Isiginnaartitsissusiaq nutaaq: Isiginnaariartarfimmi atoqatigiinneq asanninnerlu

- Atoqatigiinnermut timimullu tunngasumik oqaloqatigiinnertalimmik isiginnaagassiamik amigaateqarsimasugut isumaqarpunga. Aamma kanngunaraluarpalluunniit. Allanik tikkuartuinertaqanngitsumik ammasumik oqaloqatigiinneq. Isiginnaartitsisartoq Aviana Steinbacher taama oqaluttuarpoq. Taassuma isiginnaagassiatut allataa, ”Marlukasiulluta// DVITO // Lets talk about it, qaammat ataaseq qaangiuppat isiginnaartitsissutigineqassaaq.

- Siorna novembarip qaammataani isumassarsiaraara. Kikkut tamarmik tusarusutaannik isiginnaartitsissutissamik allanneq misilikkusuppara. Arnap timaanut illuatungeriillu atoqatigiinnermi oqiliallannerannut tunngasumik, oqaluttuarpoq. Aviana Steinbacher Josef Tarrak-Petrussen peqatigalugu isiginnaartitsisuuvoq. Hanne Trap Friis ilitsersuisuuvoq. Naleraq Eugenius qullilerisuulluni isiginnaagassiami aqutsisuuvoq.

AG-p peqataasussat inuusuttut naapittarfianni NUIF-imi naapimmagit isiginnaagassiap tunuatungissaa qulliillu qanoq issanersut suli oqaatigissallugu siusippallaarpoq. Isiginnaartutulli aappariilernerup qanoq issinnaanera, naapinnermit najulernermut, takusinnaassavarput.

- Qanoq oqaloqatigiittoqarsinnaanersoq takutipparput. Aamma angutit imminnut qanoq oqaloqatigiittarnersut. Oqaluuserisavut pillugit qanoq assigiinngitsigisinnaanersut, Hanne Trap Friis oqarpoq.

Taassuma isiginnaagassiaq inuusuttunit inuusuttorpalaartumik suliaasoq oqaatigaa.

- Qiteriaatsit inuusuttut uannik, pissanganarsaarisartumillu AneMarie Ottosenimik oqaloqateqareerlutik namminneq pilersippaat, ilitsersuisoq oqarpoq.

Isiginnaagassiaq elektroniskerpalaartunik nipilersuutilerujussuuvoq. Taakkua Anda Otto Schmidtip, Andachanimik nalunnginneqarnerusup, nipilersuusiarai.

Isiginnaagassiaq filmitut kusanartutut ippoq qitinnertalerujussuaq. Lisbeth Poulsen tunuliaqusioqataalluni isiginnaariartarfilioqataavoq. Isiginnaagassiaq ullutsinni pisartunut assersuutissallugu tulluarpoq. Inuusuttunut 15-ileereersunut saaffiginnittoq.

Aviaaja Steinbacher isiginnaagassiaq atoqatigiinneq pillugit ilinniartitsinerunngikkaluartoq atoqatigiinneq pillugu ilinniartitsinermi ilikkarsimarusutaminik assigiinngitsunik takutitsinerarpaa. Soorlu isumapiloqarneq tunngavigalugu tatiginnilersitsiniaaneq akuerseqatigiinnerlu.

Atoqatigiinnermik takutissuineq

Isiginnaagassiaq atoqatigiinnermik takutissuinermik aamma tunngassuteqassaaq. - Kikkut tamangajammik atoqatigiinnermut tunngasunik isiginnaartarput. Taamaakkaluartoq tamanna kanngungineqalaartarpoq. Kisianni sooruna kanngunartoq? Aviana Steinbacher apeqqusiivoq.

Hanne Trap Friisip inuusuttorpassuit atoqatigiinnermut tunngasunik isiginnaarnerminni isumassarsisartut ilimagaa. Piviusorli atoqatigiinnermik isiginnaagassiani atoqatigiittunit isiginnaakkanit allarujuusinnaavoq.

– Atoqatigiinneq asanninnerlu ataqatigiisinneqarsinnaapput, taamaattariaqanngilarli. Inuusuttorpassuit piviusuunngitsunik takusareerput, ilitsersuisoq oqarpoq. Taassuma isiginnaagassiamik suliaqarnermini kinguaariit arlallit, nammineq isiginnaartitsisullu ukioqataat, oqaloqatigilluartarsimallugit unnersiutigaa.

– Oqaloqatigiinnivut nuannersorpassuupput, timitsinnut qanoq isiginninnerput assigiinngitsuusoq oqaloqatigiinni paasivarput. Utoqqaanerusut assersuutigalugu tissanniarnerminni ajornartorsiutit eqqartortorsuunngilaat. Kisianni inimi ataatsimi ajornaraluartorluunniit taama iliorpugut, Hanne Trap Friis oqarpoq.

Josef Tarrak-Petrussenip Aviana Steinbacherillu atuarfimmi timi atoqatigiinnerlu pillugit ilinniartitsinermi peqataaneq qanoq toorlatsigisoq eqqaamavaat.

– Nukappiaqqani kisiartaallunga atuartitsinernut peqataasarpunga, nukappiaraqatikka atuartitsinermut takkunneq ajorput. Taava niviarsiaqqat akornanni issiasarpunga usuusallu qanoq usuup puulernissaa ilinniarlugu, Josef Tarrak-Petrussen oqaluttuarpoq.

Aviana Steinbacherip suiaassutsini aalajangersimasuni oqaloqatigiissutigisat paqumigineqarnerusartut nipituuliuutigaa.

– Angutit usummik angissusaat tissassarnerlu oqaloqatigiissutigisarpaat. Arnanili imminut pinnguarinerup oqaloqatigiissutiginissaa paqumigineqarneruvoq, oqarpoq.

Isiginnaagassiaq Teater freezeProductionip siornatigut isiginnaagassiarisartagaanit oqinnerusoq, tassanngaanniit oqaatigineqarpoq.

- Maanna takutitarput nunasiaataasimanermut tunngassuteqanngilaq. Kinguaassiuutitigut kannguttaatsuliorneqaranilu imigassamut tunngasortaqanngilaq, Hanne Trap Friis oqarpoq.

– Isiginnaagassiamut taakkununnga qitiutitsinngitsumut peqataaneq iluarisimaarnartorujussuuvoq, Josef Tarrak-Petrussen ilaliivoq.

Isiginnaagassiap kikkuugaluanilluunniit paasineqarsinnaanissaa pingaartinneqarpoq. Isiginnaagassiaq kalaallinut inuusuttunuinnaq tunngassuteqanngilaq.

– Ilisarsisoqarsinnaavoq. Sumukaraluaruttaluunniit inuusuttut isiginnaagassiamut ilisarinnissinnaassapput. Ataatsimoornermut tunngavoq. Isiginnaagassiamik takoreersut atoqatigiinnermut tunngasunik, asanninnermut timimillu tunngasunik ammasumik oqaloqatigiittalernissaat neriuutigaarput, Aviana Steinbacher oqarpoq.

Isiginnaagassiaq Nuummi septembarip 26-anni takuteqqaarneqassaaq. Nunatsinni taassuma kingorna angalaarunneqassaaq. Danmarkimi Aarhusimi aamma takutinneqarumaarpoq. Kalaallit Nunaanni Danmarkimilu isiginnaartitseqattaarnissat neriuutaapput.