attuumassuteqanngilaq, tassami allat Aasianni annikillisitsinissaminnik aalajangersimapput, kisiannili suliniutip aningaasatigut imminut akilersinnaaneranik naliliinermik tunngaveqarpoq, Sømandsmissionenimi niuernermut pisortaq Erik Ramballe Hansen nassuiaavoq.

Sanaartorneq akisuallaartoq

- Ukiut marlussuit matuma siornagut aallartinnissamut piareeqqagaluarpugut, sumiiffiulli pilersaarutaa unammillernartoqarmat siorna neqerooruteqarniarluta naatsorsueqqissaarlutalu aalajangerpugut suliniut unitsikkallarniarlutigu. Tamatumunnga pissutaasut marluk tassaapput sanaartornermut atortussat akiisa ukiuni kingullerni qaffarujussuarsimanerat – tamatumalu peqatigisaanik erniat qaffakkiartornerat.

- Erniat qaffasippallaarnerat pingaaruteqarami, taarsersuinissamummi piffissaq atugassaq sivitsorneqartarami – ukiunilu arlaqartuni imminut akilersinnaanera takusinnaanngikkutsigu aallartikkusunneq ajorpugut.

- Tamakku tamaasa ataatsimut isigalugit isumaqarpugut, sanaartornermut atortussat erniallu massakkutut isikkoqartillugit alliliiniarluta maannakkut sapiissuseqanngitsugut. Aammali siunissami ungasinnerusumi Aasianni ingerlatsinerup appariarnissaa naatsorsuutigineqarsinnaasoq ersarippoq. Tamanna ajuusaarutigaarput, illoqarfimmimi innuttaasut inuussutissarsiortullu tapersersuilluarnerat malugiuarnikuugatsigu.

Nuummut Ilulissanullu neriuuteqarnerujussuaq

Aasianni Hotel Sømap allineqarnissaanik suliniut kisimi uninngaannanngilaq, tassami Nuummi Sømap allilerneqarnissaa aamma Ilulissani Sømap isumaginninnikkut sulineranut atasumik akunnittarfiliornissaq aamma uninngaannarput.

- Nuummi Ilulissanilu mittarfissuassat nutaat pissutigalugit annertuumik neriuuteqarpugut - sulilu upperaarput piffissap ilaani aallartissinnaassalluta. Pilersaarutigineqartulli imminut akilersinnaassappata, sanaartornermi atortut erniaat akiilu appartinneqartariaqarput.

Sømandsmissionen novembarimi 2021-mi periusissiamik nutaamik saqqummiussimmat anguniakkat angisuut saqqummiunneqarput, tassani Nuummi, Sisimiuni, Aasianni Ilulissanilu sømandshjemmit Hotel Sømamik taaguuteqalissasut saqqummiunneqarluni – sømandshjemmillu kaffisorniartarfinnik nalunaajaanermilu inunnik isumaginninnermik suliaat ileqquusut suliffeqarfiup immikkoortortaqarfianut namminersortumut nuunneqarlutik“.

Akunnittarfiunera allilerneqassalluni, ilaatigut ininik amerlanerusunik, ataatsimeersuartarfinnik neriniartarfinnillu imigassamut akuersissutitalinnik pilersitsilluni. Ingammik periaasissap ilaa tamanna qisuariarfigineqarluarpoq, sømandshjemimmi akunnittarfittut imigassallerfiusanngitsutut ingerlatsiuaannarsimammata.

Sisimiuni kinguaattoornerit

Suliniuteqarnissamut pilersaarutinut atatillugu Hotel Søma Sisimiuni akunnittarfimmik alliliinermik annertuumik aallartitsivoq, BJ Entreprise pingaarnertut sanaartortitsisorineqarluni. Alliliinermi saaffiginnittarfik nutaaq, isersimaartarfik baritalik, neriniartarfik kiisalu init 23-t inissiallu marluk, maanna ininut 34-usunut pigineqareersunut ilassutigineqarlutik sanaartorneqartussanngorlutik. Pilersaarutigineqaraluartutut sanaartorneq tamanna ukioq manna naammassineqassasoq, sanaartornerli kinguartoorfiulluni – ilaatigut allileriffigineqarneranut atatillugu sanaartorfiup eqqaani itsarnitsanik assaanikkut misissuisoqarnerata kinguneranik. Erik Ramballe Hansenillu maanna naatsorsuutigilerlugu Sisimiuni Hotel Søma nutaaq 2025-mi takornariat tikeralernissaannut aatsaat piareerneqarsinnaassasoq.

Erik Ramballe Hansenip Sømandsmissionip Danmarkimi Vejlemi qullersaqarfianit Aasianni Kalaallit Nunaatalu sinnerani ineriartorneq malinnaaffigilluartarpaa – aamma takornariaqarnermut inatsit nutaaq pillugu oqallinneq sakkortusoq, tassani Sømandsmissioni kalaallit piginneqataanissaannik malittarisassat nutaat pissutigalugit akornuserneqarsinnaasoq oqaatigineqarluni.

- Maannali eqqissisimavugut. Inatsimmi suli akuerineqarsimanngilaq – tamannalu sioqqullugu pisussat amerlasinnaapput. Pissutsinut piviusorsiortumik isiginnittaaseqarpugut pisariaqalerpallu sukkasuumik isummersinnaalluta. Erseqqissaatigissavarput – inatsisissatut siunnersuut tusarniaassutigineqartoq akissuteqarfigissavarput, maannakkulli inatsisissaq pillugu oqaaseqarsinnaanngilanga.

- Kalaallit Nunaanniissinnaalluta suli upperaarput, sioorasaarutaasinnaasullu pinnagit periarfissat isiginiarnerussavavut, Erik Ramballe Hansen oqarpoq.