Uummannap
eqqaani Uummannallu Sulluani ukiut siuliini ukiuunerani sikkorikkajuppoq,
taamaattumillu sikumi qaammatini arlalinni qaleralinniartoqartarluni.
Ukioq
mannali ukiup nutaap aallartinneraniit unerisimanngitsorujussuuvoq,
sakkortuumik anorlertarluni issikillunilu, tamatumalu kingunerisaanik sumiiffiit
ilaanni sikumi qaleralinniarluni siornatigutulli aalisartoqarsinnaanngitsoq,
aalisartoq piniartorlu misilittagartooq Niaqornaneersoq Jørgen Kruse oqarpoq.
Uummannap
eqqaani Uummannallu Sulluani ukiut siuliini ukiuunerani sikkorikkajuppoq,
taamaattumillu sikumi qaammatini arlalinni qaleralinniartoqartarluni.
Ukioq
mannali ukiup nutaap aallartinneraniit unerisimanngitsorujussuuvoq,
sakkortuumik anorlertarluni issikillunilu, tamatumalu kingunerisaanik sumiiffiit
ilaanni sikumi qaleralinniarluni siornatigutulli aalisartoqarsinnaanngitsoq,
aalisartoq piniartorlu misilittagartooq Niaqornaneersoq Jørgen Kruse oqarpoq.
Taanna Uummannap eqqaani maannakkut aalisarpoq, silallu pissusiata
allanngoriartornerata sunniutai malunniukkiartortut, taanna isumaqarpoq.
Qalerallit
Royal Greenlandip Uummannami aalisakkerivianut ukioq manna tunisat, siorna taamaalisukkut
tunisanut naleqqiullugit affaannaanerat sikkorlunneranik peqquteqartoq, aalisakkeriviup
pisortaa Jakob Mathiassen paasissutissiivoq.
Aalisarneq
eqqugaasoq
Uummannap
eqqaani ukioq manna ukiuunerani issangiarnerullunilu anorip sakkortunerunera
silap pissusiata allanngoriartorneranik peqquteqarsimasinnaasoq, aalisarnermik ukiorpassuarni
inuussutissarsiutilik Jørgen Kruse oqarpoq.
- Siornatigut
sikumi aalisarneq siusinnerusukkut aallartittaraluarparput, ukiorli manna marsi
aallartittoq aatsaat aalisalerpugut. Uummannap eqqaata sikua ajormat,
aalisarnermi atortut qamuteralaallu umiatsiamik Uummannap kangiatungaani
sikumut assartoqqaartarpagut, tamaanilu maannakkut aalisarpugut pisagullu
Ikerasannut assartortarlutigit, taanna oqarpoq.
Uummannap
eqqaani siku atorsaalertaraluartoq, issangisseraangalli atorsaajunnaaqqittartoq,
sikulu siornatigornit saannerummat anorersualeraangat katalertortartoq, Jørgen
Kruse oqarpoq.
Siunissaq
nalorninartoq
Silap
pissusiata allanngoriartornera pillugu oqallinneq, ukiut arlallit matuma siornali
aallarteqqaarmat, Kalaallit Nunaanni aalisartut piniartullu ilarpassui tamatumunnga
apeqqusiisarsimapput.
- Kisianni
maannakkut sumiiffiit ilaanni sunniutai ajoraluartumik malunniupput. Anorersuit
akulikinnerullutillu sakkortunerulerput, immap sarfaa allaanerulerpoq, sikulu
saannerulerpoq.
- Februarimi
issangiartarnera qangaaniilli sungiusimavarput, kisianni maannakkut marsi
ilanngullugu sila kissatsittarpoq, silallu pissusiata allanngoriartorneranik
ilisimatuut oqariartuuteqartarnerat qularnanngitsumik eqquussimagunarpoq,
Jørgen Kruse oqarpoq.
Ukiuunerani
sikumi aalisarneq maannakkutulli siunissami issappat, aalisartut atugaat
oqimaanneruleruleratarsinnaasut, taamaattumillu aalisartut silap pissusiata allanngoriartorneranit
eqqugaasimasut, aningaasatigut ikiorserneqarnissaannut periarfissat nalilersorneqaqqittariaqartut,
taanna isumaqarpoq.
Tunisat
affaannanngortut
Uummannap
eqqaata ukioq manna sikkorlunnera qalerallit Royal Greenlandip Uummannami aalisakkerivianut
taamaalisukkut tunisat, siorna ukiup taamaalinerani tunisanut naleqqiullugit
affaannaasut, aalisakkeriviup pisortaa Jakob Mathiassen oqarpoq.
- Qalerallit
tulaanneqartartut maannakkut ikitsuararsuupput. Aalisartut kisimik pinnatik
aammali uagut sikkorlunneranik eqqugaaqqavugut, tamatunalu kingunerisaanik
sulisut affaasa missaat angerlarartikkallarnikuuagut.
- Upernaap
ilaatigut sikuerpat qaleralinnik tunisassiornerup nalinginnaasumik
aallarteqqinnissaa aatsaat naatsorsuutigaara, taanna oqarpoq.
Ikerasak,
Saattut Ukkusissallu sikkoripput, sumiiffinnilu taakkunani tunisineq
ajunngitsumik ingerlasoq, taassuma erseqqissaatigaa.
