Tunumi aalisarneq annertuumik inerisaaffigineqassasoq

Ukiuni kingullerni Tunumi aalisarnermik inuussutissarsiuteqarneq aalisakkanillu tunisassiorneq inerisaaffigineqarpoq, piffissamilu aggersumi suliniutit suli amerlanerusut aallartinneqassapput.

Aalisarnermut, Piniarnermut, Nunalerinermut Imminut Pilersornermullu Naalakkersuisoq, Peter Borg, Demokraatit, Inatsisartunut ilaasortap Lars Poulsenip, Siumut, Tunumi aalisarneq pillugu inerisaanissamut pilersaarutit pillugit, paragraf 37 atorlugu apeqqutaanut akissuteqarluni taama allapppoq.

Sulinitit arlallit

Tunumi aalisarnermik ineriartortitsinissamut pilersaarut 2024-miit 2030-p tungaanut atuuttussaq Naalakkersuisut 2024-mi akueraat. Pilersaarut taanna Aalisarnermut, Piniarnermut, Nunalerinermut lmminullu Pilersornermut Naalakkersuisoqarfik, Tunumi aalisarnermik ineriartortitsinissamut aqutsisoqatigiit, aalisartut, Kalaallit Nunaanni Aalisarnermut Piniarnermullu Nakkutilliisoqarfik, KANUAPNA, Pinngortitaleriffik, kiisalu Kommuneqarfik Sermersooq peqatigalugit massakkut piviusunngortinniarneqaleruttortoq, Peter Borg paasissutissiivoq.

Tunumi aalisarnermik inuussutissarsiuteqarnerup inerisaaffigineqarnissaanut atatillugu suliniutit arlallit, soorlu aalisartunut atortut, pikkorissaanerit, Tunumi sikunik alapernaarsuisoqartalernissaanik suliaq, Tunumi sinerissap qanittuani saarulliit pillugit immikkut aqutsiveqalernissaq, kiisalu Tunumi nipisanniarnermik aallartitsinissaq, Tunumi aalisarnermik ineriartortitsinissamut pilersaarut naapertorlugu ukiuni aggersuni aallartinneqassapput.

Pilersaarutip taassuma atuunnerata nalaani suliat killiffii pillugit ukiut tamaasa nalunaarusiortoqartassaaq, paasissutissallu Naalakkersuisut.gl aqqutigalugu tamanut saqqummiunneqartassapput, innuttaasullu sulianik malinnaatinneqarnissaat siunertaralugu nittartakkami tassani Tunu pillugu paasissutissat immikkut aamma saqqummiunneqartassapput.

Aalisarneq pillugu isumasioqatigiinneq

Tunumi aalisarnermik ineriartortitsinermut atatillugu apriili naalersoq Tasiilami aappassaanik aalisarneq pillugu isumasioqatigiissitsisoqarpoq.

- Suliniutissat isumassarsiallu amerlasuut isumagineqartussaapput, soorlu aalisartut Tunumeersut arlaleriarluni pikkorissartinneri, aalisarnernit paasissutissanik katersinerit, paasisitsiniaanerit, atortut amerlanerusut sinerissallu qanittuani ilisimatuussutsikkut misissuinerit.

- Tunumi aalisartunik oqaloqateqarlunilu pitsaasumik ataqatigiissaarinissaq pingaarnerpaavoq, tamannalu 2024-mi 2025-milu arlaleriarluni isumasioqatigiissitsinikkut, immersugassanik immersuisitsinikkut aamma Tunumi aalisarnerup ineriartortinneqarnissaanut aqutsisoqatigiit Tunumi aalisartunit, kommunimit, KONFIFA-mit tunisassiortunit KNAPK-imillu peqataaffigineqartumik ilaatigut pipput, Peter Borg oqarpoq.

Atortut pisariaqartitat taakkualu qanoq atorneqarnissaat qulequttallu allat pillugit Tunumi aalisartut Aalisarnermut, Piniarnermut, Nunalerinermut lmminullu Pilersornermut Naalakkersuisoqarfimmit ingerlaavartumik oqaloqatigineqartartut, aalisarnermut naalakkersuisoq Lars Poulsenimut paasissutissiivoq.

Kulusummi mittarfik inerisaaffigineqartariaqartoq

Aalisarnermut inatsisip nutaap aamma Kalaallit Nunaata avataanut niuersinnaanerup ammanerulersinneqarnerata kingunerisaannik Kulusuup mittarfia qanoq pilersaaruteqarfigineqarnersoq, Lars Poulsenip ilanngullugu paaserusuppaa.

lneqarnermut, Attaveqaasersuutinut lsorliunerusunullu Naalakkersuisoqarfiup Greenland Airports A/S-imiit paasissutissat pissarsiai naapertorlugit, Kulusummi mittarfik atorlugu nunatta avataanut aalisakkanik niuerutiginnittoqarnissaannik soqutiginnittunik maannamut saaffiginnittoqarsimanngilaq.

- Atuisartunit soqutiginnittoqassappat, Greenland Airports A/S siunertaqartumik oqaloqatiginninnissaminut soorunami piareersimavoq. Kulusuk aqqutigalugu nunatta avataanut nioqquteqartarnissaq soqutigineqassappat, qulequttat arlallit isiginiarneqartariaqassapput.

- Tunitsivinnut allanut nioqquteqassappat, isumannaallisaaneq eqqarsaatigalugu nassiussat misissorneqartassapput aamma inuussutissat Island aqqutigalugu nassiunneqartassagunik misissuisarnerit eqqarsaatigalugit immikkut ilinniagaqarnissamik tamanna pisariaqartitsissaaq.

- Nassatat nalinginnaasut misissortarnerinut Kulusuup mittarfia massakkut taamaallaat atortoqarpoq, soorlu aamma sulisut ilinniarteqqaarneqartussaassasut, Peter Borg paasissutissiivoq.

Kalaallit Nunaata iluani nassiussat misissorneqaqqaartarnissaannik piumasaqaateqanngimmat aalisakkanik Nuummut nassiussisinnaaneq periarfissaassasoq, akissummi ilaatigut erserpoq.

Piumasaqaatit pingaarutillit

Kulusummi mittarfimmiit aalisakkanik tunisassiat nassiunneqartalissappata, mittarfimmi nillusaatinik pilersitsisoqarnissaanut aningaasaliinissamik tamanna piumasaqaatitaqassasoq, kiisalu Kulusummi mittarfimmi timmisartut atorneqartartut 500 kilo taamaallaat usigisinnaagaat, Peter Borg Lars Poulsenimut akissuteqarluni allappoq.

Royal Greenlandip paasissutissiinera naapertorlugu suliffeqarfiup Tasiilami aalisakkanut suliffissuassaa arfineq pingasunik sulisoqartussaq julimi atoqqaarfissiorneqassaaq.