Festivali ukiunik qulinngortorsiortoq nutaamik taaguuteqalerpoq nutaanillu qulleqalerluni

Suialaa Arts Festival – siornatigut Nuuk Nordisk Kulturfestivalitut ilisimaneqartoq – ukioq manna ukiunik qulinngortorsiorpoq. Arfinilissaannik aaqqissuunneqarpoq, tassami ukioq allortarlugu aaqqissuunneqartarami.

- Ulapeqaagut, suliassallu kingulliit naammassisariaqarpavut. Taamaattorli ajunngilagut aamma pissangaqaagut. Qilanaarisassarpassuaqarpoq, festivalimi aqutsisoq Pauliina Oinonen oqarpoq.

Suialaa Arts Festival Nunatsinni kulturikkut aaqqissuussinerit annersaraat ukiullu allortarlugit eqqumiitsuliortut 200-t, kajumissutsiminnik sulisut 100-t peqataasullu 2500-t Nuummi katersuutsinneqartarlutik.

Pisussani tamatumuuna kalaallit tusaamasat soorlu Torluut!, AVIAJA Dance, Josef Tarrak, Arnajaraq Støvlbæk aamma Nive & The Deer Children tusarnaartitsissapput.

- Aamma erinarsortartut tusaamasat Saamit Nunaanneersut Nunavummillu torlorsortartut marluk tusarnaartitsissapput, Pauliina Oinonen oqaluttuarpoq.

Taakku saniatigut Norgemiu-Vietnamimiu qitinnermik ilitsersuisartoq isiginnaartitsisartorlu, Inuvialuk assilialiortoq allallu nunanit tamalaanneersut peqataassapput.

Taamaattumik oktobarip 23-annit 26-annut Nuuk uummaarissumik pisoqarfiussaaq, eqqumiitsuliortut kulturikkullu suliaqartut Issittumeersut Nunanillu Avannarlerneersut katersuullutik isiginnaartitsinernik, tusarnaartitsinernik, qitinnernik, ilusilersuisarnernik, assilialiornernik, atuakkialerinermik, oqaloqatigiissuteqarnernik allarpassuarnillu sammisassaqartitsilerpata.

Allaanerusoq

Taaguutaa allanngortillugu ukiup aappaata affaata matuma siornagut, Suialaamik taaguuserneqarnera, Kunngip taalliaaneersumik Suialaamik taaguuteqalerpoq.

- Kunngi eqqumiitsuliortuuvoq tamatigoortoq, assigiinngitsorpassuarnik suliaqartarsimasoq, tamannalu festivalertitsinermi ersersinneqartartoq isumaqarpunga. Ukiut qulit ingerlaneranni festivalertitsisarnerni pingaarnertut siunertaasimasoq tassaavoq eqqumiitsulianut tamanut inissaqartitsinissaq, eqqumiitsuliat assigiinngitsut akulerutsinnissaannut eqqumiitsulioriaatsinullu assigiinngitsunut inissaqartitsinissaq, Pauliina Oinonen oqarpoq.

Taaguutaata allanngortinnerata saniatigut, aamma nutaamik ilisarnaateqalerpoq, tassa tulukkamik ilisarnaateqalerami, Arny Mogensenimit Bolt Lamarimeersumit ilusilersorneqartumik. Aamma:

- Periusissiaq naapertorlugu Issittumi pissutsit, nunap inoqqaavi nunallu inoqqaavisa isiginnittaasiat samminerujartuinnarpavut. Saaminik eqqumiitsuliortorpassuaqarpoq, najukkami eqqumiitsuliortut Inuillu Nunaanni eqqumiitsuliortut suliniuteqartittarpavut. Issittoq ukioq manna aatsaat taama pingaartitsigivarput, oqarpoq.

Minnerunngitsumillu festivalertitsisarnermi nutaamik aqutsisoqalerpoq.

Pauliina Oinonen Finlandimiuuvoq 2019-imilu Ilisimatusarfimmi ilinniartut paarlaasseqatigiinnerannut atatillugu Nuummut pigami. Taassuma Susanne Andreasen taarserpaa.

- Nuuk Nordisk siullerpaamik 2019-imi misigeqqaarpara, kulturikkullu misigisaq nuannerluinnartoq, aammali inuttut misigisaqarfigisara. Tassanimi aappara naapippara, ukiullu arfinillit qaangiunneranni suli aappariippugut. Inuit katersuuttarput, illoqarfimmi uummaarissoqarpoq assigiinngitsorpassuarnillu tupinnartuliortoqarsinnaalluni. Festivalimik ineriartortitsinermi siuttuuneq ataqqinaataalluarpoq, Pauliina Oinonen oqarpoq.

Nuuk Nordisk Kulturfestival 2015-imi aallartinneqarpoq NAPA-millu – Nunani Avannarlerni Piorsarsimassutsikkut Attaveqaatimit aamma Kommuneqarfik Sermersuumit pigineqarluni.

Piginnaanilippassuit

Isiginnaartitsivimmi, atuakkanik atorniartarfimmi, GUX-imi, Qassimi, Katuami, illoqarfimmi sumiiffinni tamanut ammasuni, Nuummilu sumiiffinni allani assigiinngitsuni aaqqissuussinerit ingerlanneqassapput. Takutitsinerit, tusarnaartitsinerit aamma saqqummersitsinerit saniatigut pisussatut allattorsimasunut ilaapput sammisaqartitsinerit, isumasioqatigiissitsinerit oqaloqatigiissitsinerillu.

- Ukioq manna festivalertitsisoqarnerani takutitsisarfiit tusarnaartitsisarfiillu mikinerussapput, Pauliina Oinonen oqarpoq.

Pingaarnerpaarli tassaalluni eqqumiitsuliortut naapissinnaanerat.

- Tamanna aamma pissutigalugu inuit nunanit allanit qaaqquneqartarnissaat kissaatigaara, Kalaallit Nunaata nunallu inoqqaavisa suut neqeroorutigisinnaaneraat takusinnaaniassammatigik. Piginnaaneqarluartut amerlaqaat eqqumiitsuliallu kusanartut takutinneqarsinnaasut amerlaqalutik. Taamaattumik peqataasussat amerlanerit nunanit avannarlerneersut qaaqqusimavavut, Issittumi pisartut nuannersut tamaasa takusinnaaniassammatigik, oqarpoq.