Assassullaqqissoq

Uteriinneq. Nassaarsiullaqqinneq. Ajornartorsiutinillu aqqiisinnaassuseq. 

Piginnaasat pingasut Palleq Petersenip aataminit Gunnar Stenderimit ilikkagai.

Aataavata nipilersuutini nammineq sanasaramigit Palleq Petersenimut, ullumikkut nipilersuutiliornermik aaqqissuinermillu taamaallaat suliaqarusunnerugaluartumut, pingaarnertut maligassiuisuuvoq. Inuuniutigisinnaasuuguniuk, tamannali ullumikkut Kalaallit Nunaanni ajornaatsuinnaanngilaq. Qujanartumik ataataata Imiina Petersenip, maanna mekanikeritut timmisartulerisutut soraarninngorsimasup, assassullaqqissuunini ernerminut ingerlateqqissimavaa. Taamaammallu Palleq sapaatip akunnerata naanerani Atlantic Musicimi sulisarlunilu ulluinnarni Nuuk Handymanimi sanasutut sulisarpoq, massakkullu Tusassip illorsuani quleriit ilaat tamaat nutarsarlugu ulapileruttorpoq.

- Suliarli taanna naammassippat sulinngiffeqassagama piffissami tassani nipilersuutit kisiisa suliarissavakka, Palleq 37-nik ukioqartoq, marlunnik meeraqarlunilu arnaannut Sikkersoq Poulsenimut aappaasoq, naqissusiivoq.

Aappariit Katuami naapipput, tassani Palleq teknikeritut sulisoq Sikkersoq Cafétuami sulivoq.

Ullut ilaanni guitarernermut ilinniartissinnaaneriga aperaanga. Nipinillu tulleriinnik ilinniartissinnaassallugu eqqarsarpoq.

- Taava marloorujoortalerpugut … asannilerlutalu … ukiullu aqqanillit maanna qaangiuttut marlunnik meeraqarpugut, Palleq qungujulluni oqarpoq.

Ullumikkut inuusuttuaraalluni atuakannermi nalaani ”aallamasuugallarami” imminut siunnersussagaluaruni ilinniarnissaminut kiisalu pujortartaranilu aalakoornartulimmik imertassannginnerminik siunnersussagaluarpoq.

- Ilinniagaqassallunga imminut siunnersussagaluarpunga. Taamaalillutit pilersaarutit ajalusuussagaluarpata uterfigisinnaasaqassaatit. Aammalu pujortassaarlunilu aalakoornartulimmik imissaarnissaq, Palleq oqarpoq.

Meeqqat atuarfiat kiisami naammassigamiuk anaanami suliffia aqqutigalugu Naalagaaffiup Sinniisoqarfiata umiarsuaa HJ Rink ikiffigissallugu periarfissanippoq, tassanilu nunatta sineriaani Nanortalimmiit Upernavik tikillugu saqisuaqqatut umiartorpoq.

Umiartorneq tamatigut qaammat ataaseq affarlu sivisussuseqartarpoq, taavalu illoqarfiit nunaqarfiillu tikittarpaat, taamaalillunilu marlussoriarluni pingasoriarluniluunniit angalaqataavoq. Palleq Petersenip ataatani aavaqatigisareeramiuk umiatsiarneq misilittagaqarfigereerpaa. Massakkullu aamma periarfissaqaraangami illortaani Nicholas angaanilu Asbjørn ilagalugit aavartarpoq.

- Umiatsiarneq nuannareqaara. Aamma Georg Stagerniarlunga (umiarsuaq atuarfiutigisoq, aaqq.) eqqarsaatiginikuugaluarlugulu akuerisaanikuugaluarpunga. Allanilli suliaqarusunnerugama assassorluni suliaqarneq eqqarsaatigineruara, Palleq oqaluttuarpoq.

Sakkut avatangiiseralugit peroriartornikuugami arfineq-pingasunik ukioqarluni aanami aserorterutaa aaqqissuullugu aallartissimallugu siornatigut AG-mut oqaluttuarnikuuvoq. Tamanna ineeraani ”ikuallatsitsingajannermik”, pujuliungaatsiarnermik illumilu innaallagiaarunnermik kinguneqarpoq. Kiisalu nukappiaqqap arfineq-pingasunik ukiullip kiinaa paaginnaq:

- Taava ataataga sulereerluni angerlarpoq, kiinara paaginnaavoq illumilu innaallagiaqanngilaq, taava aperaanga susimanersunga. ”Sunngilanga”. ”Sooruna kiinat paaginnaasoq?” ataataata kulluni uluaatigut ammut tagiutiitigalugu aperivoq.

- Ineeqqani pujuliortoqarpoq. Matu ammarmagu aserorterut arsakuinnanngorsimavoq. Taava innaallagiamut ikkuffia piiginnariarlugu sikringi ikikkamiuk mianersortaqqullunga oqarfigaanga, Palleq 2020-mi AG-mut oqaluttuarpoq.

Guitarimik pisoqqamik, Stratfordimik aappaluttumik, Qapiarfiusaami igitamik nassaarami nipilersuutiliornerminik nuannarisaqarnera annertusiartulerpoq.

Pallip guitari igitaq angerlaakkamiuk pilattaasupajaatullu ammarteriarlugu atorsinnaalerseqqillugu ikkussoqqikkamiuk 14-it 15-illuunniit missaannik ukioqarpoq:

- Sunartaa tamaat uuttortariarlugu aqerlorteqqippara. Sakkortusaavik amigaatigaara, namminerlu peqannginnama qarasaariara marlunnik højtalerilik takulerpara. Taakku tigoriarlugit guitarimut ikkukkakkit nipinippoq. Tupinnaqaaq, taamanimiillu nipilersuutinik katersilerpunga. Katiterlugit, isaterlugit ilaannikkullu nipilersuutit assigiinngitsut atortui ataatsimoortittarpakka, 2020-mi allaaserisami nassuiaavoq.

Angalariarluni angerlaqqittoq

Ullumikkut imminut ilinniartissimasutit, imaluunniit ilinniarsimanngitsutut sanasuugaluartoq ilinniaqqissimannginneranik pissuteqanngilaq.

Ukiut qulit matuma siorna – angajoqqaanngunngikkallaramik – Palleq Sikkersoq, Danmarkimi psykologiimi ilinnialertussaq, ilagalugu Danmarkimut aallarpoq. Palleq pequsiornermut, piginnaasaanut assanilu atorlugit pinngortitsinissaminik soqutigisaqarneranut naleqquttumut, ilinnialerniarluni aalajangerpoq. Oqaannarlunili ajornaqaaq.

- Rødovremi atualerpunga, uniinnarpungali. Kalssimi 33-uvugut, Sjællandimilu ilinniartuuffiusinnaasut pingasuinnaapput, oqaluttuarpoq.

Palleq kingorna sanasunngorniarluni aallartippoq, Sikkersorli angajullequmminnik, ernerminnik Aslakimik, naartulermat ilinniarnini piunnaarlugu Kalaallit Nunaanukaqqinnissaq siunniuppaat, tassami Sikkersoq Kalaallit Nunaannut angerlaqqilluni erniartorusuppoq. Pallerlu - soorunami – ilaavoq.

Sikkersoq ullumikkut nittarsaassinermik ilinniagaqartoq digitalimik nittarsaassinermi immikkut ilisimasalittut Royal Greenlandimi sulivoq. Ilaqutariiaqqat Nuummi, Pallip inunngorfiani, Nuussuarmi najugaqarput.

Illoqarfik meeraanermini inuunerisaaniit allaanerungaatsiartoq, Palleq oqarpoq.

- Taamani ullumikkullu pissutsit assigiinngeqaat. Taamanikkut oqarasuaateqaranilu interneteqanngilaq. Kiffaanngissuseqarnarneruvoq, tamannalu maqaasisinnaasarpara, oqarpoq itisiliillunilu:

- PIffissaq pisoqarfiunnginnerullunilu inuuneq ajornannginneruvoq. Isiginnaarummi kanaleqarpianngilaq aneerlutalu pinnguartaqaagut. 

Imigassaq aalakoornartulik baaj

Inuusunnermini ilagisartagai, atuarallarami ikinngutai, ikilinikuupput.

Ilarpassui toqunikuupput. Amerlanerit aalakoornartulimmik imigassartorsimanerup kingorna imminut toqullutik, Palleq, siornatigut fiistingaatsiartarsinnaasimasoq kingunerisinnaasaanillu misigisaqarsimasoq, unneqqarilluni oqarpoq.

Maannakkuunngitsorli. Ukioq ataaseq sinnerlugu qaangiummat aalakoornartulimmik imissaarpoq.

- Qanoq pisoqarsinnaanersoq nalunngilara. Aqagutaartarnerillu ukioqqortusiartornermi ajorsiartuinnartarput, oqarpoq.

Taamaammanuna inuusuttuunermini imigassamik aalakoornartulimmik imerpallaaqqunani imminut siunnersorusuttoq. Qallunaat oqartarnerattuut: ”når sprutten ryger ind, ryger forstanden ud (imigassaq aalakoornartulik imeraanni silaqassuseq tammartarpoq, aaqq.).”

Tamatumunnga assersuutaasinnaasut ajunnginnerugunartut ilaat tassaavoq Pallip 17-inik ukioqarluni naqinnerit ”love” (asanninneq, aaqq.) assammini talerperlermi nagguami nalaani kakiortinnikuummagit.

- Aamma tassani aalakoorpunga, Palleq oqarpoq, kakiortinneralu piffissap ingerlanerani qalipaataarukkiartorsimammat pingasoriarlugu kakiorteqqittariaqarsimallugu illakusuutigaluni nassuerpoq.

Ullumikkut fiisterujussuartarnerit imigassarlu aalakoornartulik ilaqutariittut inuunermik taarsernikuuai, tassani sunngiffimmi annerpaartaa meeqqat ilagisarpai. Ilaqutariit sapaatip akunneranut ataasiarlutik meeqqat aannakkui aatakkuilu ilagalugit nereqatigiittarput. Palleq nerisassiortarpoq.

- Nerisassiorneq nuannareqaara, oqarpoq savallu quttoraa mamarinerpaasarinerarlugu.

Tulliupput pinngortitamiinnerit, pisuttuarneq aavarnerlu, erninilu skateboarderneq – minnerunngitsumillu – nipilersuutinik tusarnaarneq nipilersornerlu Pallip inuunerani pingaaruteqarput.

Nipilersuutinut tunngatillugu nuannarisai siammasipput:

- Jazz, sakkortuut bluesillu tusarnaatarpakka. Annermik nipilersoriaatsit taakku pingasut. Taakku aamma nammineerlunga nipilersortagaraakka, oqaluttuarpoq.

Ataqqinninneq unneqqarinnerlu

Pallip meeraanerani angerlarsimaffimmi kalaallisut qallunaatullu oqaluttarput.

Aataa Gunnar, nipilersuutiliortartoq, svenskiuvoq.

- Svenskisuulaarsinnaavunga. Kisianni qallutaatut kalaallisullu oqalunneruvunga, meeqqat atuarfianni, Nuummi Ukaliusami, atuarnermini kalaaliaqqani atuarsimasoq, oqarpoq.

Pallip SIkkersullu angajullequtaat, Aslak, Kangillinnguit Atuarfianni atualissaaq. Ilaqutariinut kapitali nutaaq.

- Sakkortulaassagunarpoq. Piffissaq sukkaannaq ingerlavoq. Qanorli ingerlassanersoq pissanganarpoq. Meeqerivimmiimmi allaaneruvoq, Aslakip ataataa oqarpoq.

Palleq Petersen qatanngutigiinni sisamaasuni nukarlersaasoq pingasunik aleqaqarpoq. Angajulliit marluk, Malene aamma Liv, tamarmik 40-t sinnerlugit ukioqartut Danmarkimi najugaqarput. Aleqaa nukarleq Parnuuna 40-liingajalersoq Nuummi najugaqarpoq.

Nukarlersaallunilu nukappiarartatuaalluni qanoq ippa?

- Aleqannut inuusaanikuullunga eqqaamavara. Nalinginnaavoq. Atisalersorneqarlungalu taninneqartarpunga. Nuanneqaaq, Palleq illarpoq.

Angajoqqaavittaaq, Suustu Imiinalu, Nuummi Qinngorpumi najugaqarput.

- Aalborgimut nuukkaluarput. Qaammatit arfineq-pingasut tasamaneeriarlutik uterput. Ernguttaminnut. Pilluarneq sivikitsoq, Palleq qungujulalluni oqaluttuarpoq.

Inoqatinut ataqqinninneq unneqarinnerlu naleqartitaapput Pallip pingaartitarisai.

Ataataminik aatamineersuupput, domprovstimit soraarnermit maanna toqoreersumit Richard Petersenimit, Rikkamik taaneqartartumit:

- Ataatannit aataga pissusissamik malinnilluartuuvoq. Aamma oqaatsinut tunngatillugu. Kalaallisut qallunaatullu. Naqqinneqaannaavittarpugut, qinngarnartaqaarlu. Kingumulli qiviaraangama qujasarpunga, Palleq aatani pillugu oqarpoq.

 Orange nuannarinngikkaa

Nipilersuutiliortartup assassullaqqissup apersornera sapaatip akunnera kingulleq marlunngornermi pivoq.

Tassani Kalaallit Nunaat nunani tamalaani politikkikkut sammineqangaatsiareersorlu Inatsisartunut qinersisoqarnissaa ualikkut suaarutigineqarpoq.

Taamaammat naggasiutigalugu oqallisingaatsiarnermit qanoq sunnerneqarsimanersoq aperissallugu naapertuuppoq.

- Sunneraanga oqarsinnaanngilanga. Eqqarsalersippaangali, oqarpoq.

Suna eqqarsaatigaajuk?

- Taanna angut orangeq USA-miittoq ernumanartoq. Nuannarinngilara. Nuna pisiarineqaannarsinnaanngilaq. Inuit tapersersorlugu taamatut isumaqarnerat ernumanartippara.

- Kikkulli tamarmik assigiinngitsunik politikkikkut isiginnittaaseqarput. Isumaqatiginngilluinnarpara. Ukiulli tullii sisamat pissanganarput, Palleq Petersen oqarpoq.