DDR-ikkut ineeqqami Gadstrupimi sungiusartut

Seqerngup qinngornera igalaakkut nuimmat qipittullu kissalaartigaluni natermut saqqarpoq. Kabelit pedaliniit guitarinut atassusiisut, qimmerlu qaqortumik qernertumillu meqqulik alaatsinaalluni naamaartoq natermiipput. Kissarsuut qisuttortoq teqeqqumiippoq, kiannerali tassanngaanniinngilaq.

Illaqattaarnermeerpoq, nipilersukkaniit takorniunnermut. Angutit sisamat inimi siaruarsimapput – marluk guitarerput, ataaseq innaallagiartortunik tumerparpaartoq, ataaserlu qungujulaarluni pedalimut isikkami aappaanik toortaavoq. Appisimaarput, unilaariarlutik illariarlutik appeqqittarput. Bassertup Ib Uldumi inaani Gadstrupimiittumi sungiusarput. DDR-imi nipilersoqatigiit sisamaasut Tivolimi juulip 31-ani appinnissaminnut arfininngornermi ualisoq sungiusarusaarput.

Ateq Diskomeersoq – nutaaliornerlu

Nipilersoqatigiit Sjællandimi sungiusaraluartut DDR-imik - Disko Democratic Republic – suli ateqarput (Qeqertarsuaq kunngiitsuuffik demokraatiskiusoq, aaqq.). Sumi najugaqarnerat aallaavigalugu atiat Denmark Democratic Republicinngussannginnersoq aperineqaramik naaggaarput.

- Qeqertarsuaq Kalaallit Nunaannut ilaannginnerarlugu inuit Qeqertarsuarmiuunngitsut isummertarnerannut quiassuaatiginnilluni atsiussaavoq. Taamaattumik nammineerluta kunngiitsuuffittaarnerput suaarutigaarput, Anda illarluni oqarpoq. Taanna DDR-imi erinarsortuuvoq pingaarnertullu guitarertuulluni, imalu nassuiaavoq:

- Ateq allatut isumaqalerluni nipilersoqatigiit kinaassusaannut maanna ilanngunnikuuvoq: Sumiikkaluaraanniluunniit nammineertoqarsinnaavoq. DDR-ip tassa sorlaa.

Nipilersoqatigiit nutaanik inuttaqalernikuupput – nutaat marluk tassaapput tumerparpaartoq Lars Sørensen guitarertorlu Hans Pavia Petersen. DDR-imi guitarertuunermi saniatigut Tusagassiorfimmi Sermitsiami tuniniaasutut nalunnginneqarpoq.

Angutilli misilittagaqarluarput siornatigummi kalaallit nipilersoqatigiivini tusaamasani nipilersoqataasarnikuupput. Lars hiphop-ertartuni Nuuk Possekkunniinnikuuvoq, HP-lu Malik Kleistip nipilersoqatigiivini 1999-ip tungaanut guitarertuulluni.

Nipilersorneq aammiittoq - nuliamiillu peqquneqarneq

Tumerparpaanik innaallagiartortunik suna tamarmi aallartippoq. Lars Sørensenip ernera nukarleq nipilersortalerusummat tumerparpaanik nipitunngitsunik Lars pisivoq. Erneralu appisimaanngikkaangat Larsi tumerparpaartarpoq. iTunes atorlugu erinarsuutitoqqat ingiortalerpai - ullullu ilaanni erinarsuut ukiorpassuarni tusarsimanngisaa appippoq: Ib Uldumip atugaa Anniarpunga.

- Utersaarninnik nuannaajallarujussuarpunga. Suli nuannerpallaaqimmat eqqarsarpunga: Appisimaarusuppara, Lars oqarpoq.

Pimoorullugu sungiusartalerpoq – naapinnerlu aalajangiisussaq nalliuppoq. Nulia Nickie Isaksen, Isaksen Designimik piginnittoq, unnuit ilaanni tuniniaanermik aaqqissuussivoq. Qaaqqusat ilagaat Andap nulia. Larsip oqaloqatigerusaalerpaa DDR-ikkullu aliannaarluni nuannersisimallugit oqaluttuullugu - atugaallu sungiusartarlugit.

- Andap nulia angerlarami uini appisimaartaleqqittariaqarnerarlugu saaffigaa, Lars qungujulluni oqaluttuarpoq.

Taamaaliorporlu. Sivitsunngitsoq Andap Ib-illu Larsip DDR-ikkut atugaannik tumerparpaartoq tusarnaarpaat – ingerlaannarlu malugisinnaavaat. Tumerparpaarnera arlaannik eqquivoq. Appisimaariaaseq eqqorlugu. Appisimaaqatigiittalerput, eqqissisimasumik, misilittaallutik illarujussuartarlutillu. Kinguninngua HP aamma qaaqquneqarpoq. Lars HP-lu appisimaaqatigiittareerput, sisamaasullu inimi ataatsimuuleramik paasivaat appisimaaqatigiilluaannartaratik – pissusissamisoorluinnarpoq. Soorlu puigorsimasaq timip eqqaamagaa.

- Suut tamarmik inissaminnut pipput, Lars oqarpoq.

- Allaannginnami nipilersoqatigiittuaannarsimasugut. Ukioqqortusereerlunga ikinngutigilluagassannik naapitsinissara ilimagisimanngikkaluarpara - taamatulli pisoqarpoq.

Tusarnaartitsinerit ataasiakkaarlugit - uummat peqataatillugu

DDR-ikkut appisimaaqatigiittaqqilernerisa kingorna guitariinnarmik appisimaarnerit tusarnaartitsinerillu – ilaatigut Sisimiuni Nuummilu – pipput. Tivolimi juulip 31-ani tusarnaartitsinissaq tullinnguuppoq. Naatsorsuut angeqaat, kisianni eqqissisimasumik.

- Scenenimi nuannisaqatigiissaagut, Anda oqarpoq.

- Neriuppugut silagissiorumaarluta inuppassuillu takkukkumaartut. Qilanaaqaagut.

Tusarnaartitsiartortarnerat aalajangiusimaqqissaanngilaq – ataasiakkaaripput. Ilaqutariittut inuunermut, suliffimmut nunamilu sumiiffimmut naleqqussartarlutik. Tusarnaartitserusussusaalli piuvoq, ingammik Nunatsinni. Ungasinnerutillugu ajussanngilaq.

- Canadami nipilersortartunik pikialaartoqartitsinermut nipilersortartut issittormiut appisimaartarfiannit tusarniarfigineqarpugut, Anda oqarpoq.

- Annertusinnaavoq.

Ib Uldumip tamanna qungujulalluni piviusorsiortumillu isigaa:

- Timmisartumut bilitsi tigugukku aatsaat upperilissavara.

DDR pikialaartitsinermi tassani ukiut 18-it matuma siorna tusarnaartitsivoq, kisiannili una qularutissaanngilaq: Nipilersoqatigiittarnerup nuannissussaa uteqqippoq, nipilersorneq kisiat pineqarnani.

- Sungiusaqatigiittarfitsinnit allaanerulluinnartumik misigisaqarpugut, Lars oqarpoq.

- Ikinngutigiinneq, peqatigiinneq aamma ilaquttagullu. Suut tamarmik ataqatigiipput.

Seqerngup ataani pujorsunni illaruaatillu quinarpallaanngitsut

Sungiusarnerit unitsikkaangata nipilersoqatigiit silamut nuuttarput. Silami seqinnarissumi siaasaaffik ikinneqarpoq, pølsit neqillu mamarsaasikkat tipaat cigarettit pujuannut akuleruppoq. Nipilersoqatigiit akornanni kisimik paasisinnaasaminnik, allat quiagiunnanngisaannik, quiassuarneq tusarsaavoq. Aamma immiaarartorusaarput. Biilernissamut immiaaqqat qanoq amerlatigisut najoqqarneqarnerat eqqumaffiginissaa pisariaqanngilaq, Ibimimi tukkusussaapput.

Nipilersuutit poortorneqareermata qaaliataartoqalereermallu ileqquusup tullia aallartinneqassaaq: Qarasaasiakkut pinnguarneq. Pinnguaat immaqa 2000-ikkut aallartilaarneranneersoq, immaqaluunniit siusinnerusumeersoq. Inuusuppallaarunnaarsimasullu qasullutik isaat qasilialaalerpata aatsaat kunaatseertoqassaaq - Sjællandillu sinneranut aqaguani angerlakaannginnermi siusissukkut sungiusaqatigiinnissaq isumaqatigiissutaalluni.

Tivolimut juulip 31-anut piareerput.