Uummannami aalisartut peqatigiiffii qassutinik imaani annaaneqarsimasunik aasaru saliiniartut

Qassutit aalisarnermilu atortut immami annaanissaat pinngitsoorneqarsinnaanngilaq, Uummannami Qaleralinniat Peqatigiiffiannit QP-mit oqaatigineqarpoq.

– Aalisartut tamarmik qassutiminnik annaasaqarneq misigisarpaat, aalisartullu mianersuaalliornermikkut annaasaqartanngillat. Tamatta tamanna misigisarparput, aalisarnermilu atortutsinnik annaasaqaraangatta soorunami nissillugit qaqinniartarpavut. Assersuutigalugu qassutit 15-it imaanut annaaneqarsimasut qanittukkut qaqippavut. Taakku eqqagassatut allatulli igippavut, aalisarnermilu qassutinik nutaanik pissarsiniartariaqarluta. Qassutit ataatsit 2.000 koruuninik akeqarput, taamaattumik qassutinut nutaanut 15-inut aningaasaliisoqartariaqarpoq, Karl Markussen QP-mi siulittaasoq Avannaatalu Kommuniani kommunalbestyrelsimi Atassummut sinniisussaasoq oqarpoq.

Qassutit qaqinneqartarnerat naammanngilaq

Ilaannikkulli qassutit imaani tammartut ilaat immamit qaqinneqarneq ajorput, tamannalu iliuuseqarfigisariaqarparput, Uummannami KNAPP-mi siulittaasoq Ole Møller oqarpoq.

- Aalisarnermi qassutinik atuineq immini ajornartorsiutaanngilaq, taamaaliorsinnaatitaavugummi, qassutinilli annaaneqarsimasunik qalluineq naammanngilaq, qassutimmi annaaneqarsimasut ilaannikkut sikumut sikkussaasarput, sikulu aatsaat aakkaangat qaqinneqarsinnaasarlutik.

– Uummannap sulluani aalisarnermut peqatigiiffiit arlallit ukiut marlussuit matuma siornagut qassutinik aalisarnerup unitsinneqarnissaa ujartorpaat, qassutit annaaneqarsimasut imaanit qaqinneqarsinnaaniassammata, tamannali iluatsinngitsoorluni, Ole Møller oqaluttuarpoq. Maannalu Uummannap eqqaani qassutinik aalisarnermilu atortunik annaaneqarsimasunik kingullermik qalluisorneranit ukiut arlallit qaangiussimalerput.

Amerlanerusunik aningaasaliisoqarnissaanik siunnersuut

Kommunalbestyrelsimi sinniisussatut ilaasortaanermini Karl Markussenip, kommunip 2025-mut missingersuutaani aalisarnermut atortut annaaneqarsimasut saliiffiginissaannut aningaasaliissutit amerlineqassasut siunnersuutigaa.

– Qassutinik annaaneqarsimasunik saliinissamut aningaasat atorneqartussat marloriaatinngortinneqarput, Uummannamilu aalisartut tamatuma saniatigut aalisarnermik ingerlatsivinnut Royal Greenlandimut tunitsivinnullu allanut tapiiffigineqarnissaminnik qinnuteqartariaqarput, suliffeqarfiillu imartat minguitsuutinneqarnissaat soqutigisariaqarpaat taamaalillutillu siunertamut tapiissuteqarnissartik soqutigisariaqaraluarpaat, Karl Markussen oqarpoq.

Avannaata Kommuniani kommunalbestyrelsi 850.000 koruuninik immikkoortitsivoq, taamaalilluni aqutsiveqarfiit Upernavik, Uummannaq Ilulissallu tamarmik immikkut 250.000 koruuninik aningaasaliiffigineqassallutik, aalisartullu taamaalillutik qassutinik aalisarnermilu atortunik imaani annaaneqarsimasunik katersinissaminnut qinnuteqarsinnaassallutik.

IAPP-mi periuserineqartoq

Kommunalbestyrelsi aalisarnermi atortunik katatanik saliinissamut aningaasaliissuteqarnerujumaartoq, aamma Ilulissani aalisartut piniartullu peqatigiiffiat imaani atortunik katatanik saliigaangami qanoq iliortarnersoq Upernavimmi Uummannamilu aalisartut ilisimatinneqarumaartut Avannaata Kommuniani inuussutissarsiornermut pisortap Bendt B. Kristiansenip uppernarsarpaa.

– Aalisartut peqatigiiffiata IAPP-p Ilulissat eqqaanni qassutinik katersueriaasia pillugu aalisartut ilisimatinniarlugit 2025-p aallartinnerani Upernavimmut Uummannamullu angalassaagut, Bendt B. Kristiansen oqarpoq nassuiarlugulu qaleralinniarnani tunisisarnanilu qassutinik imaaniittunik saliinermut piffissamik atuineq aalisartunut akisusinnaasartoq.

– Assersuutigalugu aalisariut ullormi ataatsimi aalisakkanik 1.200 kilonik 30.000 koruuninik naleqartunik pisaqarsinnaavoq. Taamaammat atortunik katatanik ullualuit saliineq aalisartunut akisusinnaavoq, taakkulu suliffeqarfinnut assigiinngitsunut tapiissuteqarnissamut qinnuteqartarput, ukiullu tamaasa iluatsittarlutik, Avannaata Kommuniani inuussutissarsiornermut pisortaq Bendt B. Kristiansen oqarpoq.

Suliaq pisariusoq

Kangerlummi 1000-it 1300-illu akornanni ititigisumi aalisariutit katanneqarsimasut immamit piiarnissaat ajornakusoorsinnaasoq KNAPP-ip Uummannami siulittaasua nassuiaavoq.

- Uummannap kangerluata imartaa sumiiffiit ilaanni 1300 meterit missaannik itissuseqarsinnaasarpoq, taamaammallu aalisarnermi atortunik katersuiniarneq ajornakusoorsinnaavoq, Ole Møller oqarpoq, taassumalu aalisarnermi atortunik katersuiniarneq aasakkut pissasoq kajumissaarutigaa.

- Uummannap kangerluani juunimi juulimiluunniit imarillunilu mallerpallaarneq ajorpoq, taamaammat qassutit aalisarnermilu atortussat katatat aasakkut katersornissaannut piffissaalluassaaq, tamannalu iliuuseqarfigissallugu pingaaruteqarmat 2025-mi iluatsissinnaaniassammat aningaasanut qinnuteqartoqartariaqarpoq, Ole Møller oqarpoq.

- Uummannap eqqaani qassutinik katatanik saliineq ukiakkut mallertillugu silarlutsillugulu ulorianarpallaassaaq, inuttakkalu taamaaliortikkusunngilakka, Karl Markussen oqarpoq nassuiarlugulu qassutinik katatanik ujaasinermi GPS-imik nassitsissummik atuisarlutik.

- Anorersuartillugu silarluttartillugulu qassutit katannissaat ilimanaateqarnerusarpoq, qujanartumilli qassutitsinni gps-imik nassitsissummik atortorissaaruteqarluarpugut, taamaalilluta qassutivut tammarpata nassaarisinnaavagut. GPS-imillu sumiissusersiorneq atorlugu qassutigut qaqinniartarpagut. Kisianni itisoorujussuarmiissimappata tamanna ajornakusoorsinnaavoq, Karl Markussen oqarpoq, taassumalu aalisarnermut siunnersortip aasaru Uummannami immami salinissamut piffissaqarnissaa qilanaaraa.

- Avannaata Kommuniani aalisarnermut siunnersorti aasamut immami saliinissamut piffissaliippat pitsaanerpaassaaq, Karl Markussen oqarpoq.