UNNIA

Eqqumiitsuliorneq, kulturi ataatsimoornerlu

Suialaa Arts Festival – siornatigut Nuuk Nordisk Kulturfestivalimik taaneqartartoq – ukioq manna ukiunik qulinngortorsiorluni nalliuttorsiorpoq. Festivali ukiut allortarlugit ingerlanneqartarmat arfinilissaannik aaqqissuunneqarpoq.

Assiliisoq: Oscar Scott Carl

Paninnguaq Steenholdt Paninnguaq Steenholdt Paninnguaq Steenholdt tusagassiortoq

Saqqummersinneqarpoq 28. Oktobari 2025 - 15:47

Annonse

Ane Marie Ottosen isiginnaartitsisartoq, Nuka Alice qilaatersortartoq, Jessie Kleemann, eqqumiitsuliortoq aamma Josef Tarrak rappertartoq, Suialaa Arts Festival 2025-mi peqataasorpassuit ilagaat.

Katuami oqaloqatigiinnermut inuit katersuupput, tassani festivalernerup nalaani avitseqatigiinneq eqqarsaatiginneqqissaarnerlu ingerlanneqarlutik. Nuummi Eqqumiitsulianik Katersugaasivik, Girjegummi-teamet aamma Daiddallu nunap inoqqaavisa isiginnittaasiannik eqqumiitsuliorneq kulturikkullu iliuuseqarneq aqqutigalugit sammisaqartitsipput.

Eqqumiitsuliortut kulturikkullu suliaqartut Issittumeersut Nunanilu Avannarlerneersut katersuummata, Nuuk uummaarissumik pisoqarfiuvoq. Illoqarfimmilu sumiiffinni assigiinngitsuni isiginnaartitsinerit sammisaqartitsinerillu atorlugit ataatsimoornertik alapernaannertillu nalliussivaat.

Kulturi eqqumiitsuliornerlu ulluni sisamani nuannersumik, qanilaartumik piviusorsiortumillu nalliuttorsiutigineqarput isiginnaartitsinerit, tusarnaartitsinerit, qitinnerit, illuliortaaseq, assilialianik eqqumiitsuliornerit atuakkiornerlu illoqarfimmilu oqaloqatigiittarfinni amerlasuuni sammisaqarfiusunik.

Nuummi aaqqissuussami qilaatersornermik erinarsornermillu kikkunnilluunniit peqataaffigineqarsinnaasumi Nuup Qeqqaniittumi Esme Loungemi.

- Ingerlalluarpoq. Assigiinngitsorpassuarnik, isiginnaarianullu assigiinngitsunut sammisaqartitsivugut. Isumaqarpunga nuannersumik misigisaqarfiusimasoq, aamma tusarnaartut iluarisimaarinnilluarlutik. 2027-mi tullianik festivalertoqarnissaa qilanaaraarput, festivalimi aqutsisoq Pauliina Oinonen AG-mut oqarpoq.

Suialaa Arts Festival nunatsinni kulturikkut aaqqissuussinerit annersaraat ukiullu allortarlugit eqqumiitsuliortut 200-t, kajumissutsiminnik sulisut 100-t peqataasullu 2500-t Nuummi katersuuttarmata.

Suialaa Arts Festival Nunatsinni kulturikkut aaqqissuussisarnerit annersaraat ukiullu allortarlugit eqqumiitsuliortut 200-t, kajumissutsiminnik sulisut 100-t peqataasullu 2500-t Nuummi katersuuttarlutik.