Sumiiffinni arlalinni erngup nukinganik nukissiorfiit aatsaat taama annertutigisumik tunisassiortigipput

2023-mi erngup nukinganik nukissiorfiit Kalaallit Nunaata CO2-mik aniatitsinnginnerujussuanik kinguneqartitseqqipput.

Nukissiorfinni erngup nukingata silap pissusia 196.837 tons CO₂ -mik  qajassuussiffigisimavaa, tamatumalu assigaa Air Greenlandip timmisartuanik Tuukkamik Atlantiku qulaallugu timmisartornerit 2.150-it, tusagassiuutinut nalunaarummi Nukissiorfiit ilisimatitsipput.

Namminersorlutik Oqartussat nukissiuutinik pilersuinermik ingerlatseqatigiiffiutaat naapertorlugu 2023-mi Sisimiuni, Ilulissani, Tasiilami Nuummilu nukissiorfiit aatsaat taamak annertutigisumik tunisassiorsimapput.

Pisortaq tulluusimaartoq

Nuummi katillugit 293,5 GWh-inik tunisassiortoqarpoq, Nuummilu nangitsilluni siuarsaaneq, kiisalu Nukissiorfiit innaallagissialersuinermik periusissiaa tassunga peqqutaasoq, Nukissiorfiit nassuiaapput.

Periusissiaq tassaavoq Utoqqarmiut Kangerluarsunnguata allilerneqarneranut atatillugu nukissap ilassutaasup takkuttussap tunisassiarinissaanut Nukissiorfiit piareersaaviginissai.

Nukissiorfiit pisortaasa, Cicilie Senderovitzip, taama annertutigisumik tunisassiortoqarnera nuannaarutigaa: 

- Assersuutigalugu Ilulissani, nukissiornermik pisariaqartitsisoqarneranik siulianut naleqqiullugu annertunerpaaffilimmi, erngup nukinganik nukissiorfitta pilersuisinnaanerat tulluusimaarutigaara. Naallu Sisimiuni innuttaasut sialoqarluartumik aasaasimanera immaqa nuannaarutigivallaanngikkaluaraat, paarlattuanik ukiuunerani nukissap pilersuutigineqartup minguitsuunera nuannaarutigisinnaavarput. Ukiuunerani Sisimiuni taamaattoqartanngikkaluarpoq.

Alliliineq pisariaqartinneqartoq

Qaqugukkut nukissap minguitsup unammilligassaqarneranut imaluunniit killilersortariaqarneranut sianiginnilluarlutik, pisortap nangilluni oqaatigaa:

- Assersuutigalugu Nuummi minguitsumik nukissamik pilersuiinnassagutta, alliliiniarluni suliniut maannakkut pisariaqartipparput. Maannakkumillu alliliinissaq Nukissiorfiit iluani piareersarfigaarput, taamaalilluta sapinngisamik atuisartunut amerlanerpaanut nukissamik minguitsumik annertunerpaamik pilersuisinnaanissatsinnut piareersimassagatta, Cicilie Senderovitz oqarpoq.

Qasigiannguani Aasiannilu nutaanik nukissiorfiliortoqarlunilu Nuummi erngup nukinganik nukissiorfik allilerneqassaaq. Nuummili nukissiorfimmik alliliinissaq pingaarnertut suliarineqassaaq.

Tamanna januaarimi isumaqatigiissummi Naalakkersuisut Danmarkimilu naalakkersuisut atsioqatigiissutigisaanni erserpoq.

Erngup nukinganik nukissiorfiliornissamut suliniutit qanoq aningaasalersorneqarnissaat pillugu Aningaasaqarnermut Akileraartarnermullu Naalakkersuisoqarfik aamma Danmarkimi Finansministeriet misissuipput, kingusinnerpaamillu oktobarip aallaqqaataani 2024-mi erngup nukinganik nukissiorfiliornissamut suliniutit qanoq aningaasalersorneqarnissaat pillugu danskit tungaannit inaarutaasumik aalajangiisoqassaaq.