Visit Ilulissat pilersinneqassasoq

Avannaata Kommuniani minnerunngitsumillu Ilulissani takornariaqarnerup annertuumik ineriartornera ilutigalugu, suliffeqarfimmik takornarialerinerup iluani inerisaanermik suliaqartussamik pilersitsisoqartariaqartoq, Avannaata Kommuniani kommunalbestyrelsimi partiit suleqatigiinnissamik isumaqatigiissuteqarsimasut Siumut aamma Naleraq isumaqarput. Taamaattumik suliffeqarfik takornariaqarnermik suliaqartussaq Visit Ilulissat pilersinneqassasoq taakku siunnersuutigaat.

Siulersuisut siammasissut 

Takornariaqarnermik inuussutissarsiornerup inerisaaffigineqarnissaa, kiisalu takornarialerisut nunaqavissut ingerlatsinerat pitsanngorsarneqassasoq, kommunalbestyrelsimi Siumup Naleqqallu suleqatigiinnissamut isumaqatigiissutaanni ilaatigut allaqqavoq. Tamatumalu piviusunngortinneqarnissaa siunertaralugu suliffeqarfimmik takornariaqarnerup iluani siuarsaanermik suliaqartussamik pilersitsinissaq kissaatigineqartunut ilaavoq. 

Takornariaqarnerup iluani suliassat Avannaata Kommuniata nammineerluni suliarisinnaanngisai, soorlu umiarsuarnut takornariartaatinut toqqaannartumik attaveqarneq, takornariartitsisartunullu nunaqavissunut suliassanik naligiimmik agguussisarneq, Visit Ilulissat suliarisinnaalissagai, partiit suleqatigiit isumaqarput.

“Ilulissat nunatsinni takornarianik tikerarneqarnerpaavoq, taamaattumik Ilulissat nammineq ateq nunarsuarmi ilisarisimaneqarlualersimavoq. Inassutaavoq suliffeqarfik takornarialerinermi ineriartortitsilluni ingerlasussaq ateqassasoq Visit Ilulissat. Eqqaamaqquneqarporlu suliffeqarfik kommuuni tamakkerlugu sullississammat”, suliaq pillugu saqqummiussinermi ilaatigut taama allassimavoq.

Takornariaqarnermut Ataatsimiititaliami ilaasortat marluk, tassa siulittaasoq aamma partiiniit illuatungiliuttuniit ataaseq, akunnittarfinnik ingerlatalinniit ataaseq, kiisalu suliffeqarfinniit takornariartitsisartuniit marluk, Visit Ilulissat ApS-ip siulersuisuinut ivertinneqassasut siunnersuutigineqarpoq.

Suleqatigiinnermut pitsaanerulersitsissasoq 

Upernaap ingerlanerani Ilulissani takornariaqarneq pillugu annertuumik uivertoqareersorlu, umiarsuaq takornariartaat sikunut aserorterutaatigisoq Le Commandant Charcot, franskit umiarsuaatileqatigiiffiannit Compagnie du Ponantimit pigineqartoq, kommunalbestyrelsimut ilaasortanik, tassani aamma borgmesteri Lars Erik Gabrielsen, Siumut, ilaalluni, aggersaavoq, tassanilu suliffeqarfimmik kommunimi akuuffigineqartumik peqartuuppat, tamanna suleqatigiinnermut annertuumik pitsanngorsaataassasoq umiarsuaatilinniit oqaatigineqarpoq.

“Taamaattumik Visit Ilulissat pilersinneqassaguni inerisaanissamut periarfissarpassuaqarpoq. Ullumikkut takornariat tikikkaangamik suliffeqarfippassuit attavigisarpaat, siunissamili matu ataaseq attavigisinnaalissavaat, tassanilu angallassinerit naligiittumik nunaqavissut akornanni agguaanneqarsinnaalissapput”, pineqartoq pillugu saqqummiussami aamma allassimavoq.

Akuersissutigineqarnissaa innersuussutaasoq 

Visit Ilulissat pilersinneqarnissaa pillugu siunnersuut kommunalbestyrelsimit akuerineqassasoq Aningaasaqarnermut Ataatsimiititaliamit innersuussutigineqarpoq, kommunalbestyrelsilu aalajangerpat siulersuisut sulillutik suliffeqarfiup suliassai sinaakkuserlugit aallartissapput. Suliffeqarfiup siulersuisuini ilaasortaq ataaseq ukiumut 50.000 koruuninik akissarsiaqassaaq. Aallaqqaammut suliffeqarfik ataasiinnarmik sulisoqassasoq pilersaarutaavoq, siunissamili sulisut ilanissaat naatsorsuutigineqarpoq. Suliffeqarfimmi sulisup ukiumut 500.000 koruunit missaannik akissarsiaqarnissaa pilersaarutaavoq. Taassuma saniatigut allaffissornermut inimillu attartornermut aningaasat 310.000 koruunit missaaniissasut naatsorsuutigineqarpoq, taamaalilluni Visit Ilulissat pilersinneqarneranut atatillugu ukiumi siullermi aningaasartuutit katillugit 1,1 millionit koruunit missaanniinnissaat naatsorsuutigineqarpoq.

Suliniut pitsaasoq 

Ilulissani kommunimilu tamarmi takornariaqarnermut nittarsaaviusinnaasumik Ilulissat Visit-itut ittumik annertuumik amigaateqartoqartoq, Ilulissani takornariartitsivimmik Explore Ilulissat ApS-imik piginnittoq aamma Ilulissani takornariaqarnermut siunnersuisooqatigiinni turistrådimi siulittaasoq, Laila Sandgreen oqarpoq.

- Visit Ilulissat pilersinneqarnissaa pillugu kommunalbestyrelsip aalajangernera pitsaasuuvoq, tamannalu Ilulissani taamaallaat pinnani aammali kommunimut tamarmut iluaqutaassaaq.

- Taamaattumik Avannaata Kommuniani turistrådip Visit Ilulissallu pitsaasumik inerititaqarfiulluartumillu suleqatigiilernissaat qularutiginngilara, taanna oqarpoq.

Ilulissani takornariaqarnerup avammut nittarsaanneqartarnera, kiisalu umiarsuarnut takornariartaatinut toqqaannartumik attaveqarnerit turistrådimi ilaatigut pingaarnertut suliarineqartarput.