Boeing 737 Max United Airlinesimeersoq aappaagu juunip 14-iani siullermeerluni Nuummi mittarfimmut mippat pisoq – sutigut tamatigut - oqaluttuarisaanermut ilanngutissaaq.
Timmisartuussivimmi taanna Kalaallit Nunaata aamma The Big Applep – New Yorkip akornanni timmisartuussinermi siullersaaginnanngilaq. Aammattaaq Kalaallit Nunaata nunarsuarmi timmisartortitseqatigiiffiit annersaasa ilaat, sulisut kisiisa eqqaassagaanni Kalaallit Nunaanni innuttaasunit marloriaatingajammik amerlanerusunik sulisoqartoq, siullerpaamik naapissavaa.
Boeing 737 Max United Airlinesimeersoq aappaagu juunip 14-iani siullermeerluni Nuummi mittarfimmut mippat pisoq – sutigut tamatigut - oqaluttuarisaanermut ilanngutissaaq.
Timmisartuussivimmi taanna Kalaallit Nunaata aamma The Big Applep – New Yorkip akornanni timmisartuussinermi siullersaaginnanngilaq. Aammattaaq Kalaallit Nunaata nunarsuarmi timmisartortitseqatigiiffiit annersaasa ilaat, sulisut kisiisa eqqaassagaanni Kalaallit Nunaanni innuttaasunit marloriaatingajammik amerlanerusunik sulisoqartoq, siullerpaamik naapissavaa.
USA-mimi suut tamarmik angisuujupput. United Airlines siorna 103.000-inik sulisoqarpoq – Kalaallit Nunaanni innuttaasut marloriaatingajaannik amerlassuseqartunik. Timmisartortitseqatigiiffik 2023-mi 17.000-inik nutaanik sulisortaarpoq. Tamanna Nuummi innuttaasut amerlassusiannut assingungajappoq.
Milliardilikkaanik kaaviiaartitaqartoq
Ingerlatseqatigiiffiup 2.618 millionit dollarit, tassa 18 milliardingajaat, 2023-mi kaaviiaartippai – Nunatta Karsianit 8 milliardingajannik amerlanerusut.
United Airlinesimi timmisartuutit Air Greenlandip timmisartuutaanit amerlanerungaatsiarput. Timmisartut anginerit minnerillu 945-t - Boeing 767-init pisoqaanerusuniit SAS-ip 90-ikkunni Kalaallit Nunaanni timmisartuussissutigisimasaaniit Boeing 777-inut nutaaliaanerpaanut 350-inik issiavilinnu, 2023-mi pigivaat. United Airlinesip siorna ilaasut 140 millionit nunarsuaq tamakkerlugu sumunngarfinnut 350-init amerlanerusunut timmisartuuppai.
United Airlines Chicagomi qullersaqarfeqarpoq.
Peqqarniisaarniat saassussinerat
Peqqarniisaarniat 2001-imi septembarip 11-ani saassussimmata United Airlinesip timmisartuutai marluk saassussissutigineqarput. Timmisartut aappaat timmisartut tulleriiaattut aappaattut New Yorkimi illorsuup aappaanut ullaakkut aporpoq, aappaalu ilaasut timmisartumillu aallarussisut akiuutereersut Pennsylvaniami nakkarpoq.
United Airlinesip timmisartoq Boeing 737-800 Max 150-inik ilaasoqarsinnaasoq atorlugu Nuuk-New York akunnerit sisamat missaanni timmisartuussiffigissavaa.
United Airlinesimiit nutaanut aasaanerani Nuummut timmisartuussisarnissaq timmisartoqarfimmiit Newarkimiittumiit, New Yorkip qeqqani Manhattanimiit kujammut kangimut 25 kilometerinik ungasissusilimmiit ingerlanneqassaaq. Timmisartoqarfik ukiumut 36 millioninik ilaasoqarfiusarami nunarsuarmi timmisartoqarfiit ulapaarfiunerpaat quleraat. Timmisartoqarfinni ulapaarfiunerpaaq tassaavoq New Yorkimi timmisartoqarfiit aappaat, JFK, 42 millioninik ilaasoqarfiusartoq.
Aqqut taanna Amerikap avannaani mittarfippassuarnut attaveqarnissamut periarfissaqartitsisoq United Airlinesip erseqqissarpaa. United Airlines Star Alliancemut ilaasortaavoq. SAS aamma tassunga ilaasortaasimagaluartoq maanna SkyTeamimut ilaasortaavoq.
United Airlinesip timmisartuussiffigisassat allat arfineq-marluk ilanngullugit Nuummut timmisartuussisalerniarluni oktobarip qulingani saqqummiuppaa. Timmisartuussiffissat ukkuupput, Ulaanbaatar, Mongolia; Kaohsiung, Taiwan; Palermo, Italia; Bilbao, Spanien; Madeira, Portugal; Faro, Portugal aamma Dakar, Senegal.
Greenland Airportsimi naammagisimaarinnittut
Timmisartuussiffissaq nutaaq Greenland Airportsip nuannaarutigaa.
- Greenland Airports-ip United Airlines Nuummut tikilluaqqusinnaagamiuk tulluusimaarutigaa. Amerikami avannarlermi tamarmeersut tikeraartut tikilluaqqunissaat aammalu Kalaallit Nunaanni pinngortitap alutornartup, kulturikkut misigisassarpassuit aammalu misigisassat pissanganartut takusaasussanut amerlanerujussuarnut tikikkuminarnerulersinnissaa, qilanaaraagut, timmisartoqarfeqarfimmi pisortaaneq Jens Lauridsen tusagassiutitigut nalunaarummi allappoq.
- Timmisartuussivik nutaaq aqqutigalugu nunanit allaneersut Kalaallit Nunaanni pinngortitap kulturillu nuannerluinnartup misiginissaat ajornannginnerulissaaq. Timmisartuussivik tamatuma saniatigut Amerikami avannarlermi Unitedip Newarkimi mittarfia aqqutigalugu tikiffissanut 89-init amerlanerusunut pisariitsumik angalasinnaalernikkut Kalaallit Nunaanniit angalasunut nutaanik periarfissiissaaq, Lauridsen oqarpoq.
