Aavarneq ilaqutariittut ataqatigiinnerulissutigisaraat

Ilaqutariit Petersen Brobergikkut aavaraangamik aallaaniaannarneq ajorlutillu piliinnarneq ajorput. Ilaqutariittummi aamma ataatsimuualaarlutillu akisussaaqatigiinnermik, suleqatigiinnermik pinngortitamillu mianerinninnermik ilitsersuisarput.

Iluliarmiu Pilutannguaq Thorin Petersen pingasunik meeraqarpoq, Qeqertarsuarmilu inunngorluni.

- Ukiumut pilineq ilitsoqqussaralugulu meeraagallaramali kalaaliminertortorujussuulluta, Pilutannguaq Thorin Petersen oqaluttuarpoq.

Ilitsoqqussani taakku ilaqutariittut ataqatigiinnerulernerannik ileqqunillu taakkuninnga pingaartitsinerannik kinguneqartumik ilaminut ingerlateqqinnikuuai.

- Ilaqutariittut ataqatigiinnerulernissarput pingaartinnerpaasaraarput. Ukioq kaajallallugu sulillutalu ulapaartarpugut, ilaqutariittullu ataatsimuualaarnissatsinnut sapaatit akunnerisa naaneranni taamaallaat periarfissaqakkajuttarluta, tamannalu amikkitsinartarpoq, taanna oqarpoq.

Ilaqutariit taakkua tuttunniartigatik, meeqqisarlutik, aanaa aataakkut Pilutannguullu qatanngutai ilagalugit eqalunniaqqaarlutillu eqaluttatik qimatuleqqaartarpaat.

- Kingullermik umiatsiat pingasuulluta Qeqertarsuup Kangerluanut ingerlaaqatigiippugut, tamannalu nuannerluinnarpoq! Taamaaliortuaannarpugut, periarfissaqartillutalu taamaaliortuassalluta, Pilutannguaq Thorin Petersen oqarpoq.

Tamatuma kingorna tuttunniartarput.

Meeqqatik ilagalugit ukioq manna septemberimi ullut qulit missiliorlugit aavarniarput, akulliliartilli ilinnialernikuummat ilaassanngilaq.

Piareersarlutillu aallartereerput.

- Piareersarnissaq pingaaruteqarluinnarpoq. Assersuutigalugu sinnguppuut errussavakka, tuttunilli naamaneqarsinnaannginnissaat pingaaruteqarmat aallartigata silaannarissarluaqqaassavkka. Tassa aavarnissatsinnut pikininni tamakkumineeqqat aallartissutigisarpakka, taanna oqarpoq.

Taassuma ulluinnaat ulapaarfiusut, wifi pisorpalussuarlu qimalaarlugit ungasissumi qasuersaarluni ilaqutariittullu ataatsimuualaarluni piniarnissaq pingaartittupilussuuaa.

- Ullut taakkua katersuuffigalutigillu ulluinnarni pisorpalussuaq qimalaarlugu immitsinnut nutaamik ilinniaqqiffigalutigillu ikioqatigiiffigisarpavut, taanna oqarpoq.

Pingaartittaraat

- Uiga naapippara piniarneq ajortoq. Ataatama piniarnermik ilinniartingaatsiarpaa. Ukiumut pilineq angajoqqaannit ilitsoqqussaraara, ileqquliussimasaralu tamanna ingerlateqqinniarsaraara, Pilutannguaq Thorin Petersen nammineq umiatsiaatiliusoq oqarpoq.

- Umiatsiarput Poca-q ammasoq matoqqasumik taarserusuummerakku panipput inunngormat uima nalusaanik nutaamik umiatsiarsivunga, taanna illarasaarluni oqarpoq.

Neqinik nutaggarinnik ukiumut pilisinnaajumallutik asimukarlutik ukiut tamaasa aavarnissartik pingaartittorujussuanngornikuuaat. Piniarneq meeqqaminnik perorsaanerannut aamma ilaalluinnalersimavoq.

- Meeqqavut oqarfigiuaannarpagut piniaqataasassasut namminiileriarunillu peqataasarniarnerlutik namminneq aalajangertalerumaaraat, taamaammat tuttunniaqataasarnissaat taamaattussaannartut isigiuaannarnikuuarput, taanna oqarpoq.

Ileqquannik ingerlatitseqqiisoq

Ilaqutariittut ileqqorilersimasaat ernerata 18-inik ukiullip Angutitsiaq Petersen Brobergip ingerlateqqippaa.

- Tallimat missaanni ukioqarlunga perngaammik tuttuniaqataavunga. Aqqaneq-marlunnik missaanni ukioqarlunga perngarpunga. Nuan! Piniarneq nuannarersuaarpara, aamma pisamik oqimaatsumik nammaatigalunilu isorartuumut pisunneq, Angutitsiaq Petersen Broberg oqaluttuarpoq.

Piniarneq meeraanerminut eqqaanartiinnarnagu aamma ingerlateqqikkusuppaa.

- Qaqugumulluummiit piniassaarnissara ilimaginngilara, taanna oqarpoq.

Angutitsiaq meeraagallarami aavarfinngornissaanut qilanaartarnikooqisoq, arnaata Pilutannguaq Thorin Petersenip eqqaamavaa.

- Tuttunniaqataanissaminut qilanaartuaannarnikuuvoq. Aavarfinngornissaa qanoq qilanaarigitigigini ullorsiutiminut allattarnikuugaa eqqaamavara, taamaalillunimi ataatanilu marluinnaallutik piniarfimmeeqatigiinnissaminnut periarfissaqalersaramik, Pilutannguaq Thorin Petersen oqaluttuarpoq.

Angutitsiaq Petersen Broberg nammineq maanna aallaaseqarpoq, kisianni angunnilu pinngortitami ataqatigiilluinnartarnerat allanngornikuunngilaq. Tuttullu timaa nammassimasaani oqimaannerpaanngilaq, ileqquliussimasanimi inuunermini pingaartilluinnalersimasaanut ilaavoq. Tassa nipaalluinnartumiinnissaq, naammagittassuseqarnissaq qanilaarnissarlu. Pisallu ukioraangat ilariinnarilersagaat tassaapput neqit – sinnerilu tassaallutik eqqaamasat ilaqutariittut kialaartuutitsisussat.