Takornarialerisut akerliussutsimik takutitseqqittut
Angalatitsisartut kattuffiata takornariartitsisartut allaneersut kisiisa tapersersorpai, uagullu isertitassaraluagut taamaasilluta annaasarpagut. Ilulissani takornariartitsisoq taama isumaqarpoq, ullumikkullu aamma umiarsuup tikinnissaanut atatillugu akerliussutsimik takutitsinissamik aaqqissuussilluni.
Turistoperatører fra Ilulissat og Grønland holder endnu en demonstration lørdag den 27. juli.
Privat
Ilulissani akerliussutsimik takutitsineq arfininngornermi nal. 13.00 aallartippoq.
Takornariartitsisartut Ilulissaneersut akerliussutsimik takutitsinissamik aaqqissuussisimapput.
- Takornariartaatit pillugit suliniaqatigiiffiup ersersippaa kikkut tapersersornerlugit, illoqarfik tikitaq tapersersorneqanngilaq. Misiginngilagut oqaloqatinginnikkusussusermik takutitsisut, takornarialerisoq Ilulissani najugalik Lars Erik Gabrielsen oqarpoq. Taanna allat peqatigalugit takornariartaatip umiarsuup Ilulissanut arfininngornermi 27. juli nalunaaqutaq 13.00 tikinnissaanut akerliussutsimik takutitsinissamik pilersaarusiortuusimavoq.
Aaqqissuisut innuttaasut akerliussutsimik takutitsinermut peqataanissaannik kajumissaaripput, illoqarfimmi takornariartitsisut tapersersorneqaqqullugit, aammalu angallataatillit umiarsualivimmiit imaani akerliussutsimik takutitsisisinnaasut ilisimatitsissutigineqarluni.
Akerliussutsimik takutitsisut sissamut niuffiorput
Ullumikkut aamma takornariartaammit umiarsuarmiit Ilulissani nunamut ikaartut akerliussutsimik takutitsisunit naapinneqassapput. Taakkumi sissami tikiffissaasumi piareersimapput.
Umiarsuit takornariartaatit soqutigisaqaqatigiiffittut suliniuteqartumit AECO-mit oqaatigineqarpoq, suleqatigiinnermut pitsaasumut tunngavissamillu ataatsimoorussamik ineriartortitsinissamut iluaqutaasussamik kissaateqartoqartoq.
Ilulissani sulisut allaneersut sulinerannik naammagittaalliuutigineqarnerat taama oqariartuuteqarnermi annikinnerunngilaq, Lars Erik Gabrielsen oqarpoq:
- Tikissaaraluarpata amigaatiginavianngilagut aamma akerliunerput siammarpat nunatsinni tikitassaarutissapput nunaqavissunik suleqateqarusunngiinnarlutik, Lars Erik Gabrielsen oqarpoq nangillunilu:
- Soqutigisaqaqatigiit kattuffissualli anguniagarisatut taasaminik malitseqartitsissaguni pissutsit allanngueqataaffigisariaqarpai, taanna oqarpoq.
