Juulli qangatut
ikkunnaarpoq.
Danmarks Radiop
inuulluaqqusineq aallakaateqqinneqassanngitsoq – ukiunilu 91-ini
ileqquusimasutut 2023-mi aallakaatinneqartoq naggasiutaasimasoq
sapaatip-akunnera kingulleq sisamanngornermi nalunaarutigimmagu kalaallit
danskillu tamanna isumaqatigiissutigaat.
Juulli qangatut
ikkunnaarpoq.
Danmarks Radiop
inuulluaqqusineq aallakaateqqinneqassanngitsoq – ukiunilu 91-ini
ileqquusimasutut 2023-mi aallakaatinneqartoq naggasiutaasimasoq
sapaatip-akunnera kingulleq sisamanngornermi nalunaarutigimmagu kalaallit
danskillu tamanna isumaqatigiissutigaat.
DR-imi aalajangiineq
Facebookimi oqallisaalerpoq. Facebookimi quppernerni ”Alle der har et
kærlighedsforhold til Kalaallit Nunaat”-mi aamma ”Alle der har arbejdet i
Grønland”-imi kamalluni allatat 175-it sapaatip-akunnerata naanerani
atuarneqarsinnaapput.
- Juulimaaqarani
juullertussanngorpoq, Anne Kuitse Andersen allappoq.
- Alianangaarami! Ilaquttakkalu
DR-imi Kalaallit Nunaannut juullimi inuulluaqqusineq Disney-llu juullimi
isiginnaagassiaa juullikkunni isiginnaartuaannarpagut, Connie Ibsen Jensen
isumaqarpoq.
- Danmarks Radio kulturikkut
ileqqumik ataqatigiinnermik nuannaarnermillu misigilersitsisartumik
akisussaaffeqarumajunnaarsimavoq, Jan Gronemann allappoq.
Guuterput pingaaruteqartoq
Kalaallit Nunaannut
juullimi inuulluaqqusineq
’Kalaallit Nunaannut
juullimi inuulluaqqusineq’ pillugu isumassarsiaq Kangersuatsiami Upernaviup
pigisaani inuussutissarsiornermi aqutsisup ukiut 92-it matuma siorna aasakkut
Statsradiofonimut ’Aallakaatitassiorfiup juullimi unnuk ataaseq marlulluunniit
atuisut Danmarkimiittut qatanngutiminnut ilaquttaminnulluunniit maaniittunut
akeqanngitsumik inuulluaqqusisinnaanissaannik’ allanneratigut pinngorpoq.
Kissaataa piviusunngorpoq,
tusarnaartartullu DR-ip 1925-mi aallartinneraniilli siullermeerlutik
’inuinnaat’ raatiukkut tusaasinnaalerpaat. DR-ip ’Kalaallit Nunaannut juullimi
inuulluaqqusineq’ ukiut ingerlanerini assigiinngitsunik
ilisarititsisoqartittarlugu taamanili aallakaatittalerpaa. Ukiut siulliit
raatiukkut, 1983-miillu tv-kkut.
Inuit nittartakkatigut
naapittarfiini oqaatsit ilaatigut sakkortupput, allatalli amerlanertigut
pakatsinermut tunngapput. Kalaallit Nunaanni Danmarkimilu isiginnaarutip
saavani ileqqoq tussiummik Guuterpumik naggaserneqartartoq inuppassuarnut
pingaaruteqarpoq.
Danmarks Radio
aalajangiusimaannartoq sunnerneqanngilaq.
- Aallakaatitat 1932-mili
DR-ip juullimi pilersaarutaani aalajangersimasumik aallakaatinneqartartut
ullutsinnut naleqqukkunnaarsimapput. Siullermik raatiukkut ukiuni 50-ini,
kingornalu 1983-imiit tv-kkut aallakaatitassiatut, aaqqissuisoqarfimmi
ingerlatsisoq Gustav Lützhøft, DR Kultur, Debat & Musik-imeersoq oqarpoq.
Suna tamarmi piffissaqartoq
- Suna tamarmi
piffissaqarpoq, DR-imilu ukiorpassuarni ’Kalaallit Nunaannut juullimi inuulluaqqusineq*
nuannarinikooqaarput. Aammali aallakaatitassiat piffissami allami danskit
kalaallillu atassuteqarpallaaratik ullumikkutuut oqarasuaatit, sms-it,
e-mailit, qarasaasiat, inuit nittartakkatigut naapittarfii, oqarasuaatini
angallattakkani assit allarpassuillu atorlugit attaveqatigiinnissaminnut
teknikkeqarnikkut periarfissaqarpallaanngikkallarmata pilersitaasut aamma
akuerisariaqarparput.
Ukiuni kingullerni
aallakaatitassiap nutarsarnissaa iluatsissimanngitsoq aaqqissuisoqarfimmi
ingerlatsisuttaaq nassuerutigaa.
- Isiginnaartartut ilaasa
– Danmarkimi Kalaallillu Nunaanni – Kalaallit Nunaannut juullimi
inuulluaqqusineq juullimi ileqqutut nuannersutut isiginnaartarsimammassuk
paasisinnaakutsoorpara. DR-ili aamma – ingammik ukiuni kingullerni –
aallakaatitassiani danskit kalaallillu inuunerannik ullumikkut atuuttunik
malinnaannginnerarlugu unnerluutigineqartarsimavoq.
DR-ip Kalaallit Nunaannut
juullimi inuulluaqqusineq taamaatikkaluaraa isiginnaartartut kalaallit
Danmarkimiit tv-kkut juullimi inuulluaqquneqassapput.
Peqatigiiffiit kattuffiat
Inuit kalaallit peqatigiiffiisa Kalaallit Nunaannut juullimi
inuulluaqqussutertik, ukioq manna decembarip 7-ani Vejlemi ingerlanneqartussaq,
ingerlatiinnassavaat. Inuulluaqqusineq taanna KNR-ikkut aallakaatinneqassaaq.
- Ulloq taanna
toqqaannartumik aallakaatitsisoqassaaq, juullimilu unnukkut aaqqissuussaq
pisarnertuut aallakaatinneqassaaq, aningaaserisoq Jonhard Telling peqatigiiffiit
kattuffiannit Inuimmiit ilisimatitsivoq.
