Aasaq manna nunatta kujataani sikorsuaqangaatsiarnerata kingunerisaanik immakkut angalanermi ajornartorsiortoqangaatsiarpoq, matumanittaaq umiarsuarnut takornariartaatinut kujataanut tulattussanut.
Aviisimi sapaatip-akunnera kingulleq saqqummersumi umiatsiamik angallassisartoq Anguteeraq Høegh-Olsen, Gardar Charterimi Qaqortumiittumi piginnittuusoq, umiarsuit takornariartaatit tikinngitsoorneria kinguneri pillugit oqaluttuarpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Aasaq manna nunatta kujataani sikorsuaqangaatsiarnerata kingunerisaanik immakkut angalanermi ajornartorsiortoqangaatsiarpoq, matumanittaaq umiarsuarnut takornariartaatinut kujataanut tulattussanut.
Aviisimi sapaatip-akunnera kingulleq saqqummersumi umiatsiamik angallassisartoq Anguteeraq Høegh-Olsen, Gardar Charterimi Qaqortumiittumi piginnittuusoq, umiarsuit takornariartaatit tikinngitsoorneria kinguneri pillugit oqaluttuarpoq.
– Juunip qaammataani illoqarfik takornarianik, illoqarfimmik uummaaritsitsisunik, ulikkaartaraluarpoq, ukioq mannali takunngiivippugut, taama Sermitsiamut oqarpoq.
Illoqarfiilli pingaarnersaanni allarluinnaavoq. Umiarsuit takornariartaatit arlallit nunatta kujataa avaqqutiinnartariaqalermassut arlallit nalunaarnikuunatik Nuummut tikipput. Tamanna Nuummi inuit amerleriataarnerannik kiisalu takornarialerisut umiatsiamillu angallassisartut ulapinnerannik kinguneqarpoq.
Umiarsuit nalunaarsimanngitsut tikiffimmut unammillernarsinnaapput, tassami takornarialerisut tamarmik sullissinissaminnut piareeriataartariaqarput, Sara Nissen, Visit Nuummi tikiffissanut aqutsisuusoq, oqaluttuarpoq.
– Takornarialerisut arlallit oqaloqatigigakkit umiarsuit nalunaaqqaarnatik tikittut ajunngitsumik sullinneqarput. Suleqatigiilluarnikkut takornariartitsinerpassuit aaqqissuunneqarput, tikeraartullu takornariartinneqarluarput.
Ulikkaaqqasut
Umiatsiamik angallassisartut ilaat juulimi ulapingaatsiarsimasoq tassaavoq takornarialeriffik Nuuk Water Taxi.
– Soorunami sullissinerunermik pilersitsisarpoq, aamma ulluni ulikkaaqqanngiffitsinni. Ullut ilaanni »ajoraluartumik ulikkaaqqalluta« oqartariaqarnikuuvugut, Anders Lykke Laursen, Nuuk Water Taxi pisortaasoq, oqaluttuarpoq.
Arfernik isiginnaarneq ungasinnerusumullu umiatsiarnerit ukioq manna soqutigineqarluarput. Nuuk Water Taxi umiarsuit takornariartaatsit pillugit ilaatigut Tupilak Travelimik suleqateqarpoq.
– Najukkami suliffeqarfiit umiatsiaassisartut patajaallisarlugillu katersoriarlugit umiarsuarnut tuniniaasarpugut, taava ataatsimoorluta umiatsiaassisarpugut.
Pileqqaarnitsinniillu ukiuni taakkunani suleqatigiittarpugut. Ataatsimut isigalugu Nuummi takornarialerisut suleqatigiilluartarput, Anders Lykke Laursen oqarpoq.
Piujuartitsisumik ineriartorneq
Takornariaqarnerulerneratigut suliassat suliffiillu amerlipput, taamaammallu suliaqarfimmi sulisut amerlanerusut pisariaqartinneqarput. Taamaammat takornarialerisut ilaasa GUX Nuuk saaffigalugu ilinniarnertuunngorniartut aasaanerani takornariartitsisartutut sulilersikkumallugit saaffiginnipput. Sara Nissen naapertorlugu takornariaqarnerulerneratigut inuusuttunik takornarialerisoqalernera najukkamut iluaqutaasutut assersuutitsialaavoq.
– Takornarialerisut takornariartitsisunik amerlanerusunik pisariaqartitsipput, inuusuttullu ilinniartut aningaasarsiornissaminnut suliffigilersinnaasaminnillu misiliinissaminnut periarfissaqarlutillu saqqummiinissaq ingerlatitseqqiinissarlu ilikkagaqarfigissavaat. Takornariaq pitsaasumik ilumoortumillu misigisaqassaaq, takornariartitsisarnerlu illoqarfimmi nunattalu inuusuttortaani tulluusimaanermik pilersitsisinnaavoq. Tassa uannut piujuartitsilluni takornariaqarnermik ineriartortitsineq.
Umiarsiaq takornariartaat Nuummut tikikkaangat takornarialerisut arlallit suleqatigiittarput, matumanittaaq Sikuki, Blue Water, najukkami umiatsiamik angallassisartut, takornariartitsisartut allallu. Umiarsuarmut ilaallutik takornariat nunamut niuppata suliat allat aallartissapput, matumani pisiniarfiit, kaffisorniartarfiit neriniartarfiillu. Tamatuma saniatigut najukkami innuttaasut umiarsuaq tusintilinnik ilaasulik Nuummut aqqusaartoq malugisinnaasarpaat, tamannalu inoqassutsimut unammillernartarpoq.
– Umiarsuarujussuit tulakkaangata soorunami illoqarfimmi malugineqarsinnaasarpoq. Inuppassuaqartoq aqqusinermi ersarittarpoq, aammalu kaffisorniartarfinni neriniartarfinnilu malugineqarsinnaasarsimassaaq. Kaffisorniartarfigut neriniartarfigullu illoqarfitsinni innuttaasuniit ulikkaarneqartartut nalunngereerparput.
Inissaqarnermut apeqqut
Misissuineq eqqaaneqartoq tassaavoq inuttussuseq pillugu misissuineq Visit Greenlandimit Visit Nuummillu suliarineqartoq.
Tassani ilaatigut takornarissat amerlinerisa akunnittarfinnut, unnnuisarfinnut neriniartarfinnullu ulapisitdingaatsiarneratigut 2027-mi septembarimi Nuummi unnuisarfiit neriniartarfiillu ikippallaalersinnaanerat ersersippaa.
Taamaammat illoqarfiit pingaarnersaanni inissaqarneq annertusarneqartariaqarpoq.
– Soorunami naammattunik neriniartarfeqarnatalu unnuiffissaqanngikkutta avataaniit tikittunik tikilluaqqusisinnaanissarput unammillernassaaq. Illuatungaanik ineriartortitseqataanermut ilaalluni kaffisorniartarfimmik neriniartarfimmilluunniit ammaasoqarsinnaasoq oqartoqarsinnaavoq.
Takornariat neriniartarfiuop aningaasaqarnerata toqqammavilernissaata qulakkeernissaanut iluaqutaasinnaasut, taamaalillunilu najukkami innuttaasunut tamanna iluaqutaasinnaasoq tikinneqartartuniit allaniit ilisimavarput, Sara Nissen oqaluttuarpoq.
Umiarsuarmut ilaallutik takornariat pillugit oqaluttuarsiaq, tassa tikeraarnerminni najukkami aningaasartuuteqartannginnerat ilumuunngitsoq misissuinerup allap ersersippaa.
– Umiarsuarluni takornariartitsineq inuiaqatigiinnut isertitaqarfiungaarneq ajortoq misissuinermi erserpoq. Suliaqarfiup tullianut isertitaqassutaasapoq, takornariallu angalatitsilluni sullissinernik pisiniarfinnilu nioqqutinik pisisarput. Arlallittaaq pisinerunissaminnik periarfissaqarumapput, Sara Nissen oqarpoq.
Siunissami takornariaqarneq
Taamaakkaluartoq umiarsuaq 3000-inik ilaasoqarluni tikittoq najugaqartunut niaqorlulissutaasinnaavoq, tassami inuppassuit puullaaqissutaasinnaapput, Sara Nissen oqarpoq.
– Takornariaqarneq qanoq ittoq najukkami innuttaasunut iluaqutaassanersoq qanorpiarlu takornariaqartitserusunnerluta eqqartornissaa pingaaruteqarpoq. Takornariaqarnerup Nuummut Kalaallit Nunaannullu siuarsaasinnaasutut isiginissaa imminerminilu anguniagaannginnissaa pingaaruteqarpoq.
Kalaallit Nunaat Issittorlu siunissami takornariarfittut ukkatarineqarnerulissapput, Sara Nissen oqaluttuarpoq. Taamaammat takornarialerisut assigiinngitsut piareersimasariaqarput, taamatuttaarlu takornariaqarneq unnuiffissat, misigisassat, atortulersuutit kiisalu innuttaasut eqqarsartaatsikkut suleqataanerisa annertussusaannut naapertuutissaaq.
– Ilaatigut taasinnaasatut sumiiffiit, atortulersuutit, allagartalersuineq, inuussutissanik siuarsaanerup peqataaffiginissaa, kultoorisiornerup ineriartortinnerata tapersersornissaa qulakkiissavagut. Takornarialerineq taamaalilluni tikeraanik tikilluaqqusineruinnanngilaq, Sara Nissen oqarpoq.
