Kamillo Ignatiussen aamma Mikkel Paalu P. Bianco angalanerminni sivisuumi pisut annersaat misigaat, tassa pingasunngornermi februaarip 19-ianni Berlinalemi filmiliaritittartut biiliisa ilaannit anillutik filmertarfiup tusaamasap Zoo Palast-ip saavani natersuakkut aappaluttukkut pisukkamik.
Siullermik illoqarfimminnit Tasiilamit Kulusummukaqqaarput.
Kamillo Ignatiussen aamma Mikkel Paalu P. Bianco angalanerminni sivisuumi pisut annersaat misigaat, tassa pingasunngornermi februaarip 19-ianni Berlinalemi filmiliaritittartut biiliisa ilaannit anillutik filmertarfiup tusaamasap Zoo Palast-ip saavani natersuakkut aappaluttukkut pisukkamik.
Siullermik illoqarfimminnit Tasiilamit Kulusummukaqqaarput.
Taava Dash-8-mik Nuummukariarlutik Atlantikoq qulaallugu Københavnimukarput. Tassanngaanniit biilerlutik ikaartarfikkoorlutillu Tysklandimukarput kujammullu Berlinimut ingerlaqqillutik, natersuakkut aappaluttukkut pisunnissartik sioqqutilaarlugu apuullutik.
- Nalunaaquttap akunnerinik marlunnik piffissaqaratta, taamaattumik uffapallariarluta filmertarfimmukarpugut. Sivisuumik angalanitta kingorna sininngitsoorluta, Kamillo Ignatiussen oqaluttuarpoq, taanna AG-mit Mikkel Paalu P. Bianco peqatigalugu Nuummiittoq naapinneqarami, Tasiilamut angerlaqqinnissartik sioqqullugu ulluni marlussunni Nuummiinneranni.
Taakku marluullutik Nunatta avataanut aatsaat angalaqqaarput, taamaattumillu siullerpaamik pas-issarseqqaarlutik angalallutik, tassa filmi naatsoq „Anngeerdardardor“ („Tillittartoq“) Berlin Filmfestivalimi inuusuttunut filmiliortartunut immikkoortortami Generationimi peqataasussanngortinneqarmat.
Takutinneqarnerani suna eqqaamalluarnerpaavisiuk?
- Filmeriat apeqqutaat akiortorniarlugit isiginnaartitsisarfimmit inuppassuit saallugit saqqummernera eqqaamanerpaavara. Filmertarfiit annersaasa tullianiikkatta saatunginnilu inuppassuaqarami. Tamanna misigisaavoq angisooq, 18-inik ukiulik Kamillo oqaluttuarpoq.
Mikkel Paalup 19-inik ukiullip, natersuakkut aappaluttukkoornerminni assiliiviit qaammaallattaataat eqqaamalluarnerpaavai.
- Filmertarfiup saniani natersuarmi aappaluttumi assiliseqattaarnerput eqqaamanerpaavara. Tamanna nuanneqaaq, tamannaagunarporlu eqqaamalluarnerpaasara, oqarpoq.
Taakku marluullutik assuarlutik atisat qarlittariit atorpaat, Mikkel Paalu qernertunik amitsumik qilernerusaqarluni, Kamillo tungujortunik qaamasunik atisaqarluni sarpiusaamillu qernertumik qilernerusaqarluni.
Nuannarinnittunut atsioqattaarnerit
Kamillo Ignatiussen filmi naatsoq ”Anngeerdardardor” takuteqqaarneqarmat, tassani nukappiaqqatut Kaalitut pingaarnertut inuttaavoq.
Jan Kraus
Filmi Christoffer Rizvanovic Stenbakkenimit ilitsersuisuuffigineqartoq Tasiilami 2023-mi filmiliarineqarpoq, tamatumani oqaluttuarineqarluni inuusuttuaraq Kaali, Kamillo Ignatiussenimit inuttaaffigineqartoq, taassumalu qimmia asaqisaa tillinneqarsimalluni – soorlumi taama pasilliisoq – taamaattumillu uippallertorujussuanngorluni. Taassumami ilisimagamiuk qimmit angalaaginnartut aallaallugit toqunneqartartut, taamaattumik ikinngunni Bartilaa (Mikkel Paalu P. Bianco) peqatigalugu qimmini ujarlugu aallartilluni.
Filmi naatsoq takuteqqaarneqarnermi kingorna ersaartaanneqartorujussuusoq, aviisiliortumit Politikenimeersumit najuuttumit oqaatigineqarpoq.
Filmip naatsup takutinneqareernerani filmilioqataasut isiginnaartitsisarfimmukarlutik apeqqarissaarfigineqartussaapput. Tassungaannarli killeqanngitsoq, oqaluttuarput:
- Isumaqaraluarama filmertarfimmit anilerluta, paasilerparali nerrivimmut ingilluta atsioqattaartussanngorluta, Kamillo oqarpoq nangillunilu:
- Sukkasuumik sungiuppara.
Isiginnaartitsisartunngornissartik takorloorneraat aperineqaramik ima akipput:
- Naluarput, paasinarsissaaq.
