Tusassip ukiup affaani siullermi millionikkaanik sinneqartoorutai amerleriarput

2024-p affaa siulleq Namminersorlutik Oqartussat attaveqaqatigiinnermut suliffeqarfiutaannut Tusassimut aningaasaqarnikkut angusarissaarfiuvoq.

Qaammatini arfinilinni siullerni 67,5 millionit koruuninik sinneqartooruteqarluni suliffeqarfiup nalunaarutigaa.

Pisortap Toke Binzerip angusat nuannaarutigai:

- aningaasaqarnerup pitsaasup qulakkeernissaanut sinneqartooruteqarnerput suliassaqarfitsinnik qulakkeerinneqataasarmat: attaveqaatit nioqqutissallu nuna tamakkerlugu attaveqartitsisut pilersinnissaat.

- Annertuumik aningaasaliisoqarnissaa pisariaqarpoq, tamannalu periusissatut pilersaarutip 2025-mi inernerata saqqummiunneqarneranut iluaqutaassaaq. Ullumikkut angusat pitsaasut siunissami annikinnerpaamik akiitsoqarnissatsinnut iluaqutaassapput, Toke Binzer tusagassiutinut nalunaarummi oqarpoq.

160-170 millionit koruuninik sinneqartoornissaq naatsorsuutigineqartoq

2024-mi angusat akileraannginnermi 160-170 mio. koruuniupput, tamannalu 2023-mi angusanit allaanerunani, Tusass paasissutissiivoq, kisitsinillu saqqummiussilluni:

• Agguaqatigiissillugu 2024-mi ukiup affaanut siullermut kaaviiaartitat 395,5 mio. kr.-upput, siorna piffissamut tassunga sanilliullugu 0,3 mio. kr.-mik appariarsimallutik.

• Nammineq aningaasaatit juunip 30-anni 2024-mi 1.271,9 mio. kr.-upput, siorna taamaasinerani 1.206,8 mio. kr.-usimallutik. Tamatuma kingunerisaanik patajaassuseq 78,3 %-iuvoq.

• 2024-mi ukiup affaanut siullermut akileraarut ilanngaatiginagu angusaq 67,5 mio. kr.-uvoq, 2023-mi piffissap taamaalinerani angusaq 60,2 mio. koruuniusimalluni, taamaattumillu qaffariarsimalluni.

Aningaasaqarnermut pisortaq nutaaq

Suliffeqarfik nutaamik aningaasaqarnermut pisortartaarsimasoq (CFO) Tusassip ilanngullugu nalunaarutigaa. Line Mika Skov augustimi atorfinippoq.

- Suliffeqarfimmut peqqinnartumik patajaatsumillu ingerlatsiumut isersimavunga, suliassarlu pingaarnerpaaq tassaavoq ukiup sinnerata ingerlanerani toraarfik taassumalu ineriartornera ingerlatiinnassallugu. 2025-mi periusissiaq nutaaq atuutilissaaq, tamannalu aamma suleqataaffigissallugu pissanganartorujussuuvoq, oqarpoq.

Toke Binzer, 2022-miilli Tusassimi aningaasaqarnermut pisortaasoq, marsip aallaqqaataani pisortaaninngormat aningaasaqarnermut pisortatut atorfik inuttaaruppoq.