Oqaluttuaq tamanut ilisarnartoq

 Filmimi piviusulersaarummi „Walls Akinni Inuk“-mi arnat marluk assigiissuteqarpallaanngikkaluarlutik imminnut naapittut oqaluttuarineqarput.

Aamma filmimik isiginnaartut inuiaqatigiinnut ilaalersitseqqittarnissamik eqqarsaat, Kalaallit Nunaanni pinerluttulerinermut inatsimmut tunngaviusoq, pillugu akerleriissutinut unammillernartunullu isiginnaarnissaminnut qaqutigoortumik periarfissaqarput.

Filmi piviusulersaarut ukiuni qulini suliarineqarpoq, filmiliornermilu ilitsersuisup Sofie Rørdamip oqaluttuaraa, Asiami inuttut pisinnaatitaaffiit pillugit suliaqarnini tunngavigalugu filmiliornissaminik isumassarsisimalluni. Filmiliornermi ilitsersuisoq 2015-imi Nuummiitilluni Nunatsinni Pinerluttunik Isumaginnittoqarfimmi pisortaasimasoq Hans Jørgen Engbo attaveqarfigilerpaa, taamaalillunilu Nunatsinni parnaarussiveqarneq pillugu soqutiginnilerluni:

- Pineqaatissinneqarsimasunut inissiisarfiit pillugit paasisaqarpunga isumaliortaatsimilu tunngavigineqartunut tiguartittorujussuullunga (innuttaasunut ilaalersitseqqittarneq, aaqq.), aamma tunuliaqutara eqqarsaatigalugu, Sofie Rørdam oqaluttuarpoq imalu itisiliilluni:

- Taamaattumik eqqarsaatigigakku Danmarkimi Europamilu parnaarussivinnik aaqqissuussisarnermi ilinniarfigineqarsinnaanersoq, isumaliortaatsimullu inuiaqatigiinnut ilanngutiteqqinnissamik pingaarnertut siunertallit ilinniarfigisinnaanerivut.

Qinnuteqarami Nuummi pineqaatissinneqarsimasunut inissiisarfimmiittussanngorluni akuerineqarpoq. Tamannalu pilluni pineqaatissinneqarsimasunut inissiisarfiup nutaap matoqqasumik immikkoortortallip sananeqarnissaa ukiunik arlaqanngitsunik sioqqutitsiarlugu.

Sofie Rørdamip Nuummi pineqaatissinneqarsimasunut inissiisarfimmiilernini immikkorluinnaq ittuusoq oqaatigaa. Pineqaatissinneqarsimasunut inissiisarfimmi inissinneqarsimasutut malinnaasinnaanermini piviusut iserfigilluarpai. Ilaatigut paasivaa pineqaatissinneqarsimasunut inissiisarfik ilusilersorneqarsimasoq pineqaatissinneqarsimasut innuttaasutut naligiittut akuutinneqarniassammata, assersuutigalugu peqqinnissaqarfimmit immikkut sullinneqaratik.

Piviusorli aamma allaasoq paasivaa.

Ilaatigut pineqaatissinneqarsimasut amerlasuut aneernissaminnut periarfissaat killeqartinneqarpoq, ilaatigut taamaalluni Ruth Mikaelsen Jeremiassenimut, filmimi piviusulersaarummi pingaarnertut inuttaasumut, piffissaligaanngitsumik parnaarussaasussatut eqqartuunneqarsimasumut.

- Isumassarsiaq nuannersuusoq takusinnaavara, pinerluttarnerup ullumikkut qanoq ittuuneranut paasinninnermut naleqquttuusoq paasivara, Sofie Rørdam oqarpoq.

Filmimik piviusulersaarusiornerup aallartinneqarnera pillugu filmiliornermi ilitsersuisup nangilluni oqaluttuaraa pineqaatissinneqarsimasut ulluinnarni inuunerannut peqataanermigut piviusulersaarusiornissaminut isumassarsilluartarluni.

Ingammik angutit inuusuttut pineqaatissinneqarsimasut atortorissaarutaannik atuinissamut soqutiginninnertik ersersittarmassuk, tassa assiliivik mikrofonilu atorlugit ulluinnarni inuunertik filmiliarisaramikku.

- Kamanneq pilliutigineqartutullu misigisimaneq oqaloqatigiinnerni malunnarnerpaasaraluartunit allaanerulluinnartut tamatumani takusinnaavara, Sofie Rørdam oqaluttuarpoq.

Suliarli Pinerlussimasunik Isumaginnittunit unitsitaariasaarpoq, isumannaallisaanermut tunngatillugu assiliiviit arsaarinnissutigineqarmata. Unammillernartoqaraluartorli pingaarutilimmik attaveqaqatigiittoqalerpoq.

Ruthip oqaluttuassartaa – aamma Ninap

Pineqaatissinneqarsimasunut inissiisarfimmi Ruthi, parnaarussaaqqasuni arnani kisiartaasoq, immikkut inissisimavoq.

Piffissami killiligaanngitsumi parnaarusimaneqartussatut pineqaatissinneqarsimavoq ukiunilu tulleriiaanni allanngortoqassanani parnaarusimaneqarluni. Assiliissutit arsaarinnissutigineqarnerisa kingorna Sofie Rørdamip Nunatsinnilu suleqataata Nina Paninnguaq Skydsbjergip Ruth pulaartarniarlugu isumaqatigiissuteqarfigaat.

Ruth Ninalu ilisarisimanerat ikinngutigiinnerallu piffissap ingerlanerani ineriartortinneqarmat, Nina filmiliarineqartumut peqataalerpoq.

- Ninap Ruthi itisuunik oqaloqatigisarneratigut ilisarisimallualersimavaa, tamatumanilu aamma pisariaqarluni nammineq misigisimasaminik oqaluttuartarnissaa. Piffissap ingerlanerani Ninap arnaa toqummat attaveqaqatigiinnerat qaninnerulerpoq, filmilu allatut sangutinneqarluni, Sofie Rørdam oqaluttuarpoq.

Taamatut sangutinneqarnera ilinnut qanoq misigisimanarpa?

- Piviusormi aqussinnaanngilarput. Ilaannikkut takorluukkatsinnit sakkortunerusinnaasarpoq, filmiliornermi ilitsersuisoq oqarpoq.

Eqqartuussiveqarneq nutartertariaqartoq

Filmi „Walls Akinni Inuk“ Kalaallit Nunaanni eqqartuussiveqarneq pillugu pingaarutilinnik apeqqutissaqalersitsisoq, Sofie Rørdam tikkuaavoq.

Ruth parnaarussivimmiittussanngorluni eqqartuunneqarami pilersaarusiuunneqanngilaq, sulisunillu amigaateqarneq pissutigalugu eqqartuussivimmi aalajangiinerit piviusunngortinneqassanatik.

- Parnaarussat piffissap ilaani inuuneq naallugu parnaarussaaffissatut naleqqutinngitsumiitinneqarput, eqqortumik iperagaallartinneqartaratik, Sofie Rørdam oqarpoq.

Tamatuma saniatigut aamma eqqartuussiveqarneq eqqumiilluinnartutut Ruthip oqaatigaa, eqqartuussisummi aalajangiinerannik Ruthi nutserisumit suli paasitinneqartinnagu, nammineq qallunaatut oqaaseqartutut siulliulluni paasitinneqartarami.

- Eqqumiiginarnera piviusuusoq erseqqissilluinnarami eqqartuussinerit qallunaatut ingerlanneqartarmata, eqqartuunneqartulli suliamik namminnerminnut tunngasumik tamakkiisumik paasinninngitsoortarlutik, filmiliornermi ilitsersuisoq oqarpoq.

Sammisat nunarsuarmi tamarmi atuuttut

Sofie Rørdamip nammineq filmi piviusulersaarut arnap ataatsip parnaarussivimmi inuuneranik oqaluttuarinninnerinnaanngitsoq oqaatigaa.

- Sammisanik nunarsuarmi tamarmi atuuttunik sammisaqarpoq, soorlu kiffaanngissuseq, asanninneq, pillaasarneq, annaasaqarneq aliasunnerlu sammineqarlutik, oqarpoq. Inuiaqatigiinnut akuulersitseqqittarnermut apeqqut sammineqarluarpoq, aamma pillaasarnermut aaqqissuussineq qanoruna piniaripput, oqarpoq aperalunilu:

- Pineqaatissiisarneq sakkortunerusariaqarpa, imaluunniit inuiaqatigiinnut uternissamut ikiorneqarnissaq siunertaassava?

Filmimi inuttaasumut pingaarnermut Ruthimut filmi maluginiarneqarnerunermik kinguneqartoq, Sofie Rørdamip oqaatigaa. Taanna maanna iperagaareerpoq, neriuutigineqarlunilu filmi iluaqutigalugu allanik periarfissaqalerumaartoq.

- Filmili aamma eqqartuussiveqarnermi maannakkut periuserineqartunik inunnillu tamatumani ikiorneqartariaqartunik sammisaqarnermik kinguneqartariaqarpoq, Sofie Rørdam oqarpoq.

Filmip qanoq isummersorfigineqarnissaa naatsorsuutigaajuk?

- Isiginnaartut qularnanngitsumik assigiinngitsunik qisuariassapput, neriuppungali filmi inunnik inatsisinik unioqqutitsisimasunik paasinninnerulersitsissasoq. Tassami arlaannarpulluunniit unioqqutitsinermit eqqugaasinnaammat, Sofie Rørdam oqarpoq.