Issittumi ilisimasassarsiornernit filmiliat alutornartut

Ukioq manna ukiakkut ukiut 100-t matuma siorna Thulemi ilisimasassarsiortut tallimaat oqaluttuarisaanermi tusaamasat ukiuni sisamani ilungersorlutik sulisareerlutik angerlamut apuupput.

Tamanna pissutigalugu Det Danske Filminstitut, Sverigemi Filmarkivet Norgemilu Nasjonalbiblioteket toqqorsivinni misissuisimapput.

- Issittumi ilisimasassarsiornernit filmiliat pitsaanerpaat soqutiginarnerpaallu maanna digitalinngortinneqarput internettimullu ilineqarlutik akeqanngitsumik isiginnaarneqarsinnaallutik. Qulequtaq ’Issittup imartaani sapiitsuliortut – issittumi ilisimasassarsiornerit filminik takutitsinerit’ atorlugu.

Filmit digitaleriserikkat

Filmit piviusulersaarutit immiussallu 40-t missaanniittut 1908-miit 1994-imut assilisaapput. Filmit ilaat digitalinngortinneqaqqammerput, filmillu allat ilanngunneqassallutik.

Filmit saniatigut filminik oqaluttuarisaanermut tunngasunik, ilisimasassarsiornerit pingaarutillit pillugit oqaluttuanik kiisalu issittumi misigisassarsiorneq pillugu allaaserisaqarluni. Allaaserisat tamarmik qallunaatut, svenskisut, norskisut kalaallisullu atuarneqarsinnaapput.

Arnarulunnguamik filmiliat immikkuullarissut

Filmit ilisimasassarsiornernit ilaatigut Knud Rasmussenimit, Roald Amundsenimit, Salomon August Andréemit, Eigil Knuthimit, Vitus Beringimit, Ejnar Mikkelsenimit, Lauge Kochimit allanillu siulersorneqartunit assilisaapput.

1800-kkut naalerneranni filmiliortoqarsinnaalermat issittumi ilisimasassarsiornerit amerliartuinnartut pillugit paasissutissiiniarnermi nittarsaassinermilu atorluarneqalerput.

Filmimi takuneqarsinnaapput ilisimasassarsiornermi peqataasut ilaat, qallunaat akornanni ilisimaneqarpianngitsut. Filmiliarpassuit ilagaat Arnarulunnguaq pillugu filmiliaq, taannalu aalasuliatut uummaarissumik assituaasoq, Det Danske Filminstitut tusagassiuutinut nalunaarummi allappoq.