Taxat akerliussutsimik takutitsiniarput: - Nungusarpaatigut
Illoqarfinni arlalinni suliffeqarfiit taxanik ingerlatsisut inatsisip amigaataaneranut akerliussutsimik takutitsiniarlutik, Nuuk Taxip politiit nalunaarfigai. Taxartartut inunnit ataasiakkaanit taxanit atuisunik tigusisunit sakkortuumik tatineqarput.
Leiff Josfsen
Nuummi taxanik ingerlatsisut angisuut
marluk taxanik ingerlatsinermi „inatsisaatsumik
ingerlatsisoqarnera“ sisamanngornermi naammagittaalliuutigissavaat.
Akerliussutsimik takutitsisoqassaaq,
taxat 100-t angullugit amerlassuseqartut Nuup qeqqani kommunip
allaffiata eqqaanut takkutissasut naatsorsuutigineqarpoq,
tassanngaanniillu ingerlaaqatigiinneq Namminersorlutik Oqartussat
allaffiata eqqaanut naggaserneqassalluni. Aamma Ilulissani
Sisimiunilu akerliussutsimik takutitsisoqassaaq.
Taama Nuuk Taximi pisortaq Janus
Eigaard Sermitsiamut oqaluttuarpoq.
Pissutsit maanna atuuttut
naammaginngilluinnarpai, tassami taxanut maleruagassat qanga atuuttut
atorunnaarsimapput, kinaluunniit biiliminut ikisisinnaavoq,
akiliisitsillunilu ingerlatissinnaalluni:
Ataasiakkaanit
tatineqartut
- Unioqqutitsilluni akiliisitsilluni
ilaasoqarnermik taasagarput atugaaleraluttuinnarpoq.
- Pissutsit ima ajortigilersimapput
unnukkut biilertunik pissarsiniarneq ajornakusoortilerlutigu, atuisut
ikiliartormata. Kigaatsumik nungukkiartorpaatigut, Janus Eigaard
oqarpoq.
Inunnit ataasiakkaat unammillernerat
naligiinngiffiusoq isumaqarpoq. Inuit ataasiakkaat
inuussutissarsiutigalugu biilersinnaanermut allagartaqarnerat,
inuussutissarsiutigalugu biilersinnaanermut sillimmateqarnerat aamma
akileraartarnermut nalunaarsuisarnerat, pisortap qularutigaa:
- Isertitatsinnit qaffasissumik
sillimmasiisarfimmut aamma akileraarnermut akiliisarpugut. Taakku
inuussutissarsiutigalugu biilersinnaanermut allagartaqaratik
ingerlasimassapput, aamma isertitat akileraarnermut aqutsisoqarfimmut
nalunaarutigisimanavianngikkaat ilimagilluinnarpara.
-
Sunniuteqanngippallaarpoq
Innuttaasut akiliisitsillutik
ilaasoqartartut isertitaminnik aamma akileraarutiminnik
Akileraartarnermut Aqutsisoqarfimmut nalunaarutigisarnissaannik
eqqaasitsiniarluni sapaatip akunnerani matumani nalunaaruteqarpoq.
Taxartitsisut pisortaata
nalunaaruteqarnerup naammannissaa qularutigaa:
- Nittartakkakkut taamatut
nalunaaruteqarneq sunniuteqanngippallaarpoq.
- Inuussutissarsiummik inatsisilimmik
suliat pitsaasuunissaannik qulakkeerinnittumik ingerlatserusuppugut,
Janus Eigaard oqarpoq, atukkallu assigiitsillugit
unammillertoqarnissaanik tikilluaqqusilluni oqarpoq.
Suliassaqarfimmut
maleruagassaqartitsisumik Naalakkersuisut inatsimmik
atulersitseqqittariaqartut, taxanik ingerlatsisartut
oqariartuutigaat.
