Inuiattut ullorsiorneq aallartippoq
Aalborgimi inuiattut nalliuttorsiorneq aallartippoq, Kalaallit Nunaanni innuttaasut suli sinittut.
Aalborgimi kalaallit 100-t missaanniittut kalaallit inuiattut ullorsiornertik ataatsimoorlutik ullaakkorsioqatigiillutik nalliuttorsiorput.
Assi: Jesper Hansen
Kalaallit Nunaanni inuit amerlanerit suli eqqissillutik sinittut, Aalborgimi inuiattut ullorsiorneq ullaassaani aallartinneqarpoq.
Illoqarfiup bussii nalunaaqutaq arferngup missaani ingerlaalermata, ileqquusut malillugit kalaallit erfalasuinik erfalatserneqarsimapput.
Erinarsoqatigiit Ikinngutigiit Aalborgimi Kalaallit Illutaata silataani erinarsoqatigiipput.
Assi: Jesper Hansen
Danmarkimi nalunaaqutaq malillugu nalunaaqutaq arfineq-pingasunut Erfalasorput illoqarfimmi kommunip allaffiata sakkutooqarfiinilu – soorlu Aalborgip timmisartoqarfiani saavani Erfalasorput amuneqarpoq.
Aalborg siulliusoq
Aalborgimi Kalaallit Illuutaat, Kunngeqarfimmi kalaallit inuiattut ullorsiornerannik siulliit ilaanniilluni, nalunaaqutaq 8.30 ullorsiortitsilluni aallartippoq.
Erinarsoqatigiit Ikinngutigiit Erfalasorput erinarsorpaat, illumilu pisortaq Jeppe Bülow Sørensen folketingimilu ilaasortaq Aaja Chemnitz oqalugiarput. Oqalugiarnerit kingorna Kalaallit Illuutaasa silataani kaffesoqatigiittoqarpoq.
Ullaap tungaani Aalborgimi Vor Frue Kirkemi aamma Nørresundbymi Løvvangen Kirkecenterimi kalaallisut naalagiartoqarpoq.
Aalborgimi ullorsiornermi oqalugiartoq siulleq tassaavoq folketingimi ilaasortaq Aaja Chemnitz.
Assi: Jesper Hansen
Aalborgimi ualikkut inuiattut ullorsiorneq Aalborgip uumasuusivissuani pisarnertut nalliuttorsiornermik nanginneqassaaq, tassanilu Aalborgip borgmesteria Lasse Frimand Jensen inuiattut ullorsiornermi oqalugiassaaq. Kalaallit Illuutaat kaaginik sassaalliissaaq – Arctic Street Lab-ilu kalaaliminernik immikkut ittunik ussertitsissalluni.
