Unammisitsineq: Aningaaserivik qanoq ateqassava?
BankNordikip Kalaallit Nunaanni immikkoortortaqarfia nutaamik ateqalissaaq, taamaattumillu aningaaseriviup siunissami qanoq ateqarnissaanik kikkulluunniit siunnersuuteqarnissaminnut kaammattorneqarput.
BankNordik
Savalimmiuni BankNordik Føroya Bankimik ateqalereerpoq, maannalu Kalaallit Nunaanni aamma nutaamik ateqalissaaq, tassanilu 10.000 koruuninik eqquisoqarsinnaavoq.
Kalaallit Nunaanni immikkoortortaqarfik “asseqanngitsumik naleqquttumillu ateqassasoq" aningaaseriviup kissaatigaa.
Ateq asseqanngitsoq
- Ateq BankNordik ajunngilaq, ukiorpassuarnilu atorsimavarput, kisianni Kalaallit Nunaanni suliatsinnut, sulisutsinnut pikkorissunut aammalu sullitarpassuatsinnut tulluartumik kalaallisut atertaarusulluta kissaatigaarput, tusagassiutinut nalunaarumi pisortaaneq Turið F. Arge oqarpoq.
Augustip 25-ata tungaanut bankip siunissami atissaanik siunnersuutit nassiunneqarsinnaapput.
