United Airlinesip timmisartuussinera siulleq timmisartuussinerit malinnaaffigineqarnerpaat ilagaat

Timmisartoq, United Airlinesip timmisartuutaa flight 80, Newark Liberty Internationalimit Nuummut arfininngornermi nalunaaqutaq 18.45 tikippoq, Nuummiorpassuit tikittut tikilluaqqullugit ilassiorniarlugit aqqusernup sinaani katersuussimapput. Kalaallit inoroorsaarnerat ilumoortoq – innuttaasut nunanillu allaneersut issittumi illoqarfiit pingaarnersaannut immikkuullarissumut tikeqqammertut akornanni naapeqatigiinneq kissalaartoq. 

- Qaannamik angalanissannut, kangerlummi sikunik takuniarnissannut, nerisassanik misiliinissannut illoqarfimmilu inunnik naapitsinissannut qilanaartorujussuuvunga, naapitattami kikkut tamarmik kissalaamik tikilluaqquaatigut.

-  Los Angelesimeersuuvunga, timmisartumi ilaasorpassuit ilaat, timmisartumit niunermi kingorna utaqqisarfimmut ingerlanermini oqarpoq. 

Adam Nashvillemi Tennesseemi najugalik, Kalaallit Nunaanniissimanngisaannartoq illoqarfimmi inunnik naapitsinissaminut pinngortitamilu pisuttuarnissaminut qilanaarpoq. 

- Timmisartornerput nuannerluinnarpoq. United Airlines ajunngilluinnartumik iliorpoq. Illoqarfimmi inuit naapinnissaat qilanaaraara, siullermeerlungami maanga angalavunga. Nunap kusanartup allaanerulluinnartup immikkuullarissullu takulluarnissaa misigisaqarfiginissaalu qilanaaraara. Tusarparalu inuit maanimiut tikilluaqqusisuullutillu inussiarnersuusut, Adam Nashvillemeersoq oqarpoq.

Anaanaq Susan panialu Katie Marshall New Jerseymeersut juunimi nunanut allanut takusimanngisaminnut misigisaqarfigisimanngisaminninnullu inuuissiornerminnut atatillugu angalasarput. 

Nuummullu aqqut angallavissaq nutaaq inuuissiornissamik nalaani ammarneqartoq, isumaannut pilersaarutaannullu eqquilluaavissimavoq, anaanaasorlu Susan Nuummut billetsinik inniminniiniapallassimavoq, taamaalillutik panigiit Nuummi 16. aamma 17. juuni inuuissiorsinnaanngorput.

- Paniga nannumik takunninnikkusuppoq, Susan oqarpoq.

- Angalanermi matumani nannumik takusaqanngikkuma, taava kingusinnerusukkut uteqqissaanga, Katie oqarpoq.

United Airlinesimi nunarsuaq tamakkerlugu attaveqarnermut pilersaarusiornermut suleqatigiinnermullu pisortap tullia, Patrick Quayle, angalanermi nammineq peqataavoq, misigisatullu immikkuullarilluinnartutut isigaa.

- Assorsuaq immikkuullarippoq. Timmisartunut aqqutinik nutaanik ammaanerit qulit sinnerlugit peqataaffiginikuuakka, timmisartornermili matumani ilaasut tamarmik oqaasissaaleqinngillat; issiaviit tamarmik ulikkaaqqapput aamma kajuminneq annertoqaaq, pissanngattunnguaqarlunilu.

-  Minnissatsinnut qanilliartortilluta nuissat qaangeratsigit Nuuk, qaqqat sikullu takusinnaavagut. Alutornangaarami tupinnaqaaq, Patrick Quayle oqarpoq, taannalu ulluni sisamani maaniissalluni, umiarsuarmut ilaalluni pinngortitaq misigisaqarfigissallugu immallu nerisassaatai mamartut nerillugit misileraassamaarpoq.

Aqqut periarfissanik ammaasoq

Washington D.C.-mi nunatta aallartitaqarfiata pisortaa Jacob Isbosethsen, Kalaallit Nunaat sinnerlugu Nuummut aqqutip nutaap atoqqaartinneqarnerani peqataajartorluni Newark Liberty Internationalimut angalasimavoq.

Kalaallit Nunaat Amerika Avannarlerlu imminut ilisarisimalluartut, siuligullu Alaskap Canadallu issittuini angalasarnikuullutillu sikukkut pinertussusertik, anorimik silamillu ilisimasartik atorlugu kiisalu qunutitassaanngitsumik tarneqarnertik kinguaaminnut ingerlateqqissimagaat tamannalu inuiaqatigiinni ulloq manna tikillugu suli pigineqartoq taanna oqarpoq, taassumalu United Airlines Nuummut timmisartuussisalernerani pilluaqquaa.

- United Airlines ingerlalluarnissaannik kissaapparput takornarissanillu Amerikameersunit tikinneqarnissarput nunaqqatittalu Nunarsuup Kitaanut angalasinnaalernissaat qilanaarilluinnarparput, Jacob Isbosethsen oqarpoq.

Inuussutissarsiornermut Naalakkersuisoq Naaja H. Nathanielsen timmisartuussiffimmik nutaamik, takornariartitsinermut periarfissanik nutaanik ammaassisumik tikilluaqqusilluni Nuummi mittarfimmiippoq.

- Angallassivissaq niuerfimmik nutaarluinnarmik ammaassigami takornariaqarnermut pingaaruteqarluinnarpoq, tamannalu soqutigilluinnarparput. Takornariaqarneq innuttaasorpassuarnut isertitaqarfiulluartoq ersersinneqareerpoq, isumaqarpugullu suli amerlanerusut tamanna atorluarsinnaagaat. Aningaasaqarnitsinnik assigiinngisitaartunik tunngaveqarnissarput pisariaqartipparput.

- 2023-mi inuussutissarsiornermi aningaasat kaaviiaartitaat 1,2 milliardit koruuniusimasut 2024-milu 1,1 milliardit koruuniusimasut takusinnaavarput. Inuussutissarsiornikkut ingerlatsiveqarfeqarpugut aalisarnermut unammillersinnaanngitsumik, aalisarnermi suli tassaavoq inuussutissarsiutigisarput pingaarnerpaaq, maannali takornariaqarneq pingaaruteqarneruleriartorpoq, tamannalu ukiorpassuarni kissaatigisimavarput, Naaja H. Nathanielsen oqarpoq, taassumalu ilaatigut USA-mi generalkonsul Monica Bland, Kalaallit Airportsimi pisortaq Jens Lauridsen aamma United Airlinesimi Patrick Quayle peqatigalugit atoqqaartitsinermi lagkagemik kilitseqqaartuuvoq.

Timmisartorneq malinnaaffigineqarnerpaaq

United Airlines misissueqqissaarnerit, paasissutissat piffissamilu sivisuumi timmisartuussinerit aamma ilaasut Londonimut, Parisimut, Romamut Madridimullu allarpassuarnullu angalareerlutik allamut angalarusuttut amerlassusaat tunngavigalugit Nuummut timmisartuussisalerniarluni aalajangerpoq. Maannalu Madeiramut, Bilbaomut Nuummullu aqqutinik ammaasseqqammerpoq.

- Taakku assigiinngikkaluaqalutik assigiimmik kajungerineqarput — tassa siornatigut illoqarfissuarniissimasut maannali allamik, pinngortitamik misigisaqarumasut, aqqutinut taakkununnga kajungerput, Patrick Quayle oqarpoq. 

Timmisartuussiffik taanna atorlugu angalanissamut soqutiginninneq annertummat, Nuummullu timmisartuussineq siulleq aqqummik soqutiginnilersitsilluarsimammat timmisartuussiffik ammarneqartoq aappaagu ilanngullugu United Airlinesimit pilersaaruteqarfigineqartoq tanna nassuiaavoq. 

- Timmisartut ingerlaarnerinik malinnaavigineqarsinnaasumik Flightradar24-mik qupperneqarpoq. Tassani timmisartut ingerlaartut tamarmik malinnaaffigineqarsinnaapput, tassanilu timmisartumi aalajangersimasumik ingerlaarfeqartumi qanoq amerlatigisunik ilaasoqarnersoq takuneqarsinnaavoq.

 Timmisartortillutalumi — United Airlinesip timmisartuutaa 80 New Yorkimit Newarkip tungaanut Nuummut ingerlaarmat — nunarsuarmi timmisartuni ingerlaartuni malinnaavigineqarnerpaavoq, timmisartut ingerlanerinik malinnaavigineqartarnerpaap tullianit 5,5-eriaammik amerlanerusunit malinnaaffigineqarluni. 

- Air Force One ingerlaaraangat paveluunniit timmisartoraangat taamarsuaq malinnaasoqartarpoq, kisianni inuussutissarsiutigalugu timmisartuussinerit taamarsuaq malinnaaffigineqarneq ajorput, Patrick Quayle oqaluttuarpoq.

- Tamanna Kalaallit Nunaata soqutigineqarluarneranut takussutissaavoq. Inuit namminneq angalasartut kisimik malinnaanngillat; inuilli Los Angelesimiittut, Mexicomiittut, San Franciscomiittut, Chicagomiittut, Houstonimiittut, San Juanimiittut Puerto Ricomiittullu malinnaaqataapput, taanna naggataatigut oqarpoq.