Takornariaqarnerup suluusalinnut mittarfik pisariaqartikkaa
Qeqertarsuarmi ukioq kaajallallugu takornariaqarneq ingerlanneqarsinnaalissappat siunissami qaninnerpaami suluusalinnut mittarfiliortoqartariaqartoq, takornarialerisut oqarput
- Mittarfittaarnissamut suliniuteqarnermi inuussutissarsiortut, innuttaasut politikerillu tamatta suleqatigiinnissarput pingaaruteqarpoq, Disko Adventures-imik piginneqataasoq, Danny Mølgaard oqarpoq.
Foto: Privat
Qeqertarsuarmi nuna immikkuullarissoq kusanartorlu aasaanerani ukiakkullu imaatigut takornariarpassuarnit ornigarneqartarpoq, ukiuuneranilu takornariaqarnerup inerisaaffigineqarnissaa periarfissarissaaraluartoq, Qeqertarsuarmi suluusalinnut mittarfeqannginnera pissutaalluni ukiukkut takornarissat ataasiakkaaginnaat tikittarput, tamannarpiarlu pissutigalugu takornariaqarneq ukioq kaajallallugu inuussutissarsiutigineqarsinnaanngilaq. Takornariaqarnerlu illoqarfimmi 850-it missaannik inoqartumi inerisaaffigineqassappat, siunissami qaninnerpaami suluusalinnut mittarfimmik sanasoqartariaqartoq, Hotel Disko Island-ip aqutsisortaava aamma takornariartitsivik nutaaq Disko Adventures-imit isumaqarput.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat ilaanni allaaserisaavoq.
Allaaserisat pisartagaqartunit siunissami taamaallaat atuarneqarsinnaajumaassapput.
Atuarluarna.
Ineqarnermut Attaveqaasersuutinullu Naalakkersuisoq, Hans Peter Poulsen, Siumut, juni aallartippat Qeqertarsuarmi innuttaasunik ataatsimiisitsissaaq, tassanilu Qeqertarsuarmi mittarfiliortoqarnissaanut Naalakkersuisut qanoq isumaqarnersut ilaatigut saqqummiunneqarumaartoq, Naalakkersuisut paasissutissiissutigaat.
Piaarersarneq aallartittariaqartoq Ukiuni kingullerni amerlasuuni Qeqertarsuup suluusalinnut mittarfeqalernissaa politikerinit, innuttaasunit inuussutissarsiortuniillu eqqartorneqartarsimavoq. Ilulissani mittarfittaassaq pilersaarutaagallartut malillugit 2026-imi ukiakkut atulerpat, takornarissat tikittartut amerleriarujussuarnissaat naatsorsuutigineqarpoq, Qeqertarsuarmullu tamanna iluaqutaassappat, suluusalinnut mittaarfittaarnissaq maannakkut piareersarneqartariaqartoq, Qeqertarsuarmi Hotel Disko Island-imi aqutsisoq nutaaq, Jensinnguaq Jeremiassen oqarpoq.
Qeqertarsuarmiit Qeqertarsuarmullu silaannakkut angallanneq ukiuunerani silap unerisimanngittarneranik peqquteqartumik ilaasunik angallassinermut annertuumik eqquisarpoq.
- Qeqertarsuarmut ukiuunerani takornarissat tikittartut ikittuinnaapput, tamannalu illoqarfiup ukiuunerani qulimiguulimmit taamaallaat tikinneqarsinnaaneranik annerusumik peqquteqarpoq.
- Qeqertarsuarmi inuussutissarsiorneq minnerunngitsumillu ukioq kaajallallugu takornariaqarneq inerisaaffigineqassappat ukiuni qaninnerpaani suluusalinnut mittaarfittaarnissaq pisariaqarluinnarpoq, Qeqertarsuarmi Hotel Disko Island-imi aqutsisoq, Jensinnguaq Jeremiassen oqarpoq.
Foto: Arne Mølgaard
- Angallannerullu piffissaq eqqorlugu ingerlasinnaanissaa qulakkeerneqarsinnaanngippat takornarissat Qeqertarsuarmukarnissartik tunuarsimaarfigisarpaat, tamannarpiarlu peqqutaalluni Qeqertarsuarmi ukiuunerani takornariaqarneq annikitsuinnaasarpoq.
- Takornariaqarnerlu ukioq kaajallallugu inuussutissarsiutigineqarsinnaalissappat, siunissami qaninnerpaami suluusalinnut mittarfittaarnissaq avaqqunneqarsinnaanngilaq, Jensinnguaq Jeremiassen oqarpoq.
Hotel Disko Island katillugit 39-nik iniuteqarpoq aasaaneranilu ulapaarfimmi katillugit 25-it missaani sulisoqartarpoq.
Suleqatigiinnissaq pisariaqartoq Qeqertarsuarmi takornarialerineq qaammatini ikittuinnarni ingerlanneqartartillugu, takornariaqarneq tamakkiisumik inerisaaffigineqarsinnaanera killeqartoq, takornariartitsivimmik Disko Adventures-imik siorna pilersitseqataasoq, Danny Mølgaard oqarpoq.
- Qeqertarsuaq ukiuunerani takornariaqarfittut inerisaaffigissallugu periarfissarpassuaqarpoq, taamaakkaluartoq ukiuunerani takornarissat tikittartut ikittuinnaapput.
- Qeqertarsuarmilu suluusalinnut mittarfimmik sanasoqartuuppat, tamanna takornarialerinermik suliaqartut amerlanerulernerannik aamma kinguneqassaaq, taanna oqarpoq.
Topas A/S suliffeqarfinnik qulinik immikkoortortaqarpoq, taakkununngalu ilaapput Ilulissani Hotel Icefiord, Qasigiannguani Hotel Diskobay, Qeqertarsuarmi Hotel Disko Island aamma Disko Iine A/S, taamaattumillu Qeqertarsuup Tunuani takornariaqarnermik inuussutissarsiuteqarnerup iluani nukittuumik inissisimalluni.
- Hotel Disko Islandimiik suliassanik assigiinngitsunik tunineqartarpugut, taamaattumik tassannga suleqateqarnerput pitsaalluinnartutut nalilersinnaavara.
- Mittarfittaarnissamut suliniuteqarnermi inuussutissarsiortut, innuttaasut politikerillu tamatta suleqatigiinnissarput pingaaruteqarpoq, Danny Mølgaard oqarpoq.
Disko Adventures-ip qimussiussineq, qamuteralannik angallassineq nunakkkullu pisutsitsinerit ingerlappai.
Ineqarnermut Attaveqaasersuutinullu Naalakkersuisoq, Hans Peter Poulsen, Siumut, Qeqertarsuarmi mittarfittaarnissamut Naalakkersuisut qanoq isumaqarnersut pillugu, junip aallartisimalernerani Sermitsiamut nassiuaateqassalluni paasissutissiivoq.
