Takornariat umiarsuaat kalaaliminernik sassaallissamaartoq
Takornarissat umiarsuaani Ultramarinemi ilaasut aasamut kalaaliminernik kalaallit igasuiniit marlunnit nerisassiarineqartunik nerisassaqartinneqassapput
Umiarsuarmi Ultramarine-mi sassaalliutit ilaat.
Nammineq pigisaq.
Takornariat umiarsuaat
Ultramarine issittumi angalatitsisuni kisiartaalluni kalaaliminermik Inuit
igasuiniit sassaalliutigineqartunik neqerooruteqartartuuvoq. Nerisassat aasamut
Miki Siegstadimit aamma Peter Berthelsenimit sassaalliutigineqartussat ilagaat:
tuttut, umimmaat, savat, aalisakkat nunatsinniillu naatitat. Taakku kalaallit
igasut marluk ukioq manna pingajussaa umiarsuarmi igasutut peqataassapput.
- Ilaasut assut alutorisarpaat aamma mamarisorujussuuaat.
Umiarsuarmi neriniartarfiit marluupput, aasakkut ikigangaangatta
neriniartarfiup aappaa tiguartarparput. Uagutsinni nerisussat
nalunaaqqaartarput, amerlanerillu uagutsinnut neriartortarput.
Umiarsuaq 2021-mi sananeqarmalli suliffeqarfik Igapall aamma Ultramarine
pilersaaruteqarput kalaallit igasuinik umiarsuarmi takornarianut
kalaaliminernik sassaalliisunik igasoqassallutik. Igapall suliffeqarfiuvoq Miki
Siegstadiminngaanniit Salik Parbst Frederiksenimiillu aallartinneqartoq,
kalaallit igasunik aamma inuit nerisassaannik suliniuteqarluni. Takornariat
umiarsuaat Ultramarine 199-nik ilaasoqarsinnaasoq 140-nik sulisoqarpoq, ukioq kaajallangajallugulu
nunarsuup ilaanni takornarissanik angallassisarpoq. Umiarsuaq juulimiit
septembarip naanissaata tungaanut Island, nunarput Canadalu angalaffigissavai.
Taakkunanilu qaammatini Miki Siegstad Peter Berthelsenilu peqataassapput.
Miki Siegstad 2022-mili Ultramarine-mi igasutut sulisarpoq.
Nammineq pigisaq.
Taassumunnga takornarissanullu periarfissatsialak
Nerisassiornerup saniatigut ilaasut nunatta kulturia pillugu
oqaluttuuttarsimavaat.
- Ilaasut ilaasa suli puisinniarneq arfanniarnerillu ajorisaramikkit.
Oqaluttuuttarpagut igitaqarneq ajorluta, pisaq tamaat atorluartaripput. Soorlu
puisip amiinnaa pillugu puisinniarneq ajorpugut, ilormiui amerlanerit
nerisarpagut, nerinngisagullu qimminut nerukkaatigisarlugit. Nerereernerup
kingorna piniartarnitsinnik paasinnilertarput ajorinnikkunnaarlutik.
Naatsorsueqqissaartarfiup nittartagaata takutippaa siorna umiarsuarni
takornariartaatini ilaallutik nunatsinniittut katillugit 76.477-iusut. Miki
Siegstad isumaqarpoq takornarissat amerlanerit kalaaliminermik usseerusuttaraluartut
amerlasuullu ussiinissaminnut periarfissinneqanngitsoortarsimasut, namminerlu
taassuminnga periarfissamik tunniussisinnaagami nuannaarutigaa.
- Nunatsinni neriniartarfiit amerlanerit kalaalimineerukkiartoramik.
Tulluusimaarnarpoq neqit, aalisakkat timmissalluunniit kalaaliminernik
sassaallerfigisinnaallugit.
Miki Siegstad Peter Berthelsenilu 2022-mi siullermeerlutik igasutut
ilaapput, umiarsuarmilu igasuinnaaneq ajorput.
- Nunatsinneereeraangami Nunavummukartarput, ilaanneeriarluta
igasuujutigaluta takornariaaqataasarpugut. Nunamut pisuleraangata
piffissaqartilluta pisoqatigisarpagut akornanneerujoorluta.
Suliffeqarfiup Igapall aamma takornariartaatip Ultramarine siunissami
suleqatigiinnertik ingerlatiinnarnissaat Miki Siegtadip oqaatiigaa.
- Siunissami ingerlallualeriarpat neriuppugut
ilinniartuuteqartalerumaarluta imaluunniit nunatsinneersumik igaffimmi
misilittagalimmik peqalerumaarluta, aamma neriuutigaarput Nunavummiit igasumik
ilaasoqartalerumaarluta.