Topasip Hotel Qaqortoq pisiarigaa

Topas Explorer Groupip Hotel Qaqortoq pisiaraa, tassalu 2026-mi januaarip aallaqqaataani tigussallugu.

Topas Explorer Groupip pisortaanera Michael Højgaard taama oqarpoq. Suliffeqarfiup nunatsinni akunnittarfiutigeriikkani Igaliku Bygdehotel, Hotel Icefiord, Hotel Disko Island aamma Hotel Diskobay Hotel Qaqortup pisiarineratigut taamaalilluni ilagai, taassuma ilisimatitsissutigaa.

Hotel Qaqortoq Jim Riisimit 1985-imi decembarimiilli maannamut pigineqarpoq, arlaleriarluni allilerneqarnikuulluni. Akunnittarfik taanna 46-nik initaqarpoq.

- Akunnittarfik ingerlalluarpoq, Topas Explorer Groupillu takornarianut ukiorpassuarni atortarpaa, akunnittarfiulli ataatsimiinnernut ataatsimeersuarnernullu aamma atorluarneqarnermigut najukkami inuiaqatigiinnut atalluinnartuusoq maluginiarparput, Michael Højgaard oqarpoq.

- Kujataani aallussatsinnut uiggiullugu tigunissaa pissusissamisoorluinnartutut isigaarput. Suliassaq tamanna Hotel Qaqortumi – Jim Riisimit sulisunillu – suliarineqareersimalersut ataqqillugit naammassissavarput.

- Hotel Qaqortoq Kujataani immikkorluinnaq ittumik inissisimavoq, akunnittarfiullu illoqarfimmut neqeroorutigisimasai attatiinnarnerisigut ineriartortissavarput, takornariaqarnerunissamut Kujataatalu takornariarfissatut maluginiarneqarnerulernissaanut iluaqutaasussamik. Topas Explorer Groupip Kalaallit Nunaanni pinngortitamilu sumiiffinni allani alutornartuni takornarialerinermik ineriartortitsinermi ukiorpassuarni misilittagai tamatumunnga atorluarsinnaavavut, pisortaaneq oqarpoq.

Nunap immikkoortua nukittorsarniaraat

Topas Explorer Group Kujataani angalatitsisareerpoq, Igaliku Bygdehotel aamma Blue Ice Explorer, suliffeqarfissuup immikkoortortallip taassuma Disko Linemut juunimi kattunnermigut. Hotel Qaqortoq suliffeqarfiup taassuma nunatsinni akunniuttarfiutigeriigaata tassaasut Igaliku Bygdehotel, Hotel Icefiord, Hotel Disko Island aamma Hotel Diskobay ilagilissavaat.

Tassa Topasip Kujataani inissisimaffini Hotel Qaqortup pisiarineratigut nukittorsarniarpaa.

- Nunap immikkoortuani ineriartortitsineroqataarusuppugut. Topasip suleqatigiinnerit pioreersut Blue Ice Explorer aqqutigalugu nukittorsarlugillu annertusassavai – tamannalu ilutigalugu nunaqavissunut misigisassanik nutaanik periarfissaqalersitsillunilu suleqatigiiffissarsiussalluni. Illoqarfiup eqqaani sumiiffippassuaqarpoq soqutiginartunik, takornariat illoqarfimmi illoqarfiullu ungasinngisaaniittuni nunaqarfinni illoqarfinnilu ingerlatsisut aqqutigalugit immikkorluinnaq ittumik misigisassarsiorfigisinnaasaannik, Michael Højgaard oqarpoq.

- Topas Explorer Groupip nunap immikkoortuanut takornariarnissamut kajungilersitsiinnarnani najukkami naleqarnerulersitsisumik pilersitsinissi aamma anguniarpaa. Ineriartortitsineq illoqarfiup innuttaasuinik suleqateqarluni pissaaq, najukkami suliniutit, suliffiit kulturilu ataqqillugit – takornarialerineq nunap immikkoortuani tamarmi piujuartitsisumik ineriartortitsinissamut tunngaviulluinnartooqqullugu.

- Savaatilinnik ukiorpassuarni suleqateqartareernerup ineriartortinnissaa takorluukkatta ilagaat.

Ulluinnarni aqutsineq

Christine Lyngholm ulluinnarni aqutsisuuinnassasoq akunnittarfimmilumi sulisutut ukiorpassuarni misilittagaqarluareerami tapersersuilluarsinnaasoq, Michael Højgaard oqarpoq.

Akunnittarfik piffissami eqqortumi tunigini, Jim Riis isumaqarpoq.

 - Topas illoqarfitsinni innuttaasunit, suliffeqarfinnit, kommunimit Hotel Qaqortullu suleqatigisaanit – ingammillu akunnittarfimmi sulisunit – tikilluaqquneqarluarumaartoq neriuutigisorujussuuara. Piginnittuulersussat akunnittarfiup alloriaqqinnissaanut isumagisassanik naammassinnilluarnerusinnaasut qularinngilara, Jim Riis oqarpoq.

Hotel Qaqortoq 2024-mi katillugit 17.738.425 koruuninik 2023-milu 16.147.027 koruuninik isertitaqarpoq. 2024-mi akileraareernermi angusai nalinginnaasut 297.378 koruuniupput, massa 2023-mi 1.740.546 koruuniusut.