ICC: Naggueqatigiit Inuit Ulluat pisortatigoortumik ullunut erfalasulerfissanut ilanngulli
Naggueqatigiit Inuit Ulluat qaquguussanersoq Inuit Circumpolar Council-imit aalajangerneqarnikuuvoq, nalliuttorsiornerlu tamanna Kalaallit Nunaanni erfalasulerfissatut pisortatigoortumik nalliussineqartassasoq ICC-p kissaatigaa.
Siunissami Erfalasorput takukulanerulissavarput, tulliani novembarip arfineq-aappaani Inuit ulluanni? Taamaaliussasugut ICC isumaqarpoq.
Assiliisoq: Knud Fl. Larsen
2006-imiilli novembarip arfineq-aappaat nunat tamalaat kattuffiannit Inuit Circumpolar Council-imit (ICC) pisortatigoortumik inuit ullorsiutigisartagaattut akuerineqarsimalerpoq.
Ullorli taanna Kalaallit Nunaanni maluginiarneqarnerusariaqartoq ICC isumaqarpoq:
- Ukiup ingerlanerani Nunatsinni ullorpaalussuit erfalasorput amusarparput aamma ullut ilaanni immaqa uagut ileqqutsinnut tulluarpallaanngikkaluartuni. Inuit Ulluat tassaavoq killeqarfiiit akimorlugit ulloq ataatsimoornitta piuneranik nalliuttorsiorfissarput, taamaalilluta piffissami annertuumi avissaaqqasimanitsinnik atorunnaarsitsinerput ersersittassavarput, Hjalmar Dahl ICC Kalaallit Nunaanni siulittaasoq oqarpoq.
- Ulloq taanna erfalasulerfittut isigineqassasoq kajumissaarutigaarput, soorluttaaq Nunat Avannarliit Ulluat Nunallu Avannarliit Kitaata Ulluat taamaaliorneqartarsimasut, ilassuteqarluni oqarpoq.
Oqallinneq tamanna saqqumilaarpoq, qanittukkummi Kalaallit Nunaat ullut erfalasulerfissat pillugit nutaamik nalunaarummik peqalissammat.
Inuit Ullualli ullunut erfalasulerfissanut ilanngunneqarnissaa Naalakkersuisut maannakkorpiaq pilersaarutiginngilaat, nunalli tamalaat akornanni suleqatigiinnerup malunnartinnissaanik sanilerisat, tassa Island, Savalimmiut Nunavullu ullorsiorfii pillugit pilersaaruteqarput.
ICC-p ulloq taanna toqqarpaa Eben Hobson Senior, Alaskami Utqiagvikimi borgmesteriusimasoq novembarillu arfineq-aappaanni inuuissiortoq, ataqqiniarlugu. 1977-imi inuit ataatsimeersuarnissaannut siullermut qaaqqusissutaa ullumikkut ICC-usumik tunngavililiivoq.
