Inuunermut sunniuteqarluartoq

Meeqqat angerlarsimaffianni Nuummiittumi ”Tupaarnaq”-mi najugallit, tupernik siniip puuinillu poortueriarlutik illoqarfimmiittut asfalti wifilu qimallugit ukiut tamaasa aallartarput. Amerallip qinnguani Kilaarsarfimmi qaammatit pingasut missaanni najugaqartarput, qaqqat, imaq ataatsimoornerlu avatangiiseralugit.

- Meeqqat siullerpaamik ukiut 20-t matuma siornagut aavaqatigigatsigik aallartippoq, Birgit Løvgreen Andersen, meeqqat angerlarsimaffianni pisortaasoq, oqaluttuarpoq.

Qinngorput 2005-imi illoqarfiup immikkoortuatut nutaatut sanaartorfigalugu nutaarluinnarmik asfaltimik betonimillu alliartortinneqaleruttortoq, Nunatta timaani asimi allaanerulluinnartumik pisoqarpoq.

Meeqqat ulluinnarni inuunerat pisoqarfiuallaanngitsoq ulluinnarnilu pisartut assigiiaaginnartut allanngortikkusullugit Birgit aamma Martin allamik iliuuseqarusupput, meeqqallu asimukaqatigerusullugit. Inuunermik misigisaqartikkusullugit.

- Meeqqat aavaqatiginissaannik isumassarsiarput uagut nammineq isumassarsiaraarput, taamaattorli Kilaarsarfik 1975-imiilli meeqqanut tammaarsimaarfiusarsimavoq, tassanilu ukiorpassuarni sunngiffimmi ornittagaq Aqqalu aamma piffissap ilaani Røde Kors meeqqanut tammaarsimaartitsisarsimallutik, taavalu tammaarsimaartitsisarneq uagut ingerlatilerparput, Martin Ømark Andersen, meeqqat angerlarsimaffianni ”Tupaarnaq”-mi immikkoortortami pisortaq Birgitillu uia oqarpoq.

- Siornatigornit aavarnerujussuusarpugut pingaarnerutittarlugulu, oqarpoq. Taama misigisimavunga. Pingaartittorujussuusarparput, oqarpoq.

Qinngorput taamaalilluni inissiarpassuarnik sanaartorfiuleruttortoq

Kilaarsarfik allanngorfiusartutut ineriartorfiuvoq — allaanerulluinnartumik.

Inersimasut marluk toqqillu arlaqanngitsut

Inersimasut marluk, toqqit arlaqanngitsut meeqqallu alapernaatsut aallaqqaammut peqataasarput. Ullumikkut aalajangersimasumik aaqqissuunneqartarpoq — kalaallit anersaavat ileqquilu meeqqat isiginnittaasianni uummarteqqinneqartut.

Pisut tamakku juunimi aallartinneqartarput.

- Juunip missaani aavarnerup aallartinnginnerani meeqqat asimi pisunnissaminnut piareersartarput aavarnissaminnullu sungiusartarlutik, Birgit Løvgreen Andersen oqaluttuarpoq.

Meeqqat pinngortitami eqqissisimallutik inuuneq ilinniartarpaat, minnerunngitsumillu pinnguaqatigiinnermikkut nuannisaqatigiinnermikkullu.

Meeqqat arfineq-marlunnik arfineq-pingasunilluunniit ukioqaleraangata nammattakkamik mikisumik fjällrävenimik nammattagaqalersarput, imermik taqussanillu nammataqarlutik asimi pisunnermik sungiusartarlutik.

- Ukioq ataaseq marlulluunniit taamaaliortarput, taava nammataqarnerujartortarput, immaqa kaffekandemik nammattarlutik, taavalu nammataat oqimaanneruleraluttuinnarlutik. Naggataatigut quttoqqamik nammassinnaalersarput, nammakkuminarnerusarmat. Tamanna tulluusimaarutigisorujussuusarpaat kiinaallu nuannaarnerulersarlutik, Martin Ømark Andersen oqaluttuarpoq.

Meeqqat apersortinnissartik ukiumik ataatsimik sioqqullugu tuttumik pernareersimasarput. Aamma meeqqat tuttumik pisaminnik aattoqataasarput, nammaqataasarlutik, nikkuliortarlutik angerlaattarlugillu.

Kingusinnerusukkut inersimaneruleraangamik tuttu tamakkerlugu nammassinnaalersarpaat immaqalu aallaasimik nassataqartarlutik. Naggataagut 17-inik 18-inilluunniit ukioqaleraangamik marlukkaarlutik aavarsinnaalersarput, oqarpoq.

Ataatsimoorneq tunngavigineqartartoq

Kilaarsarfimmi eqqarsartaaserineqartoq paasiuminarluinnarpoq: Ataatsimoornermut pingaaruteqarpunga, ataatsimoornerlu uannut pingaaruteqarpoq. Eqqarsartaaseq tamanna kalaallit piniartutut kulturiannit sorlaqarpoq.

Meeqqat Kilaarsarfimmi assigiinngitsunik suliassaqartarput soorlu iganermik, imertarnermik, erruinermik silagikkaangallu nallavigineqartartut qipiillu silaannarissarneqartarlutik.

Meeqqat sivisuumik pinngortitamiittarnerat, aappariinnut aamma pingaaruteqarpoq.

- Nunatsinni ileqqutoqqat tamarmik ilinniartinneqarnermik tunngaveqarput, ataatap umiatsiamik angalaarluni meeqqani puisinniartillugulu aavaqatigalugulu ilinniartittarpaa, meeqqallu ataatamik piginnaaneri peroriartornerminni ilinniartarpaat tulluusimaarnerlu misigisarlugu: Kalaaleq nukittuujuvunga. Soorunami aamma sumiiffiit ilaanni aallani ullutsinni taamaappoq, kisianni tamanna annaangajassimavarput, pingaartumik Nuummi, Martin Ømark Andersen oqarpoq.

- Taamaattumik takusinnaasattut ilinniarfiusumik angalaassagaanni sivisuumik najuunnissaq pingaaruteqarpoq. Tassami pisariaqarmat naasut ilinniarnissaat, tuttut sutortarnersut ilinniartariaqarmata, assigisaallu, oqarpoq.

Aamma tuttut kisimik pineqanngillat. Soorlu meeqqat asimi pisunnermik sungiusarlutik aallartittartut aammattaaq tuttunniaannaratik aammali aalisakkanik pisaqartarput panertittarlugillu paarnanillu assigiinngitsunik katersisarlutik.

- Aamma meeqqat ilagalugit kangerlummut sermeqarfimmut ulluni pingasuni pisuttuaqqammerpugut, Martin Ømark Andersen oqarpoq.

Aanaamut tuttup nikkua

Meeqqat pisaat tamarmik ukiornissaanut peqqumaasiarineqartarput. Meeqqat angerlarsimaffianni ukiuunerani nerineqartussatut – ilaallu ilaquttanut tunissutigineqartarlutik. Meeqqat taamaalillutik piliamik allanit nuannaarutigineqarnerat misigisarpaat.

Meeqqat ilaat ullumikkut inersimasunngorsimasut immaqalu namminneq meerartaareersimasut, Kilaarsarfimmut pulaartarput.

- Ilaasa aavaqatigisarpaatigut. Aavartarnermik ileqqumik ingerlatitseqqittarput ukiullu tamaasa tikeraartarluta, Birgit Løvgreen Andersen oqarpoq.

Tassami ukiuni 20-ni kingullerni asimiittarnivut tassaaginnanngillat ’anersaartorfiit’ — tassaallutilli inuup uummataani ikumasoq ikinneqartartoq qaminngisaannartussaq.