Umiarsuarnik takornariartitseqatigiiffiup Nunatsinnut aningaasaliisarnini unitsikkallarai

Kalaallit Nunaat umiarsuarnik takornariartaatinik takornariarpassuarnit ornigarneqarluartarpoq. 

Naalakkersuisulli takornariaqarnermut inatsisissatut siunnersuutaata kinguneranik, Norgemi umiarsuarnik takornariartaatinik ingerlatseqatigiiffik Hurtigruten millioninik marlunnik kisitsisitalinnik aningaasaliinissaminut pilersaarutimik taamaatitsigallarpoq.

- Tamanna ilungersunartorujussuuvoq. Takornarialerinermut inatsisip pilersaarutivut atorsinnaajunnaarsippai. Tamanna ilumoorpoq. Pilersaarutivut millionerpassuarnillu aningaasaliiniarnerput unitsikkallarpavut.

- Hurtigrutenip neqeroorutimini nutaami ingerlatamut taama annertutigisumut taama aningaasaliitiginissani aarlerinartoqartippaa, ukiunimi siullerni marlussunni immaqa aningaasatigut isertitsinngitsoorsinnaagatta. Inatsisissatut siunnersuutip ernumatittorujussuuaatigut.

Hurtigruten Expeditionsimi pisortap tullia Karin Strand, Sermitsiamut oqarpoq.

Aningaasaliissutissat pilersaarutigineqartut ukiuni pingasunit tallimanut Hurtigrutenip suliniutaasa tunisassiaasalu nutaat aningaasalersornissaannut atorneqartussaapput, ilaatigut Kalaallit Nunaanni ukiuunerani takornariartitsinermik ineriartortitsinissamut, ilaatigut nittarsaassinermut, ussassaarinermut, inuttanik ilinniartitsinermut aamma nunaqavissunik angallassisartunik atuinermut, aamma nunaqarfinni.

- Nunaqarfinni takornarialerisut atornissaat uagutsinnut pingaaruteqarami, oqarpoq.

Nalorninartorsiortitsisoq

Takornariartitsineq, sumiiffinnik immikkoortiterineq sumiiffinnullu aalajangersimasunut isersinnaanermut killilersuineq pillugit Inatsisartut inatsisaannut Naalakkersuisut siunnersuutaat naapertorlugu Kalaallit Nunaanni takornariartitsisarneq ”akuersissutinik atuuttussanik piginnittumiinnaq” ingerlanneqarsinnaavoq. Umiarsuit takornariartaatit Nunatsinnut Nunatsinnillu inunnik angallassisartut piumasaqaatinut ilaanngillat.

Hurtigruten Expeditions-illi umiarsuarnik takornariartitsisarnermi saniatigut najukkami sammisaqartitsinerit aamma Nunatsinneersunik atortoqarluni sammisaqartitsisarmat ilaatigut qajartornermik, inatsit takornariartitseqatigiiffimmut nalorninartorsiortitsisorujussuuvoq.

Inatsimmi aammattaaq piumasarineqarpoq, takornariartitsisartut piginnittut aningaasaatillu minnerpaamik affaat Kalaallit Nunaanni najugaqartassasut.

Sivisuumik Nunatsinniissimasut

- Kalaallit Nunaat Issittumi tikittakkatsinni pingaarnerpaavoq, Karin Strand oqarpoq.

Norgemiut umiarsuaataat takornariartaatit 2007-imiilli Nunatsinni angallassisarput. Hurtigruten ukiuni kingullerni Kalaallit Nunaanni aasaanerani sikunut illersuutitalinnik marlunnik pingasunilluunniit umiarsuarnik takornariartaatinik angallassisarpoq.

Ilulissani, Nuummi Qaqortumilu mittarfissat nutaat umiarsuarmik takornariartitsinermik nutaamik periarfissaqalersitsissapput.

Assersuutigalugu umiarsuarnik takornariartaatinik angalasut taarserneqartarnerat, Nuummi Ilulissanilu umiarsualivinni pisinnaalissaaq, Hurtigrutenip Islandimi Reykjavikimi umiarsualivimmik atuisutut ullumikkut taamaaliortarneranut taarsiullugu. Mittarfiit nutaat Hurtigrutenip angallassisarneranut atatillugu kalaallinut suliffinnik amerlanerusunik aamma suliniuteqarfiusinnaapput.

- Norgemi umiarsuarnik takornariartaatinik ingerlatsisut sivisuumik taama eqqarsartarsimapput, Karin Strand oqarpoq.

Arsarnerit ukiukkullu takornariartitsisarneq

Hurtigrutenip umiarsuaataasa Kangerlussuaq ilaasuminik taarsiisarfittut 2019-imi atorunnaarpaa.

- Ilaasunik taarsiisarnerput Kangerlussuarmiit Reykjavikimut ukiualuit matuma siorna nuukkatsigu, Kalaallit Nunaannut uternissarput pilersaarutigisimavarput. Kalaallit Nunaata mittarfinnut pingasunut aningaasaliiniarnera nalunaarutigineqarmat, Kalaallit Nunaannut, tassa Nuummut, umiarsuarni takornariartaatini ilaasunik taarsiiartortalernissatsinnik pilersaarusiorluta aallartippugut. Takornariartitsinermik inatsisissatut siunnersuutigineqartoq pissutigalugu pilersaarusiornitsinnik unitsitsigallarnermik kinguneqarpoq, Karin Strand oqarpoq.

Hurtigrutenimi pisortaq Karin Strand eqimattanut Nunatsinni aasaanerani juunimiit septembarimut takornariartitsisarnerup ukiuuneranut sivitsornissaanut pilersaarusiortunut ilaavoq.

- Norgemi iliuuserisartakkatsitut taaq arsarnerillu assigiinngitsunik sammisassaqartitsinermut atornissaannut pilersaaruteqarpugut. Assingusunimmi Kalaallit Nunaanni iliuuseqarsinnaassagatta.

Nuuk umiarsualivittut ilaasunik taarsiivissatut atorlugu februaarip naaneranit marsillu aallartinneranit angallassisarnerput aallarteriarlugu oktobarip naanerani novembarilluunniit aallartinnerani angallassisarnitta unitsittarnissaa eqqarsaatigisimagaluarparput, pisortaq oqarpoq.

Ukiut pingasut tallimalluunniit tikillugit ingerlaneranni takornariartitsisarnermik neqeroortit nutaat ineriartortinneqartarput. Maannali Hurtigruten Expeditionsip ukiuunerani takornariartitsisarnissaminik pilersaarutini maanna aallartinniarlugit sapiissuseerulluinnarpoq, takornariartitsinermut inatsit nutaaq pissutigalugu.

- Nunanit allanit takornariartitsinermut aningaasaliisartut Kalaallit Nunaannit peerulluinnarsinnaapput, takornariartitsinermullu nutaamik aningaasaliisoqarani, oqarpoq.

Takornariartitsisarnermut inatsit Hurtigrutenimut unammillernartorujussuuvoq, tamannalu pissutigalugu Nunarput angallavigiunnaarsinnaavaat.

- Pilersaarusiortariaqarpugut. Inatsit nutaaq tamanna uagutsinnut ajornakusoorpallaassappat Kalaallit Nunaat qimattariaqassavarput. Tamatumunnga taarsiullugu Svalbardi, Canada allallu samminerulissavavut, Karin Strand Hurtigruten Expeditionsimeersoq oqarpoq.

Nunarput ukiut marluk ingerlaneranni qimassinnaagaat

Takornariartitsisarnermut inatsit ullumi Inatsisartuni aappassaaneerneqartoq, sisamanngornermilu novembarip 21-anni pingajussaanneerneqarlunilu akuersissutigineqartussaq, 2025-mi januaarip aallaqqaataanni atuutilissaaq.

- Kalaallit Nunaat qimassagutsigu suliarisartakkavut ukiuni marlunni suliarisarunnaartariaqassavavut. Isumaqarpungali Kalaallit Nunaat qimannavianngikkipput, tamatumali pisinnaanera piareersimaffigaarput. Inatsit qanoq inerneqarumaarnersoq maannakkorpiaq utaqqivarput, Karin Strand oqarpoq.

Nuummi akunnittarfiliornissamik pilersaarutaagaluartoq aamma piviusunngussagunanngilaq. Takornariartitseqatigiiffiup Nuummi Tuapannguani 150-inik initalimmik akunnittarfiliornissani pilersaarutigigaluarpaa.

Taamaattumik Hurtigrutenip Nunatsinnut pilersaarutai tamarmik taamaatiinnarneqarallarput.

AECO-p umiarsuarnik takornariartaatinik ilisimasassarsiorluni takornariartitsisartut kattuffiata, Inuussutissarsiornermut naalakkersuisoq Naaja H. Nathanielsen, IA, ataasinngornermi novembarip 18-ianni ataatsimeeqatigissavaa.

Issittumi maannakkut pilersaarutit siunissamilu pilersaarutit oqallisigineqassapput. ”Oqaloqatigiinnermik” taaneqartoq internetikkut pissaaq. Karin Strand AECO-mi siulittaasuuvoq.