Alfred Victor Hansen: - Kalaallisut oqaluttalerama periarfissarpassuaqalerpunga

Kalaallit nipilersortorpassuit akornanni Alfred Victor Hansen scenemi nikorfavoq nipilersoqataallunilu.

Qallunaaq, sukkulaajusanik takisuunik nujalik qalipaatigissaartunillu atisaqarluni guitarerpoq. Nipilersorluni tusarnaartitsineq naammassimmat kalaallit nipilersortartut akornanniippoq, tusaaneqarsinnaavorlu kalaallisut oqaluppaluttoq. Kalaallisut oqallorinnera tupaallannanngitsuunngilaq.

Alfred Victor Hansen Sermitsiamit attavigineqarpoq, paasiniarlugu kalaallisut oqaluttalernermi kingorna inuttaanut qanoq sunniuteqarsimanersoq. Saaffigineqarnini nuannaajallassutigaa, periarfissarpassuanissimaninimi pillugu oqaluttuassaqarluarpoq.

Inuunera pisuunnguallattoq

- Inuunera pisuunnguallangaatsiarpoq. Misigisimavunga inuit qaninnerulersimallugit. Kalaallisut oqaluttalersimanngitsuuguma immaqa kammagilersimanavianngisakka ikinngutigillualernikuuakka, Alfred Victor Hansen 25-inik ukioqalersussaq oqaluttuarpoq.

Alfred, kalaallisut imminut Aalifammik taajortoq kalaallisut oqaluttalernermigut inuttut nipilersortartutullu allannguutinik misigisaqaluarsimavoq.

Kalaallinut inuiaqatigiinnut akuliussinnaanera nukittunerulersimasoq, taassuma oqaluttuaraa.

Nipilersortartutut periarfissat saqqummersitsinerlu

Ikinngutitaartuinnanngilaq, taassumammi oqaluttuaraa kalaallisut oqaluttalersimanngikkaluaruni nipilersortartutut periarfissat pisinnaanngisani maanna pisinnaalersimavai.

- Nipilersortartorpassuarnik nipilersoqateqartarpunga, ilaatigut Tiu, Jaaku Sørensen, Alfa, Kusernerit aamma Savimineq. Nammineq aamma bandeqarlunga nipilersoqatigisartagaqarpunga. Nipilersortartorpassuarnut attaveqaateqarlualerpunga, maanna suleqatigisartakkannik, Aalifak oqaluttuarpoq.

Aalifak nipilersuummik, kalaallinit 45-init suleqataaffigineqartumik pinngortitamut tunngasunik juulip ulluisa tallimaani saqqummersitsissaaq. Saqqummersitassaaq ateqarluni "Our House Is On Fire", taanna nittartakkakkut appisimaarfinni tusarnaarneqarsinnaajumaarpoq.

Nipilersuut Aalifap siullermeerluni saqqummersitassaraa, kalaallinilli 45-init suleqataaffigineqarluni.

- Nipilersuut oqariartuutigaa inuit tamatta silap pissusiata allanngoriartorneqanut eqqummaafissasugut, unitsinnissaanullu iliuuseqartariaqartugut. Tassani assersuuteqarpoq angerlarsimaffitsinni ikuallattoqartoq, ikuallattorlu qaminniarlugu iliuuseqartariaqartugut.

Atuartitsisartoq

Kalaallisut oqaluttalernermi kingunerisaanik kalaallisuinnaq oqaluttunut nipilersornermik ilinniartitsisalerpoq:

- Kalaallisuinnaq oqaluttunut rappimik guitarimillu aamma ilinniartitsinikuuvunga. Aamma ilinniarnertuunngorniarfimmi GSK-tunut ilinniartitsisut ikiortaatut sulisarpunga. 

- Nipilersortartunut amerlaqisunut attaveqaateqarlualerpunga, suleqatigilluartakkannik.

Alfredip qallunaat kalaallisut ilinnialernissaanik kaammattuerusuppoq.

- Inuit kalaallisut ilinniarnissaannik kajumissaarsinnaavakka. Inuunerisaq pisuunnguallassaaq, nuannersorujussuuvoq. Aamma amerlasuut kalaallisut ilinniarsimasut ataqqilluartarpaat, Alfred oqaluttuarpoq.