Sapaatip akunnerata naanerani Arktisk Festivalertoqassasoq

Ukioq manna Arktisk Festivali Københavnimi novembarip aallaqqaataani aappaanilu ingerlanneqassaaq. Siorna festivali 4000-init alakkarneqarpoq, tassanilu meeqqanut inersimasunullu Kalaallit Nunaat, Island Savalimmiullu pillugit oqalugiartoqarlunilu sammisassaqartitsinertalinnik aaqqissuussisoqarpoq.

Assersuutigalugu ilisimatooq 

Minik Rosing aatsitassat pillugit taavalu Jens Henrich, Mira Kleist aamma Bo Lidegaard Kalaallit Nunaata oqaluttuarisaanera pillugu oqalugiassapput. Aamma Naja Dyrendom Graugaard kryolit-nunasiaqartuuneq pillugu taavalu Gerth Sloth Berthelsen sakkutuuiarnerit kalaallit qallunaallu ikorfartoqatigiiffiat pillugu saqqummiissapput. Dorthe Rørbeck Mathiassen Thulemi ilisimasassarsiortut tallimaat ullorsiutaat ilisimaneqanngitsut pillugit taavalu Martin Breum Amerikamiunut attaveqarneq pillugu oqaluttuassapput.

Meeqqanuttaaq Issittoq pillugu sammisassaqartitsisoqassaaq, tassani Kalaallit Nunaat Savalimmiullu pillugit ilisimasatik misilittarsinnaassallugit. Islandimiut hestiinik naapitaqarnissamut aamma Sassuma Arnanik oqaluttuartumut tusarnaariarnissaq aamma periarfissaassaaq.

 Aaqqissuussaq soqutigineqaleraluttuinnartoq

Birgir Thor Møller Nordatlantens Bryggemi pisussanik aaqqissuisuullunilu attaveqatigiinnermut pisortaavoq. Angalatitsiviup Arctic Friendip Issittoq pillugu 2015-imi ulloqartitsinera kingornalu tassa 2017-imilli ukiumoortumik Arktisk Festivalertitsisoqartalerneranut isumassarsiviusimasoq, taanna oqarpoq. 

– Ukiut allortarlugit festivalertitsisarneq naammassasoq aallaqqaammut isumaqartoqarpoq, kisianni isiginnaartunit peqataasunillu soqutiginninneq ilimagisamit annerungaatsiarpoq, ilaatigut kajumissutsimik suleqataasartorpassuarnit festivalimut aaqqissuussinermullu tunngatillugu. Taamaammat 2019-imiilli ukiumoortumik ingerlanneqartalerpoq, isiginnaartuniillu soqutigineqaleraluttuinnarluni, Birgir Thor Møller oqarpoq.

 Inuit peqatigiiffiillu soqutiginnittut aaqqissuussamik piviusunngortitsisuusut

Nordatlantens Brygge aamma Danmarkimi peqatigiiffik Det Grønlandske Selskab angalatitsivik Arctic Friend, Københavnimi ilisimatusarfiup Kalaallit Nunaat Issittorlu pillugit immikkoortortaqarfia, Arktisk Institutti, Savalimmiut Sinniisoqarfiat, Kalaallit Nunaata Sinniisoqarfia aamma Islandip Aallartitaqarfia suleqatigalugit aaqqissuisuupput. Tamatuma saniatigut peqatigiiffippaaluit Issittumut tunngasunik sammisaqarfiusut aamma ikiuupput.

– Inuppassuit peqatigiiffippassuillu soqutiginnittut oqalugiallaqqissunik akeqanngitsumik saqqummiisartunut attaveqarluartuupput. Taamaalilluta festivalimut alakkaaneq akeqanngitsuutissinnaavarput. Festivali inunnit Issittoq pillugu soqutigisalerujussuarnit aaqqissuunneqartarpoq, ullutsinnillu tassa siammasissorujussuarmik soorlu politikkimut tunngasunik oqalugiarnertalimmik, sapannganik iverusianik workshoppertitsinertalimmik atortussanik kusanartulianik atuakkanillu tuniniaanertalimmik aaqqissuunneqartarluni, Birgir Thor Møller oqaluttuarpoq.

 Ukioq manna alakkaasut amerlanerussangatinneqartut

Ukiuni kingullerni festivalertitsisarneq Bogforumip weekendimi ataatsimi ingerlanneqartarsimavoq, ukiormannali Issittumi Festivali Bogforumip sapaatip-akunneranik sioqqullugu pimmat siornamut sanilliullugu amerlanerusut Nordatlantens Bryggemi takuniaanissaat naatsorsuutigineqarpoq, tassani 4.000-it takuniaapput.

 Festivali ukiuni kingullerni aamma Bogforumertitsisoqaleruttornerani aaqqissuunneqartarpoq, ukiormannali Bogforumertitsisoqarnissaanut sapaatip-akunnera sioqqullugu aaqqissuunneqassammat, ukioq manna alakkaasut amerlanerussangatinneqarput. Nordatlantens Bryggemi siorna aaqqissuunneqarmat 4.000-it takuniaapput.

– Ukioq manna alakkaasut amerlanerussangatilluinnarpavut, taamaammat oqalugiartussat nuannarineqarluartut ilaat soorlu Minik Rosing tusarnaariarniaraanni sioqqutsilluarluni takkunnissaq kaammattuutigaarput, Birgir Thor Møller oqarpoq. 

Pilersaarut tamakkiisoq nittartakkami uani atuarsinnaavat